حضرت ابو مالک قرآن مجید کی آیت { وَلاَ تَعْزِمُوا عُقْدَۃَ النِّکَاحِ حَتَّی یَبْلُغَ الْکِتَابُ أَجَلَہُ } کی تفسیر میں فرماتے ہیں کہ عورتوں کی عدت میں ان سے یہ وعدہ نہ کرو کہ میں تیری عدت گذرنے کے بعد تجھ سے شادی کروں گا۔ [مصنف ابن ابي شيبه/كتاب النكاح/حدیث: 18550]

حضرت مجاہد رحمہ اللہ قرآن مجید کی آیت { وَاہْجُرُوہُنَّ فِی الْمَضَاجِعِ } کی تفسیر میں فرماتے ہیں کہ ان کے قریب مت جاؤ۔ [مصنف ابن ابي شيبه/كتاب النكاح/حدیث: 18551]

حضرت ابراہیم رحمہ اللہ اور حضرت شعبی رحمہ اللہ قرآن مجید کی آیت { وَاہْجُرُوہُنَّ فِی الْمَضَاجِعِ } کی تفسیر میں فرماتے ہیں کہ ان کے ساتھ مت لیٹو۔ [مصنف ابن ابي شيبه/كتاب النكاح/حدیث: 18552]

حضرت ابن عباس رضی اللہ عنہما قرآن مجید کی آیت { وَاہْجُرُوہُنَّ فِی الْمَضَاجِعِ } کی تفسیر میں فرماتے ہیں کہ جب عورت لیٹنے میں مرد کی اطاعت کرے تو وہ اسے مار نہیں سکتا۔ [مصنف ابن ابي شيبه/كتاب النكاح/حدیث: 18553]

حضرت عکرمہ رحمہ اللہ اور حضرت مقسم رحمہ اللہ سے قرآن مجید کی آیت { وَاہْجُرُوہُنَّ فِی الْمَضَاجِعِ وَاضْرِبُوہُنَّ } کی تفسیر کے بارے میں سوال کیا گیا تو حضرت مقسم رحمہ اللہ نے فرمایا کہ ہجر مضجع سے مراد اس کے بستر کے قریب نہ جانا ہے۔ [مصنف ابن ابي شيبه/كتاب النكاح/حدیث: 18554]

اور حضرت عکرمہ رحمہ اللہ نے فرمایا کہ اس سے مراد بات چیت ہے۔ [مصنف ابن ابي شيبه/كتاب النكاح/حدیث: 18555]

اور دونوں حضرات نے { وَاضْرِبُوہُنَّ } کے بارے میں فرمایا کہ اس سے مراد ایسی مار ہے جو شدید نہ ہو۔ [مصنف ابن ابي شيبه/كتاب النكاح/حدیث: 18556]

حضرت حسن رحمہ اللہ قرآن مجید کی آیت { واضْرِبُوہُنَّ } کی تفسیر میں فرماتے ہیں کہ اس سے مراد ایسی مار ہے جو زخم نہ ڈالے۔ [مصنف ابن ابي شيبه/كتاب النكاح/حدیث: 18557]

حضرت علی بن عبد اللہ بن عباس رحمہ اللہ فرماتے ہیں کہ جب تم بیوی سے جماع کرو تو پردہ ڈال لو۔ [مصنف ابن ابي شيبه/كتاب النكاح/حدیث: 18558]

حضرت ابو قلابہ رحمہ اللہ فرماتے ہیں کہ رسول اللہ صلی اللہ علیہ وسلم نے ارشاد فرمایا کہ جب تم جماع کرو تو پردہ ڈال لو اور دو گدھوں کی طرح بالکل ننگے نہ ہوجاؤ۔ [مصنف ابن ابي شيبه/كتاب النكاح/حدیث: 18559]