حضرت ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا کہ جس شخص کی دو بیویاں ہوں اور وہ ایک کی خاطر مدارت دوسری سے بڑھ کر کرتا ہو تو قیامت کے دن اسے اس حال میں اٹھایا جائے گا کہ اس کا ایک پہلوگرا ہوگا۔ [مصنف ابن ابي شيبه/كتاب النكاح/حدیث: 18470]

حضرت حسن رحمہ اللہ فرماتے ہیں کہ اگر ایک آدمی کی دو بیویاں ایک کمرے میں ہوں تو ایک کے سامنے یا اس کے سنتے ہوئے دوسری سے جماع کرنا مکروہ ہے۔ [مصنف ابن ابي شيبه/كتاب النكاح/حدیث: 18471]

حضرت عکرمہ رحمہ اللہ فرماتے ہیں کہ حضرت ابن عباس رضی اللہ عنہما اپنی دو باندیوں کے درمیان سویا کرتے تھے۔ [مصنف ابن ابي شيبه/كتاب النكاح/حدیث: 18472]

حضرت عطاء رحمہ اللہ فرماتے ہیں کہ دو باندیوں کے درمیان سونے میں کوئی حرج نہیں۔ [مصنف ابن ابي شيبه/كتاب النكاح/حدیث: 18473]

حضرت شریح رحمہ اللہ فرماتے ہیں کہ اگر ایک آدمی کو اس کی بیوی پیش کی گئی، لیکن اس کا دعویٰ ہے کہ اس نے بیوی سے دخول نہیں کیا، عورت بھی اس کا اقرار کرتی ہے، تو عورت کو نصف مہر ملے گا اور اس پر عدت بھی لازم ہوگی۔ نیز یہ فیصلہ کرنے کے بعد قاضی شریح رحمہ اللہ نے عورت سے فرمایا کہ میں تیرے خلاف تیری بات کی تصدیق کرتا ہوں اور تیرے حق میں تیری بات کی تصدیق نہیں کرتا۔ [مصنف ابن ابي شيبه/كتاب النكاح/حدیث: 18474]

حضرت حسن رحمہ اللہ ایسی صورت میں فرماتے ہیں کہ مرد پر پورا مہر لازم ہوگا عورت چاہے تو لے لے اور اگر چاہے تو چھوڑ دے۔ [مصنف ابن ابي شيبه/كتاب النكاح/حدیث: 18475]

حضرت شعبی رحمہ اللہ فرماتے ہیں کہ اگر ایک آدمی نے کسی آدمی سے کہا کہ جب شوال کا مہینہ گذر جائے تو میں نے اپنی بیٹی کا نکاح تجھ سے کردیا تو یہ نکاح نہیں ہے۔ [مصنف ابن ابي شيبه/كتاب النكاح/حدیث: 18476]

حضرت شعبی رحمہ اللہ فرماتے ہیں کہ اگر آقا غلام کو شادی کی اجازت دے تو نفقہ اسی پر لازم ہوگا۔ [مصنف ابن ابي شيبه/كتاب النكاح/حدیث: 18477]

حضرت حسن رحمہ اللہ فرماتے ہیں کہ عورت اپنے بیٹے، والد یا بھائی کے پاس کھلے سر نہیں بیٹھ سکتی، صرف خاوند کے ساتھ بیٹھ سکتی ہے۔ [مصنف ابن ابي شيبه/كتاب النكاح/حدیث: 18478]

حضرت عکرمہ رحمہ اللہ فرماتے ہیں کہ آدمی کی جلد کا اپنی ماں یا بہن کی جلد کو چھونا زنا کا ایک شعبہ ہے۔ [مصنف ابن ابي شيبه/كتاب النكاح/حدیث: 18479]