حضرت ابن ابی اوفیٰ رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا کہ زانی جب زنا کرتا ہے تو مومن نہیں ہوتا۔ [مصنف ابن ابي شيبه/كتاب النكاح/حدیث: 18570]

ایک اور سند سے یونہی منقول ہے۔ [مصنف ابن ابي شيبه/كتاب النكاح/حدیث: 18571]

حضرت ابان بن عثمان رحمہ اللہ فرماتے ہیں کہ قیامت کے دن زنا کار لوگ اپنی شرمگاہوں کی بدبو سے پہچانے جائیں گے۔ [مصنف ابن ابي شيبه/كتاب النكاح/حدیث: 18572]

حضرت مسروق رحمہ اللہ فرماتے ہیں کہ لوگ سب سے زیادہ زنا کا شکار ہوتے ہیں وہ شہوت ہے، اس کی کوئی بو نہیں کہ پکڑا جاسکے اور حدود قائم کی جاسکیں۔ [مصنف ابن ابي شيبه/كتاب النكاح/حدیث: 18573]

حضرت ابو صالح رحمہ اللہ فرماتے ہیں کہ مجھے خبر ملی ہے کہ اہل جنت کے اکثر گناہ عورتوں میں ہیں۔ [مصنف ابن ابي شيبه/كتاب النكاح/حدیث: 18574]

حضرت ابن عباس رضی اللہ عنہما نے اپنے غلاموں سے فرمایا کہ جو تم میں سے نکاح کرنا چاہتا ہے تو ہم اس کی شادی کرادیتے ہیں۔ جب تم میں سے کوئی زنا کرتا ہے تو اللہ تعالیٰ اس کے دل سے ایمان کے نور کو چھین لیتا ہے اور پھر چاہتا تو لوٹا دیتا ہے اور اگر چاہتا ہے تو نہیں لوٹاتا۔ [مصنف ابن ابي شيبه/كتاب النكاح/حدیث: 18575]

حضرت ابوہریرہ رضی اللہ عنہ فرماتے ہیں کہ ایمان گناہوں سے روکنے والا وصف ہے، جب انسان زنا کرتا ہے تو ایمان اس سے دور ہوجاتا ہے اور جو اپنے نفس کو ملامت کرتا ہے اور (اللہ کی طرف) رجوع کرتا ہے تو اس کا ایمان واپس آجاتا ہے۔ [مصنف ابن ابي شيبه/كتاب النكاح/حدیث: 18576]

حضرت اسامہ رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا کہ میں نے اپنے بعد اپنی امت کے مردوں کے لئے عورتوں سے زیادہ نقصان دہ کوئی فتنہ نہیں چھوڑا۔ [مصنف ابن ابي شيبه/كتاب النكاح/حدیث: 18577]

حضرت ابن عباس رضی اللہ عنہما فرماتے ہیں کہ تم سے پہلے والے لوگوں کا کفر عورتوں کی وجہ سے تھا اور آئندہ بھی کفر عورتوں کی وجہ سے ہوگا۔ [مصنف ابن ابي شيبه/كتاب النكاح/حدیث: 18578]

حضرت عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے ارشاد فرمایا کہ جب آدمی زنا کرتا ہے تو اس وقت مومن نہیں ہوتا۔ [مصنف ابن ابي شيبه/كتاب النكاح/حدیث: 18579]