حضرت قعقاع بن یزید رحمہ اللہ کہتے ہیں کہ میں نے حضرت ابن سیرین رحمہ اللہ سے اس بارے میں سوال کیا تو انہوں نے فرمایا کہ میں نہیں جانتا یہ کیا ہے، پھر انہوں نے آیت ایلاء تلاوت کی۔ [مصنف ابن ابي شيبه/كتاب الطلاق/حدیث: 19684]

حضرت ابراہیم رحمہ اللہ اور حضرت شعبی رحمہ اللہ فرماتے ہیں کہ اگر ایک آدمی نے قسم کھائی کہ وہ اس وقت تک اپنی بیوی کے قریب نہیں جائے گا جب تک وہ اپنے بچے کا دودھ نہ چھڑا دے تو اگر وہ چار مہینے تک رکا رہے تو ایلاء داخل ہوجائے گا۔ [مصنف ابن ابي شيبه/كتاب الطلاق/حدیث: 19685]

(ایک اور سند سے حضرت شعبی رحمہ اللہ سے منقول ہے کہ) اگر کوئی آدمی قسم کھائے کہ وہ اپنی بیوی کے قریب نہیں جائے گا جب تک وہ اپنے بچے کا دودھ نہ چھڑا دے، تو دونوں حضرات نے فرمایا کہ جب چار مہینے گذر جائیں تو ایلاء داخل ہوجائے گا۔ [مصنف ابن ابي شيبه/كتاب الطلاق/حدیث: 19686]

حضرت سعید بن جبیر رحمہ اللہ فرماتے ہیں کہ غصے اور خوشی کا ایلاء برابر ہے۔ [مصنف ابن ابي شيبه/كتاب الطلاق/حدیث: 19687]

حضرت ابن عباس رضی اللہ عنہما فرماتے ہیں کہ ایلاء صرف قسم کے ساتھ ہی ہوتا ہے۔ [مصنف ابن ابي شيبه/كتاب الطلاق/حدیث: 19688]

حضرت عطاء رحمہ اللہ فرماتے ہیں کہ ایلاء جماع نہ کرنے کی قسم کھانے سے ہوتا ہے۔ [مصنف ابن ابي شيبه/كتاب الطلاق/حدیث: 19689]

حضرت ابو حرہ رحمہ اللہ کہتے ہیں کہ میں نے حضرت حسن رحمہ اللہ سے سوال کیا کہ اگر کوئی شخص اپنی عورت کو سات مہینے تک چھوڑے رکھے تو کیا حکم ہے؟ انہوں نے فرمایا کہ اس نے جدائی کو بہت طول دے دیا، میں نے کہا کہ کیا ایلاء داخل ہوجائے گا؟ انہوں نے فرمایا کہ کیا اس نے قسم کھائی تھی؟ میں نے کہا نہیں، انہوں نے فرمایا کہ ایلاء قسم کے بغیر نہیں ہوتا۔ [مصنف ابن ابي شيبه/كتاب الطلاق/حدیث: 19690]

حضرت ابراہیم رحمہ اللہ فرماتے ہیں کہ ایلاء صرف قسم کے ساتھ ہی ہوتا ہے۔ [مصنف ابن ابي شيبه/كتاب الطلاق/حدیث: 19691]

حضرت ابراہیم رحمہ اللہ فرماتے ہیں کہ ہر وہ قسم جو جماع سے روک دے اور اس پر چار مہینے گذر جائیں تو ایلاء ہوجاتا ہے۔ [مصنف ابن ابي شيبه/كتاب الطلاق/حدیث: 19692]

حضرت جابر بن زید رحمہ اللہ سے سوال کیا گیا کہ اگر کوئی شخص اپنی بیوی کو چھوڑے رکھے اور چار مہینے گذر جائیں تو کیا حکم ہے؟ انہوں نے فرمایا کہ وہ اس پر حرام نہیں ہوگی، البتہ اگر اس نے اللہ کی قسم کھائی ہو کہ وہ اسے چھوئے گا بھی نہیں اور اس سے صلح نہیں کرے گا، اگر اس نے اس بات پر قسم کھائی ہو اور چار مہینے تک وہ اس سے رجوع نہ کرے تو عورت بائنہ ہوجائے گی، اور یہی ایلاء ہے۔ [مصنف ابن ابي شيبه/كتاب الطلاق/حدیث: 19693]