حضرت عمر رضی اللہ عنہ فرماتے ہیں کہ عورتوں (کو گھر میں رکھنے) پر انہیں کم کپڑے دے کر مدد حاصل کرو، کیونکہ جب ان کے کپڑے زیادہ ہوتے ہیں اور زینت عمدہ ہوتی ہے تو انہیں باہر نکلنا پسند ہوتا ہے۔ [مصنف ابن ابي شيبه/كتاب النكاح/حدیث: 18650]

حضرت ابوبکر بن عبدالرحمن رحمہ اللہ فرماتے ہیں کہ عورت کی ہر چیز پردہ ہے حتی کہ اسکے ناخن بھی۔ [مصنف ابن ابي شيبه/كتاب النكاح/حدیث: 18651]

حضرت ابو جعفر رحمہ اللہ سے روایت ہے کہ رسول اللہ صلی اللہ علیہ وسلم نے ارشاد فرمایا کہ میں بہت غیرت والا ہوں، حضرت ابراہیم علیہ السلام بھی غیر ت والے تھے اور جو شخص غیرت نہیں کرتا وہ الٹے دل والا ہی ہوتا ہے۔ [مصنف ابن ابي شيبه/كتاب النكاح/حدیث: 18652]

حضرت شعبی رحمہ اللہ فرماتے ہیں کہ جب لعان ختم کردیا جائے تو بچہ باپ کا ہی ہوگا۔ [مصنف ابن ابي شيبه/كتاب النكاح/حدیث: 18653]

حضرت مجاہد رحمہ اللہ اور حضرت عطاء رحمہ اللہ سے بھی یونہی منقول ہے۔ [مصنف ابن ابي شيبه/كتاب النكاح/حدیث: 18654]

حضرت شعبی رحمہ اللہ فرماتے ہیں کہ جب لعان نہ ہو تو بچہ باپ کا ہی ہوگا۔ [مصنف ابن ابي شيبه/كتاب النكاح/حدیث: 18655]

حضرت سعید بن مسیب رحمہ اللہ اور حضرت حسن رحمہ اللہ فرماتے ہیں کہ اگر کسی آدمی نے کسی عورت سے زنا کیا تو اس کی بیٹی یا اسکی ماں سے شادی نہیں کرسکتا۔ [مصنف ابن ابي شيبه/كتاب النكاح/حدیث: 18656]

حضرت عطاء رحمہ اللہ فرماتے ہیں کہ اگر کسی آدمی نے کسی عورت سے زنا کیا تو اس کی بیٹی اس پر حرام ہوجائے گی اور اگر اس کی بیٹی سے زنا کیا تو اس کی ماں حرام ہوجائے گی۔ [مصنف ابن ابي شيبه/كتاب النكاح/حدیث: 18657]

حضرت مجاہد رحمہ اللہ اور حضرت عطاء رحمہ اللہ فرماتے ہیں کہ اگر ایک آدمی نے کسی عورت سے زنا کیا تو اس کی بیٹی اس کے لئے حلال نہیں ہے۔ [مصنف ابن ابي شيبه/كتاب النكاح/حدیث: 18658]

حضرت عبد اللہ بن مسبح رحمہ اللہ فرماتے ہیں کہ میں نے حضرت ابراہیم رحمہ اللہ سے سوال کیا کہ آدمی نے ایک باندی سے زنا کیا تو کیا اس کی ماں سے شادی کرسکتا ہے؟ انہوں نے فرمایا نہیں کرسکتا۔ [مصنف ابن ابي شيبه/كتاب النكاح/حدیث: 18659]