حضرت عطاء فرماتے ہیں کہ جس بچے کا دودھ چھڑوا دیا گیا ہو اس کے دودھ پینے سے رضاعت ثابت نہیں ہوتی۔ [مصنف ابن ابي شيبه/كتاب النكاح/حدیث: 17940]

حضرت ابن عمر رضی اللہ عنہما فرماتے ہیں کہ حرمت رضاعت صرف بچپن میں دودھ پینے سے ثابت ہوتی ہے۔ [مصنف ابن ابي شيبه/كتاب النكاح/حدیث: 17941]

حضرت سعید بن مسیب فرماتے ہیں کہ رضاعت اس وقت ثابت ہوتی ہے جب بچے کو بچپن میں دودھ پلایا جائے اور جس کی مقدار اتنی ہو جس سے گوشت اور خون بنے۔ [مصنف ابن ابي شيبه/كتاب النكاح/حدیث: 17942]

حضرت شعبی فرماتے ہیں کہ دو سال کے اندر دودھ پلایا جائے یا ناک میں ٹپکایا جائے تو حرمت رضاعت ثابت ہوتی ہے۔ اس کے بعد دودھ پینے سے رضاعت ثابت نہیں ہوتی۔ [مصنف ابن ابي شيبه/كتاب النكاح/حدیث: 17943]

حضرت علی رضی اللہ عنہ نے حضرت ابن عباس رضی اللہ عنہما سے فرمایا کہ کیا تم نہیں جانتے کہ رسول اللہ صلی اللہ علیہ وسلم نے متعہ سے اور پالتو گدھوں کا گوشت کھانے سے منع فرمایا ہے؟ [مصنف ابن ابي شيبه/كتاب النكاح/حدیث: 17944]

حضرت سبرہ جہنی کہتے ہیں کہ رسول اللہ صلی اللہ علیہ وسلم نے فتح مکہ کے دن متعہ سے منع فرمادیا۔ [مصنف ابن ابي شيبه/كتاب النكاح/حدیث: 17945]

حضرت سبرہ جہنی کہتے ہیں کہ میں نے رسول اللہ صلی اللہ علیہ وسلم کو دیکھا کہ آپ رکن اور باب کعبہ کے درمیان کھڑے تھے اور فرما رہے تھے: ”اے لوگو! میں نے تمہیں عورتوں سے متعہ کرنے کی اجازت دی تھی، اب اللہ تعالیٰ نے اسے قیامت تک کے لئے حرام قرار دے دیا ہے، اگر کسی کے پاس متعہ والی بیوی ہو تو اس کا راستہ چھوڑ دے اور جو مہر تم نے انہیں دیا ہے وہ واپس نہ لو۔ [مصنف ابن ابي شيبه/كتاب النكاح/حدیث: 17946]

حضرت ایاس بن سلمہ کے والد فرماتے ہیں کہ رسول اللہ صلی اللہ علیہ وسلم نے اوطاس والے سال میں تین (دن) کے لئے متعہ کی اجازت دی تھی، پھر اس سے منع فرمادیا۔ [مصنف ابن ابي شيبه/كتاب النكاح/حدیث: 17947]

حضرت عمر رضی اللہ عنہ فرماتے ہیں کہ اگر میں نے اس کے بارے میں پہلے سے اعلان کر دیا ہوتا تو میں (متعہ کرنے والوں کو) سنگسار کرتا۔ یعنی متعہ کے بارے میں۔ [مصنف ابن ابي شيبه/كتاب النكاح/حدیث: 17948]

حضرت سعید بن مسیب رحمہ اللہ فرماتے ہیں کہ حضرت عمر رضی اللہ عنہ نے دو متعوں: متعۃ النساء اور متعۃ الحج سے منع فرمایا ہے۔ [مصنف ابن ابي شيبه/كتاب النكاح/حدیث: 17949]