حضرت ابن عمر رضی اللہ عنہما نے فرمایا کہ جس عورت کا خاوند انتقال کرجائے وہ چار مہینے دس دن عدت گزارے گی۔ ایک آدمی نے کہا کہ یہ بہت زیادہ ہے۔ حضرت ابن عمر رضی اللہ عنہما نے فرمایا کہ جاہلیت میں عورتیں اس سے بھی زیادہ سوگ منایا کرتی تھیں۔ [مصنف ابن ابي شيبه/كتاب الطلاق/حدیث: 20434]

حضرت ام سلمہ رضی اللہ عنہا، حضرت عائشہ رضی اللہ عنہا اور حضرت حفصہ رضی اللہ عنہا فرماتی ہیں کہ رسول اللہ صلی اللہ علیہ وسلم نے ارشاد فرمایا کہ جو عورت اللہ پر اور آخرت کے دن پر ایمان رکھتی ہو وہ کسی میت پر تین دن سے زیادہ سوگ نہیں مناسکتی، سوائے اپنے خاوند کے، اس پر چار مہینے دس دن تک سوگ منائے گی [مصنف ابن ابي شيبه/كتاب الطلاق/حدیث: 20435]

حضرت حسن رحمہ اللہ سوگ کے قائل نہ تھے۔ [مصنف ابن ابي شيبه/كتاب الطلاق/حدیث: 20436]

حضرت ابی بن کعب رضی اللہ عنہ فرماتے ہیں کہ امانت میں سے یہ بھی ہے کہ عورت کے پاس اس کی شرمگاہ امانت کے طور پر رکھوائی گئی ہے۔ [مصنف ابن ابي شيبه/كتاب الطلاق/حدیث: 20437]

حضرت ابی بن کعب رضی اللہ عنہ فرماتے ہیں کہ امانت داری کی ایک صورت یہ بھی ہے کہ عورت اپنی شرمگاہ کی حفاظت کرے۔ [مصنف ابن ابي شيبه/كتاب الطلاق/حدیث: 20438]

حضرت عبد اللہ بن عمرو رضی اللہ عنہما فرماتے ہیں کہ شرمگاہ امانت ہے۔ [مصنف ابن ابي شيبه/كتاب الطلاق/حدیث: 20439]

حضرت عبید بن عمیر رحمہ اللہ فرماتے ہیں کہ عورت کے پاس اس کی شرمگاہ امانت کے طور پر رکھوائی گئی ہے۔ [مصنف ابن ابي شيبه/كتاب الطلاق/حدیث: 20440]

حضرت سلیمان بن یسار رحمہ اللہ کے سامنے عورتوں کی عدتوں کا تذکرہ کیا گیا تو انہوں نے فرمایا کہ ہمیں یہ حکم نہیں دیا گیا کہ ہم ان کی جانچ پڑتال کریں۔ [مصنف ابن ابي شيبه/كتاب الطلاق/حدیث: 20441]

حضرت عامر رحمہ اللہ فرماتے ہیں کہ ایک عورت جس کے خاوند نے اسے طلاق دے دی تھی، حضرت علی رضی اللہ عنہ کے پاس آئی اور اس کا خیال تھا کہ اسے ایک مہینے میں تین حیض آچکے ہیں اور وہ ہر حیض سے پاک ہو کر نماز پڑھ چکی ہے۔ حضرت علی رضی اللہ عنہ نے حضرت شریح رحمہ اللہ کو اس کا فیصلہ کرنے کا حکم دیا۔ انہوں نے فرمایا کہ اگر اس کے رشتہ داروں میں سے دیندار اور امانتدار لوگ گواہی دیں کہ اسے ایک مہینے میں تین حیض آئے ہیں اور یہ ہر حیض سے پاک ہوکر نماز ادا کرتی رہی ہے تو یہ سچی ہے اور اگر وہ گواہی نہ دیں تو یہ جھوٹی ہے۔ حضرت علی رضی اللہ عنہ نے فرمایا: قالون! اور اپنے ہاتھ سے تیس کا اشارہ بنایا، یعنی رومی انداز میں پسندیدگی کا اظہار فرمایا۔ [مصنف ابن ابي شيبه/كتاب الطلاق/حدیث: 20442]

حضرت انس رضی اللہ عنہ فرماتے ہیں کہ حیض کے دن چار، پانچ، چھ، سات، آٹھ، نو اور دس ہوسکتے ہیں پھر غسل کرے اور نماز پڑھے۔ [مصنف ابن ابي شيبه/كتاب الطلاق/حدیث: 20443]