اور حضرت علی رضی اللہ عنہ فرماتے ہیں کہ اس کے اور اس کے خاوند کے درمیان جدائی کرا دی جائے گی۔ وہ پہلی عدت کو پورا کرے گی اور اس خاوند سے نئی عدت گزارے گی۔ اس کی شرمگاہ کو حلال کرنے کے بدلے اسے مہر ملے گا اور وہ دونوں اسے پیام نکاح بھیج سکتے ہیں۔ [مصنف ابن ابي شيبه/كتاب الطلاق/حدیث: 19874]

حضرت شعبی رحمہ اللہ فرماتے ہیں کہ اگر کوئی عورت عدت میں شادی کرلے اور پھر میاں بیوی کے درمیان جدائی کرادی جائے تو تین حیضوں سے نئے سرے سے عدت پوری کرے گی اور پہلے خاوند کی باقی ماندہ عدت کو بھی پورا کرے گی۔ [مصنف ابن ابي شيبه/كتاب الطلاق/حدیث: 19875]

اور ابراہیم رحمہ اللہ فرماتے ہیں کہ وہ پہلے خاوند کی باقی ماندہ عدت کو پورا کرے گی اور پھر نئے سرے سے تین حیض پورے کرے گی۔ [مصنف ابن ابي شيبه/كتاب الطلاق/حدیث: 19876]

حضرت حکم رحمہ اللہ فرماتے ہیں کہ ان دونوں کے درمیان جدائی کرادی جائے گی۔ عورت پہلی عدت کو پورا کرے گی پھر دوسرے پانی کی عدت شروع کرے گی۔ اس کو دوسرے خاوند سے مہر بھی ملے گا۔ جب عدت پوری ہوجائے تو چاہے تو اس دوسرے مرد سے شادی کرلے اور چاہے تو کسی اور سے شادی کرلے۔ [مصنف ابن ابي شيبه/كتاب الطلاق/حدیث: 19877]

حضرت علی رضی اللہ عنہ فرماتے ہیں کہ اگر کوئی آدمی کسی ایسی عورت سے شادی کرے جس کا کسی اور سے بچہ ہو، پھر وہ بچہ فوت ہوجائے تو مرد اس وقت تک عورت کے قریب نہیں آسکتا جب تک اس کے پیٹ کی صورت حال واضح نہ ہوجائے یا جب تک اسے ایک حیض نہ آجائے۔ [مصنف ابن ابي شيبه/كتاب الطلاق/حدیث: 19878]

حضرت عمر رضی اللہ عنہ فرماتے ہیں کہ اس وقت تک اس کے قریب نہ جائے جب تک یہ بات واضح نہ ہوجائے کہ وہ حاملہ ہے یا نہیں ہے۔ [مصنف ابن ابي شيبه/كتاب الطلاق/حدیث: 19879]

حضرت حسن بن علی رضی اللہ عنہ فرماتے ہیں کہ وہ اس وقت تک اس کے قریب نہ جائے جب تک وہ عدت نہ گزار لے یا اسے حیض نہ آجائے۔ [مصنف ابن ابي شيبه/كتاب الطلاق/حدیث: 19880]

حضرت حسن بن علی رضی اللہ عنہ نے ایک جنازہ پڑھایا اور پھر خاوند سے فرمایا (جب کہ عورت کا کسی دوسرے مرد سے بچہ تھا) تیرے لئے یہ بات درست نہیں کہ تو کسی دوسرے کے حصے پر قبضہ جمائے۔ [مصنف ابن ابي شيبه/كتاب الطلاق/حدیث: 19881]

ابراہیم رحمہ اللہ اور حضرت عمارہ رحمہ اللہ فرماتے ہیں کہ وہ اس وقت تک اس کے قریب نہ جائے جب تک حمل کا ہونا اور نہ ہونا ظاہر نہ ہوجائے۔ [مصنف ابن ابي شيبه/كتاب الطلاق/حدیث: 19882]

حضرت ابراہیم رحمہ اللہ فرماتے ہیں کہ وہ اس وقت تک اس کے قریب نہ جائے جب تک اسے حیض نہ آجائے۔ [مصنف ابن ابي شيبه/كتاب الطلاق/حدیث: 19883]