حضرت اوس بن ثریب رحمہ اللہ کہتے ہیں کہ میں نے حاجیوں کو (سواریاں) کرائے پر دیں، پھر مسجد حرام میں داخل ہوا تو مسجد میں حضرت عمر رضی اللہ عنہ اور حضرت جریر رضی اللہ عنہ تھے۔ حضرت عمر رضی اللہ عنہ نے حضرت جریر رضی اللہ عنہ سے پوچھا کہ اے ابو عمرو رضی اللہ عنہ! آپ کا اپنی عورتوں کے ساتھ کیسا رویہ ہے؟ انہوں نے عرض کیا کہ اے امیر المومنین! مجھے ان کی طرف سے بہت سختی کا سامنا ہے۔ میں ان میں سے کسی کے کمرے میں باری کے بغیر داخل نہیں ہوسکتا۔ اگر میں ان میں سے کسی کے بچے کو بھی اس کی ماں کی باری کے علاوہ کسی اور دن چوم لوں تو وہ غصے میں آجاتی ہیں۔ حضرت عمر رضی اللہ عنہ نے فرمایا کہ ان میں بہت سی عورتیں ایسی ہوتی ہیں جو اللہ پر ایمان نہیں رکھتیں اور نہ مومنین کو مانتی ہیں۔ بلکہ اگر تمہیں ان میں سے کسی کی کبھی ضرورت ہو تو وہ تم پر ہی الزام دھریں گی۔ اس پر حضرت عبد اللہ بن مسعود رضی اللہ عنہ نے، جو لوگوں میں موجود تھے، کہا کہ اے امیر المومنین! کیا آپ نہیں جانتے کہ حضرت ابراہیم علیہ السلام نے اللہ تعالیٰ سے حضرت سارہ رضی اللہ عنہا کے اخلاق کی شکایت کی تھی تو ان سے کہا گیا تھا کہ عورت پسلی کی طرح ہے، اگر تم اسے سیدھا کرنا چاہو گے تو توڑ دو گے اور اگر اسے چھوڑ دو گے تو ٹیڑھا کردو گے۔ ان کی عادتوں کے باوجود ان کے ساتھ گزارہ کرو۔ یہ سن کر حضرت عمر رضی اللہ عنہ نے تین مرتبہ حضرت عبد اللہ رضی اللہ عنہ سے فرمایا کہ تمہارے دل میں بہت زیادہ علم ہے۔ بعض راویوں نے، میرا خیال ہے کہ وہ سفیان ہیں، اس میں یہ اضافہ کیا ہے کہ جب تک وہ اس کے دین میں کوئی خرابی نہ دیکھے۔ [مصنف ابن ابي شيبه/كتاب الطلاق/حدیث: 20414]

حضرت ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا کہ عورتوں کے ساتھ بھلائی کرو، عورت کو پسلی سے پیدا کیا گیا ہے، پسلی میں بھی سب سے ٹیڑھا حصہ اوپر والا ہے، اگر تم اسے سیدھا کرنا چاہو گے توتوڑ دو گے۔ اگر تم اسے چھوڑ دو گے تو وہ ٹیڑھی ہی رہے گی۔ عورتوں کے ساتھ بھلائی کرو۔ [مصنف ابن ابي شيبه/كتاب الطلاق/حدیث: 20415]

حضرت نعیم بن حنظلہ رحمہ اللہ فرماتے ہیں کہ حضرت جریر بن عبد اللہ رضی اللہ عنہایک مرتبہ حضرت عمر رضی اللہ عنہ کی خدمت میں حاضر ہوئے اور اپنی بیویوں کی بداخلاقی کی شکایت کی۔ حضرت عمر رضی اللہ عنہ نے فرمایا کہ جس پریشانی کا سامنا تمہیں ہے مجھے بھی ہے۔ میں جب کبھی بازار جاؤں یا لوگوں سے ملوں، کوئی جانور یا کپڑا خریدوں تو کہنے لگتی ہیں کہ یہ بازار لڑکیوں کو دیکھنے جاتا ہے اور انہیں نکاح کا پیام دیتا ہے! یہ سن کر حضرت عبد اللہ بن مسعود رضی اللہ عنہ نے فرمایا کہ کیا آپ نہیں جانتے کہ حضرت ابراہیم علیہ السلام نے حضرت سارہ رضی اللہ عنہا کے اخلاق کی شکایت کی تھی تو اللہ تعالیٰ نے ان کی طرف وحی فرمائی کہ وہ تو پسلی سے ہے، پس پسلی کو لے کر اسے سیدھا کرو، اگر سیدھی ہوجائے تو ٹھیک، ورنہ اس کی عادتوں کے باوجود اس کے ساتھ گزارہ کرو۔ [مصنف ابن ابي شيبه/كتاب الطلاق/حدیث: 20416]

حضرت مغیرہ رحمہ اللہ کہتے ہیں کہ میں نے حضرت ابراہیم رحمہ اللہ سے سوال کیا کہ اگر نامکمل بچہ پیدا ہوجائے تو کیا عدت مکمل ہوجائے گی؟ انہوں نے فرمایا کہ ہاں عدت مکمل ہوجائے گی۔ [مصنف ابن ابي شيبه/كتاب الطلاق/حدیث: 20417]

حضرت عامر رحمہ اللہ فرماتے ہیں کہ نامکمل بچہ پورے بچے کے حکم میں ہے۔ [مصنف ابن ابي شيبه/كتاب الطلاق/حدیث: 20418]

حضرت حسن رحمہ اللہ اور محمد رحمہ اللہ فرماتے ہیں کہ جب آزاد عورت نے نامکمل بچے کو جنم دیا تو اس کی عدت مکمل ہوگئی۔ [مصنف ابن ابي شيبه/كتاب الطلاق/حدیث: 20419]

حضرت شریح رحمہ اللہ فرماتے ہیں کہ جب عورت نے نامکمل بچے کو جنم دیا تو آزاد عورت کی عدت مکمل ہوگئی اور باندی آزاد ہوگئی۔ [مصنف ابن ابي شيبه/كتاب الطلاق/حدیث: 20420]

حضرت حارث رحمہ اللہ طلاق یافتہ اور بیوہ عورت کے بارے میں فرماتے ہیں کہ اگر وہ بچے کو اس کی خلقت مکمل ہونے سے پہلے جنم دے دے تو اگر اس میں سے کچھ ظاہر ہوچکا ہو تو وہ خاوند کے لئے حلال ہوگئی۔ [مصنف ابن ابي شيبه/كتاب الطلاق/حدیث: 20421]

راوی کہتے ہیں کہ ابن شبرمہ رحمہ اللہ فرماتے ہیں کہ (عدت اس وقت تک مکمل نہیں ہوگی) جب تک یہ واضح نہ ہوجائے اور پہچان نہ لیا جائے کہ یہ بچہ ہے۔ [مصنف ابن ابي شيبه/كتاب الطلاق/حدیث: 20422]

حضرت حسن رحمہ اللہ فرماتے ہیں کہ جب عورت نے بچے کو جما ہوا خون یالوتھڑا ہونے کی حالت میں جنم دیا بعد اس کے کہ حمل ہونا معلوم ہوچکا تھا تو اس میں غرہ ہے۔ اور اس سے عدت پوری ہوجائے گی اور اگر ام ولد ہو توآزاد ہوجائے گی۔ [مصنف ابن ابي شيبه/كتاب الطلاق/حدیث: 20423]