حضرت ابو بختری رحمہ اللہ فرماتے ہیں کہ ایک آدمی نے حضرت عکرمہ رحمہ اللہ سے سوال کیا کہ کیا میں اپنی ماں کے پاس جانے سے پہلے اجازت طلب کروں؟ انہوں نے فرمایا ہاں اجازت طلب کرو۔ [مصنف ابن ابي شيبه/كتاب النكاح/حدیث: 18540]

حضرت ابو بختری رحمہ اللہ فرماتے ہیں کہ عورت کا بھائی اجازت لے کر آئے گا۔ [مصنف ابن ابي شيبه/كتاب النكاح/حدیث: 18541]

حضرت ابن عباس رضی اللہ عنہما فرماتے ہیں کہ اکثر لوگ اس حکم یعنی اجازت طلب کرنے پر عمل نہیں کرتے، اور میں تو اپنی اس باندی کو بھی حکم دیتا ہوں کہ وہ اجازت لے کر میرے پاس آئے۔ [مصنف ابن ابي شيبه/كتاب النكاح/حدیث: 18542]

حضرت ابن عباس رضی اللہ عنہما فرماتے ہیں کہ (مقررہ) اوقات میں اجازت طلب کرنے کے معاملے میں شیطان لوگوں پر غالب آگیا، اللہ تعالیٰ فرماتے ہیں { یَا أَیُّہَا الَّذِینَ آمَنُوا لِیَسْتَأْذِنْکُمُ الَّذِینَ مَلَکَتْ أَیْمَانُکُمْ وَالَّذِینَ لَمْ یَبْلُغُوا الْحُلُمَ مِنْکُمْ } [النور: 58] [مصنف ابن ابي شيبه/كتاب النكاح/حدیث: 18543]

حضرت محمد رحمہ اللہ قرآن مجید کی آیت { وَالَّذِینَ لَمْ یَبْلُغُوا الْحُلُمَ مِنْکُمْ } کی تفسیر میں فرماتے ہیں کہ ہمارے گھر والے ہمیں سلام کرنا سکھایا کرتے تھے، ہم میں سے جب کوئی آتا تو السلام علیکم کہتا اور ساتھ کہتا کہ فلاں داخل ہوجائے؟ [مصنف ابن ابي شيبه/كتاب النكاح/حدیث: 18544]

حضرت ابو عبد الرحمن فرماتے ہیں کہ قرآن مجید کی آیت { لِیَسْتَأْذِنْکُمُ الَّذِینَ مَلَکَتْ أَیْمَانُکُمْ } عورتوں کے بارے میں نازل ہوئی۔ [مصنف ابن ابي شيبه/كتاب النكاح/حدیث: 18545]

حضرت شعبی رحمہ اللہ فرماتے ہیں کہ قرآن مجید کی آیت { لِیَسْتَأْذِنْکُمُ الَّذِینَ مَلَکَتْ أَیْمَانُکُمْ } منسوخ نہیں ہے، (راوی کہتے ہیں) میں نے کہا کہ لوگ تو اس پر عمل نہیں کرتے، انہوں نے فرمایا کہ اللہ ہی سے مدد طلب کی جاتی ہے۔ [مصنف ابن ابي شيبه/كتاب النكاح/حدیث: 18546]

حضرت قاسم رحمہ اللہ سے اذن کے بارے میں سوال کیا گیا تو انہوں نے فرمایا کہ پردے کے ہر وقت میں اجازت طلب کرو، پھر اس کے بعد (بغیر اجازت) آنا جانا ہے۔ [مصنف ابن ابي شيبه/كتاب النكاح/حدیث: 18547]

حضرت قتادہ رحمہ اللہ قرآن مجید کی آیت { وَلاَ تَعْزِمُوا عُقْدَۃَ النِّکَاحِ حَتَّی یَبْلُغَ الْکِتَابُ أَجَلَہُ } کی تفسیر میں فرماتے ہیں کہ اس سے مراد عدت کا گذر جانا ہے۔ [مصنف ابن ابي شيبه/كتاب النكاح/حدیث: 18548]

حضرت مجاہد رحمہ اللہ قرآن مجید کی آیت { وَلاَ تَعْزِمُوا عُقْدَۃَ النِّکَاحِ حَتَّی یَبْلُغَ الْکِتَابُ أَجَلَہُ } کی تفسیر میں فرماتے ہیں کہ اس سے مراد عدت کا گزر جانا ہے۔ [مصنف ابن ابي شيبه/كتاب النكاح/حدیث: 18549]