حضرت زید بن ثابت رضی اللہ عنہ ان لوگوں کو منع فرمایا کرتے تھے جو جار (بندرگاہ) کے غلے کی پرچیاں خریدتے تھے، یہاں تک کہ وہ ان کو پورا وصول کرلیں (اور وہ اس پر قبضہ کرلیں)۔ [مصنف ابن ابي شيبه/كتاب البيوع والأقضية/حدیث: 22666]

حضرت ابن عباس رضی اللہ عنہما سے مروی ہے کہ نبی کریم صلی اللہ علیہ وسلم نے ارشاد فرمایا: جو شخص طعام خریدے وہ اس کو کیل کرنے سے قبل آگے فروخت نہ کرے، راوی رحمہ اللہ فرماتے ہیں کہ میں نے حضرت ابن عباس رضی اللہ عنہما سے دریافت کیا کہ ایسا کیوں ہے؟ آپ رضی اللہ عنہ نے فرمایا کیا آپ نہیں دیکھتے کہ وہ لوگ سونے کے بدلے اس طرح خریدتے ہیں (فروخت کرتے ہیں) کہ طعام مؤخر ہوتا ہے۔ [مصنف ابن ابي شيبه/كتاب البيوع والأقضية/حدیث: 22667]

حضرت ابوہریرہ رضی اللہ عنہ سے مروی ہے کہ نبی کریم صلی اللہ علیہ وسلم نے ارشاد فرمایا: جو شخص طعام خریدے وہ کیل کرنے سے قبل اس کو آگے فروخت نہ کرے۔ [مصنف ابن ابي شيبه/كتاب البيوع والأقضية/حدیث: 22668]

حضرت علی رضی اللہ عنہ سے مروی ہے کہ قرآن پاک کی آیت { وَآتُوہُمْ مِنْ مَالِ اللہِ الَّذِی آتَاکُمْ } سے مراد پہلی قسط میں ربع چھوڑ دو۔ [مصنف ابن ابي شيبه/كتاب البيوع والأقضية/حدیث: 22669]

حضرت ابن عمر رضی اللہ عنہما سے مروی ہے کہ وہ اس بات کو ناپسند فرماتے تھے کہ آدمی اپنے مکاتب سے آخری قسط سے پہلے بدل کتابت میں کچھ کمی کرے، اس اندیشہ سے کہ وہ عاجز ہوجائے۔ [مصنف ابن ابي شيبه/كتاب البيوع والأقضية/حدیث: 22670]

حضرت ابن سیرین رحمہ اللہ اس بات کو پسند فرماتے تھے کہ جب مکاتب ہو تو بدل کتابت کی تحریر میں لکھا جائے کہ میں تیری آخری قسط میں کمی کر دوں گا۔ [مصنف ابن ابي شيبه/كتاب البيوع والأقضية/حدیث: 22671]

حضرت مجاہد رحمہ اللہ فرماتے ہیں کہ مکاتب کو تم اس کے پورے بدل کتابت کا ربع دو گے، اور یہ اپنے مال میں سے جلدی ادا کرو گے۔ [مصنف ابن ابي شيبه/كتاب البيوع والأقضية/حدیث: 22672]

حضرت ابن عباس رضی اللہ عنہما سے مروی ہے کہ حضرت عمر رضی اللہ عنہ نے اپنے غلام کو مکاتب بنایا جس کی کنیت ابو امیہ تھی، جب وہ بدل کتابت کی قسط لے کر حاضر ہوا تو آپ رضی اللہ عنہ نے اس سے فرمایا: اے ابو امیہ! اس سے اپنے بدل کتابت میں مدد حاصل کر، اس نے عرض کیا کہ اے امیر المؤمنین رضی اللہ عنہ! اگر آپ اس کو آخری قسط تک رہنے دیں (تو بہتر ہے) آپ رضی اللہ عنہ نے فرمایا: مجھے اس بات کا ڈر ہے کہ میں اس وقت کو نہ پا سکوں گا پھر آپ رضی اللہ عنہ نے قرآن پاک کی آیت { وَآتُوہُمْ مِنْ مَالِ اللہِ الَّذِی آتَاکُمْ } تلاوت فرمائی۔ [مصنف ابن ابي شيبه/كتاب البيوع والأقضية/حدیث: 22673]

حضرت عکرمہ رحمہ اللہ فرماتے ہیں کہ یہ بدل کتابت کی پہلی قسط ہے جو اسلام میں ادا کی گئی۔ [مصنف ابن ابي شيبه/كتاب البيوع والأقضية/حدیث: 22674]

حضرت محمد بن سیرین سے مروی ہے کہ وہ حضرات اس کو پسند فرماتے تھے کہ مکاتب کے بدل کتابت میں کچھ حصہ چھوڑ دیں۔ [مصنف ابن ابي شيبه/كتاب البيوع والأقضية/حدیث: 22675]