حضرت ابن سیرین فرماتے ہیں تولیہ بیع ہے۔ [مصنف ابن ابي شيبه/كتاب البيوع والأقضية/حدیث: 22636]

حضرت زہری فرماتے ہیں تولیہ بیع ہے۔ [مصنف ابن ابي شيبه/كتاب البيوع والأقضية/حدیث: 22637]

حضرت محمد رحمہ اللہ فرماتے ہیں تولیہ بھی بیع ہے۔ [مصنف ابن ابي شيبه/كتاب البيوع والأقضية/حدیث: 22638]

ایک شخص نے اجرت طے کر کے بھگوڑے غلام کو پکڑ لیا تاکہ اس کے آقا کو واپس کرسکے، وہ غلام اس کے پاس سے بھی بھاگ گیا، وہ دونوں جھگڑتے ہوئے حضرت شریح کے پاس آئے، آپ نے اس شخص کو ضامن بنادیا، جب حضرت علی رضی اللہ عنہ کو اس فیصلہ کی اطلاع ہوئی تو آپ نے فرمایا قاضی نے غلطی کی، وہ اس سے قسم اٹھواتا کہ وہ اس سے بھاگ گیا ہے اور اس پر ضمان نہیں۔ [مصنف ابن ابي شيبه/كتاب البيوع والأقضية/حدیث: 22639]

حضرت شعبی رحمہ اللہ فرماتے ہیں کہ اگر کوئی شخص بھگوڑا واپس کرنے کے لئے پکڑے اور وہ غلام اس کے پاس سے بھی بھاگ جائے تو اس پر کچھ بھی لازم نہیں ہے۔ [مصنف ابن ابي شيبه/كتاب البيوع والأقضية/حدیث: 22640]

حضرت حسن رحمہ اللہ فرماتے ہیں کہ اس پر کچھ بھی لازم نہیں ہے۔ [مصنف ابن ابي شيبه/كتاب البيوع والأقضية/حدیث: 22641]

حضرت شریح رحمہ اللہ سے مروی ہے کہ ایک شخص نے بھگوڑا غلام پکڑا تو وہ اس کے پاس بھی بھاگ گیا، غلام کا آقا آیا اور دونوں کا مقدمہ حضرت شریح کے پاس آیا، آپ نے فرمایا: غلام اس سے پہلے ہی تیرے پاس سے بھاگا تھا لہٰذا اس پر کچھ بھی لازم نہیں ہے۔ [مصنف ابن ابي شيبه/كتاب البيوع والأقضية/حدیث: 22642]

حضرت ابن جریج رحمہ اللہ فرماتے ہیں کہ حضرت ابن ابی ملیکۃ نے مجھ سے فرمایا اگر بھگوڑا غلام اس کے پاس سے بھی بھاگ جائے تو اس پر کچھ لازم نہیں ہے۔ [مصنف ابن ابي شيبه/كتاب البيوع والأقضية/حدیث: 22643]

حضرت قتادہ، حضرت ابو ہاشم اور منصور رحمہ اللہ فرماتے ہیں کہ جس نے بھگوڑے غلام کو پکڑا ہے اس سے بھی غلام اگر بھاگ جائے تو اس پر کچھ لازم نہیں۔ [مصنف ابن ابي شيبه/كتاب البيوع والأقضية/حدیث: 22644]

حضرت حکم سے مروی ہے کہ نبی کریم صلی اللہ علیہ وسلم کے زمانہ میں حضرت عثمان رضی اللہ عنہ کے لئے کھانے کا سامان آیا تو آپ صلی اللہ علیہ وسلم نے ارشاد فرمایا: چلو ہمارے ساتھ حضرت عثمان رضی اللہ عنہ کے پاس تاکہ کھانے کا سامان فروخت کرنے میں ہم ان کی مدد کریں۔ آپ صلی اللہ علیہ وسلم ان کے پہلو میں کھڑے ہوگئے، حضرت عثمان رضی اللہ عنہ فرما رہے تھے کہ اس بوری میں اتنا اتنا ہے اور میں اس کو اتنے اتنے میں فروخت کروں گا، آپ صلی اللہ علیہ وسلم نے ارشاد فرمایا: جب تم نام لے کر متعین کردو تو کیل کردیا کرو۔ [مصنف ابن ابي شيبه/كتاب البيوع والأقضية/حدیث: 22645]