حضرت سعید بن مسیب فرماتے ہیں کہ مدبرہ باندی کو نہ تو اس کا آقا بیچ سکتا ہے، نہ اس کی شادی کراسکتا ہے اور نہ اسے ہبہ کرسکتا ہے، اس کا بچہ اسی کے حکم میں ہوگا۔ [مصنف ابن ابي شيبه/كتاب البيوع والأقضية/حدیث: 21906]

حضرت عثمان بن حکیم فرماتے ہیں کہ میں نے حضرت سالم سے سوال کیا کہ کیا میرے لئے اسے بیچنا جائز ہے؟ انہوں نے فرمایا کہ نہیں، میں نے سوال کیا کہ کیا میں اسے مہر میں دے سکتا ہوں؟ انہوں نے فرمایا نہیں۔ [مصنف ابن ابي شيبه/كتاب البيوع والأقضية/حدیث: 21907]

حضرت شعبی فرماتے ہیں کہ مدبر غلام عام غلام کی طرح ہے، سوائے اس کے کہ اسے بیچا نہیں جاسکتا اور نہ ہی اسے ہبہ کیا جاسکتا ہے، جب اس کا آقا مرجائے تو وہ آزاد ہوجائے گا۔ [مصنف ابن ابي شيبه/كتاب البيوع والأقضية/حدیث: 21908]

حسن نے مدبر غلام کی بیع کو مکروہ قرار دیا ہے، البتہ اگر اس کے مالک کو شدید فقر لاحق ہوجائے تو پھر اسے بیچا جاسکتا ہے۔ [مصنف ابن ابي شيبه/كتاب البيوع والأقضية/حدیث: 21909]

محمد نے مدبر غلام کی بیع کو مکروہ قرار دیا ہے، البتہ خود اسی غلام کے ہاتھ بیچنا اس سے مستثنیٰ ہے۔ [مصنف ابن ابي شيبه/كتاب البيوع والأقضية/حدیث: 21910]

محمد فرماتے ہیں کہ مدبر غلام کو نہیں بیچا جاسکتا البتہ خود اسی کے ہاتھ بیچا جاسکتا ہے۔ [مصنف ابن ابي شيبه/كتاب البيوع والأقضية/حدیث: 21911]

حضرت عطاء فرماتے ہیں کہ اس کو بیچ نہیں سکتا البتہ اگر اس کی قیمت کی احتیاج ہو تو بیچ سکتا ہے۔ [مصنف ابن ابي شيبه/كتاب البيوع والأقضية/حدیث: 21912]

حضرت جابر فرماتے ہیں کہ رسول اللہ صلی اللہ علیہ وسلم نے ایک مدبر غلام کو فروخت فرمایا تھا۔ [مصنف ابن ابي شيبه/كتاب البيوع والأقضية/حدیث: 21913]

حضرت جابر فرماتے ہیں کہ ایک آدمی نے اپنے ایک غلام کو مدبر بنایا تو رسول اللہ صلی اللہ علیہ وسلم نے اسے ابن نحام کے ہاتھ فروخت فرمادیا۔ وہ ایک قبطی غلام تھا جس کا انتقال گزشتہ سال حضرت ابن زبیر رضی اللہ عنہ کی امارت میں ہوا۔ [مصنف ابن ابي شيبه/كتاب البيوع والأقضية/حدیث: 21914]

حضرت ابن عمر رضی اللہ عنہما نے مدبر کی بیع کو مکروہ قرار دیا۔ [مصنف ابن ابي شيبه/كتاب البيوع والأقضية/حدیث: 21915]