حضرت شعبی رحمہ اللہ فرماتے ہیں کہ ام ولد باندی کے آقا کے انتقال کرجانے کی صورت میں ام ولد باندی کی عدت ایک حیض ہے۔ اگر تم اس کی عدت تین حیض قرار دیتے ہو تو اس کو آقا کا وارث کیوں نہیں بناتے؟!۔ [مصنف ابن ابي شيبه/كتاب الطلاق/حدیث: 19834]

حضرت عطاء رحمہ اللہ اور حضرت طاؤس رحمہ اللہ فرماتے ہیں کہ ام ولد باندی اور آقا سے ازدواجی تعلقات رکھنے والی باندی کا آقا جب انتقال کرجائے تو اس کی عدت دو مہینے پانچ راتیں ہے۔ [مصنف ابن ابي شيبه/كتاب الطلاق/حدیث: 19835]

حضرت یحییٰ بن سعید رحمہ اللہ کہتے ہیں کہ حضرت قاسم رحمہ اللہ کے سامنے کسی نے تذکرہ کیا کہ عبد الملک بن مروان رحمہ اللہ نے مردوں اور ان کی ایسی بیویوں کے درمیان جدائی کرادی جو اپنے آقاؤں کی ام ولد تھیں۔ لیکن ایک یا دو حیضوں کے بعد ان کے نکاح کرادیئے گئے تھے۔ عبدالملک بن مروان رحمہ اللہ کا حکم تھا کہ وہ چار مہینے دس دن کی عدت گزاریں۔ یہ سن کر حضرت قاسم رحمہ اللہ نے فرمایا سبحان اللہ! اللہ تعالیٰ تو قرآن مجید میں فرماتے ہیں { وَالَّذِینَ یُتَوَفَّوْنَ مِنْکُمْ وَیَذَرُونَ أَزْوَاجًا } تو کیا یہ آقا ان کے خاوند ہیں؟ [مصنف ابن ابي شيبه/كتاب الطلاق/حدیث: 19836]

حضرت یحییٰ بن ابی کثیر رحمہ اللہ فرماتے ہیں کہ حضرت عمرو بن عاص رضی اللہ عنہ نے اس ام ولد کو جسے آزا د کیا گیا تھا حکم دیا کہ وہ تین حیض عدت کے گزارے اور حضرت عمر رضی اللہ عنہ کو یہی فیصلہ لکھ کر بھیجا۔ حضرت عمر رضی اللہ عنہ نے ان کی رائے کو پسند فرمایا۔ [مصنف ابن ابي شيبه/كتاب الطلاق/حدیث: 19837]

حضرت حسن رحمہ اللہ فرمایا کرتے تھے کہ جب ام ولد کو آزاد کیا گیا تو اس کی عدت تین حیض ہے۔ [مصنف ابن ابي شيبه/كتاب الطلاق/حدیث: 19838]

حضرت ابراہیم رحمہ اللہ فرماتے ہیں کہ ام ولد کو آزاد کرے یا اسے چھوڑ کر مرجائے تو اس کی عدت تین حیض ہے۔ [مصنف ابن ابي شيبه/كتاب الطلاق/حدیث: 19839]

حضرت مکحول رحمہ اللہ فرماتے ہیں کہ اگر آدمی اپنی ام ولد کو آزاد کردے تو اس کی عدت دو حیض ہے۔ [مصنف ابن ابي شيبه/كتاب الطلاق/حدیث: 19840]

اور حضرت زہری رحمہ اللہ فرماتے ہیں کہ اس کی عدت تین قروء ہے۔ [مصنف ابن ابي شيبه/كتاب الطلاق/حدیث: 19841]

حضرت جابر بن زید رحمہ اللہ سے سوال کیا گیا کہ جب ایک آدمی تندرستی کی حالت میں اپنی ایسی باندی کو آزاد کرے جس سے اس کے ازدواجی تعلقات تھے (تو اس کی عدت کیا ہے)؟ انہوں نے فرمایا کہ اگر اسے حیض آتا ہو تو تین قروء عدت گزارے گی اور اگر اسے حیض نہ آتا ہو تو تین مہینے عدت گزارے گی، اگر کوئی دوسرا اس سے نکاح کرے۔ [مصنف ابن ابي شيبه/كتاب الطلاق/حدیث: 19842]

حضرت ابن عمر رضی اللہ عنہما فرماتے ہیں کہ ام ولد کی عدت ایک حیض ہے خواہ اسے آزاد کیا جائے یا آقا مرجائے۔ [مصنف ابن ابي شيبه/كتاب الطلاق/حدیث: 19843]