حضرت قتادہ رحمہ اللہ فرماتے ہیں کہ حضرت عمر رضی اللہ عنہ نے ایک عورت سے شادی کی، وہ سفید بالوں والی نکلی تو آپ نے اسے طلاق دے دی۔ [مصنف ابن ابي شيبه/كتاب الطلاق/حدیث: 20394]

حضرت قیس بن ابی حازم رحمہ اللہ کہتے ہیں کہ حضرت خالد بن ولید رضی اللہ عنہ نے اپنی بیوی کو طلاق دی، پھر فرمایا کہ میں نے اسے کسی برائی کی وجہ سے طلاق نہیں دے۔ بلکہ اسے میرے پاس کوئی آزمائش نہیں پہنچی۔ [مصنف ابن ابي شيبه/كتاب الطلاق/حدیث: 20395]

حضرت محمد بن کعب، حضرت عبد اللہ بن عبیدہ رحمہ اللہ اور حضرت عمر بن حکم رحمہ اللہ فرماتے ہیں کہ نبی پاک صلی اللہ علیہ وسلم نے بنو جون کی ایک عورت سے شادی کی، پھر اسے طلاق دے دی۔ یہ وہی عورت تھی جس نے حضور صلی اللہ علیہ وسلم سے پناہ مانگی تھی۔ [مصنف ابن ابي شيبه/كتاب الطلاق/حدیث: 20396]

حضرت ام سعید رحمہا اللہ جو کہ حضر ت علی رضی اللہ عنہ کی باندی تھیں فرماتی ہیں کہ ایک دن حضرت علی رضی اللہ عنہ نے ان سے فرمایا کہ اے ام سعید! میرا دل چاہتا ہے کہ میں دولہا بنوں۔ اس وقت ان کے نکاح میں چار عورتیں تھیں۔ میں نے ان سے کہا کہ ایک کو طلاق دے دیجئے اور شادی کر لیجیے۔ انہوں نے فرمایا کہ طلاق براکام ہے مجھے پسند نہیں۔ [مصنف ابن ابي شيبه/كتاب الطلاق/حدیث: 20397]

حضرت حسن رحمہ اللہ سے روایت ہے کہ رسول اللہ صلی اللہ علیہ وسلم نے ارشاد فرمایا کہ خلع اور طلاق طلب کرنے والی عورتیں ہی دراصل منافق عورتیں ہیں۔ [مصنف ابن ابي شيبه/كتاب الطلاق/حدیث: 20398]

حضرت ابو قلابہ رحمہ اللہ سے روایت ہے کہ رسول اللہ صلی اللہ علیہ وسلم نے ارشاد فرمایا کہ جو عورت بغیر کسی پریشانی کے اپنے خاوند سے طلاق طلب کرے وہ جنت کی خوشبو بھی نہیں سونگھے گی۔ [مصنف ابن ابي شيبه/كتاب الطلاق/حدیث: 20399]

حضرت ثوبان سے ایک اور سند سے یونہی منقول ہے۔ [مصنف ابن ابي شيبه/كتاب الطلاق/حدیث: 20400]

حضرت ابو عبداللہ شقری رحمہ اللہ فرماتے ہیں کہ ایک عورت نے اپنے خاوند سے خلع طلب کی تو ابراہیم رحمہ اللہ نے فرمایا کہ قیامت کے دن اللہ تعالیٰ کے دربار میں وہ تجھ سے جھگڑا کرے گی۔ [مصنف ابن ابي شيبه/كتاب الطلاق/حدیث: 20401]

حضرت عمر بن خطاب رضی اللہ عنہ فرماتے ہیں کہ جب عورتیں خلع طلب کریں تو انہیں خاوند کی ناشکری پر مت ڈالو۔ [مصنف ابن ابي شيبه/كتاب الطلاق/حدیث: 20402]

حضرت عمر رضی اللہ عنہ فرماتے ہیں کہ لڑکیوں کو بدشکل مرد سے شادی کرنے پر مجبور نہ کرو، کیونکہ جو تم پسند کرتے ہو اسے وہ بھی پسند کرتی ہیں۔ [مصنف ابن ابي شيبه/كتاب الطلاق/حدیث: 20403]