حضرت قتادہ رحمہ اللہ فرماتے ہیں کہ حضرت عکرمہ رحمہ اللہ نے فرمایا کہ جب اس نے ایک بچے کو جنم دے دیا تو وہ بائنہ ہوگئی۔ ان سے سوال کیا گیا کہ کیا اب وہ شادی کرسکتی ہے؟ انہوں نے فرمایا نہیں۔ [مصنف ابن ابي شيبه/كتاب الطلاق/حدیث: 19914]

حضرت قتادہ رحمہ اللہ فرماتے ہیں کہ بندہ (حضرت عکرمہ) دلیل میں مغلوب ہوگیا۔ [مصنف ابن ابي شيبه/كتاب الطلاق/حدیث: 19915]

حضرت ابراہیم رحمہ اللہ فرماتے ہیں کہ عورت اپنے خاوند کے گھر میں عدت گزارے گی۔ اور زینت والا سرمہ نہیں لگائے گی۔ [مصنف ابن ابي شيبه/كتاب الطلاق/حدیث: 19916]

حضرت مسروق رحمہ اللہ فرماتے ہیں کہ ایک آدمی حضرت عبداللہ رضی اللہ عنہ کے پاس آیا اور اس نے کہا میں نے اپنی بیوی کو تین طلاقیں دے دی ہیں اور وہ گھر سے جانا چاہتی ہے۔ انہوں نے فرمایا کہ اسے روکے رکھو۔ اس آدمی نے کہا کہ وہ نہیں رکتی۔ انہوں نے فرمایا کہ اس قید کرو۔ اس آدمی نے کہا کہ اس عورت کے بھائی ہیں جو بڑے مضبوط اور توانا ہیں۔ حضرت عبد اللہ رضی اللہ عنہ نے فرمایا کہ امیر کی طرف رجوع کرو۔ [مصنف ابن ابي شيبه/كتاب الطلاق/حدیث: 19917]

حضرت عروہ رحمہ اللہ فرماتے ہیں کہ طلاق یافتہ عورت اپنے اقارب سے ملاقات کرسکتی ہے لیکن وہاں رات نہیں گزار سکتی۔ [مصنف ابن ابي شيبه/كتاب الطلاق/حدیث: 19918]

حضرت سعید بن مسیب رحمہ اللہ فرماتے ہیں کہ جس عورت کو تین طلاقیں دے دی گئی ہوں وہ اپنے خاوند کے گھر سے باہر نہیں نکل سکتی۔ وہ خوشبو بھی صرف طہر میں لگائے جو کہ قسط اور اظفار نامی خوشبو میں سے معمولی سی۔ [مصنف ابن ابي شيبه/كتاب الطلاق/حدیث: 19919]

حضرت عبد الرحمن بن نضلہ رحمہ اللہ فرماتے ہیں کہ میں نے اپنی چچا زادبہن کو تین طلاقیں دے دیں پھر میں حضرت سعید بن مسیب رحمہ اللہ کے پاس آیا کہ ان سے اس بارے میں سوال کروں۔ انہوں نے فرمایا کہ وہاں اپنے خاوند کے گھر میں عدت گزارے گی جہاں اسے طلاق دی گئی۔ [مصنف ابن ابي شيبه/كتاب الطلاق/حدیث: 19920]

وہ کہتے ہیں کہ میں نے اس بارے میں حضرت قاسم، سالم، ابوبکر بن عبد الرحمن بن حارث، خارجہ بن زید اور سلیمان بن یسار رحمہم اللہ سے سوال کیا تو ان سب نے وہی بات کی جو حضرت سعید بن مسیب رحمہ اللہ نے فرمائی تھی۔ [مصنف ابن ابي شيبه/كتاب الطلاق/حدیث: 19921]

حضرت زہری فرماتے ہیں کہ جس عورت کو تین طلاقیں دی گئی ہوں یا اس کا خاوند انتقال کرگیا ہو وہ اپنے خاوند کے گھر میں عدت گزاریں گی اور سوگ منائیں گی (یعنی زیب و زینت سے پرہیز کریں گی)۔ [مصنف ابن ابي شيبه/كتاب الطلاق/حدیث: 19922]

حضرت قاسم رحمہ اللہ فرماتے ہیں کہ یحییٰ بن سعید بن عاص رحمہ اللہ نے اپنی بیوی (بنت عبد الرحمن بن حکم رحمہ اللہ) کو طلاق دی۔ وہ اپنے گھر والوں کے پاس چلی گئیں۔ اس پر حضرت عائشہ رضی اللہ عنہا نے مروان کے پاس پیغام بھیجا کہ اللہ سے ڈرو اور عورت کو اس کے خاوند کے گھر واپس بھیج دو۔ مروان نے کہا کہ عبد الرحمن رحمہ اللہ مجھ پر غالب آگئے ہیں۔ [مصنف ابن ابي شيبه/كتاب الطلاق/حدیث: 19923]