حضرت عمر بن ذر فرماتے ہیں کہ حضرت قاسم بن عبد الرحمن آدمی سے اس بات پر قسم لیا کرتے تھے کہ وہ اسے کسی ایسے حق سے نہیں روک رہا جس کے بارے میں اسے علم ہے کہ وہ اس کا ہے۔ [مصنف ابن ابي شيبه/كتاب البيوع والأقضية/حدیث: 22076]

حضرت شعبی یمین مرسلہ کے بارے میں فرماتے ہیں کہ اس کا گناہ اور اس کی نیکی اسی پر ہے جس کا اس نے جان بوجھ کر ارادہ کیا۔ [مصنف ابن ابي شيبه/كتاب البيوع والأقضية/حدیث: 22077]

حضرت عطاء مدینی کہتے ہیں کہ ایک آدمی نے کچھ سامان بیچا، پھر مشتری نے عیب کا دعویٰ کردیا، اور وہ یہ جھگڑا لے کر حضرت عثمان بن عفان رضی اللہ عنہ کے پاس حاضر ہوا، مشتری نے کہا کہ اللہ کی قسم کھاؤ کہ جب تم نے مجھے بیچا تھا تو اس میں کوئی عیب نہیں تھا، بائع نے کہا کہ میں قسم کھاتا ہوں کہ جب میں نے تمہیں یہ چیز بیچی تھی تو مجھے اس میں کسی عیب کا علم نہیں تھا، حضرت عثمان رضی اللہ عنہ نے فرمایا کہ اس آدمی نے تم سے انصاف کیا۔ [مصنف ابن ابي شيبه/كتاب البيوع والأقضية/حدیث: 22078]

حضرت زبیر بن جنادہ کہتے ہیں کہ میں نے حضرت سالم سے ایک بنجر زمین کے بارے میں سوال کیا جو میں نے اس کے اصل مالک سے اس میں تعمیر کرنے کے لئے خریدی تھی، انہوں نے فرمایا کہ اس میں کوئی حرج نہیں، میں نے کہا کہ اس کا خراج ادا کیا جاتا ہے، انہوں نے فرمایا کہ اس میں کوئی حرج نہیں، میں نے کہا کہ کیا میں ذلت کا اقرار کرتا ہوں؟ انہوں نے فرمایا کہ یہ ذلت تو صرف مردوں کے سروں پر ہوتی ہے۔ [مصنف ابن ابي شيبه/كتاب البيوع والأقضية/حدیث: 22079]

حضرت عبد اللہ رضی اللہ عنہ فرماتے ہیں کہ جانوروں کے تھنوں میں دودھ بھر کر انہیں فروخت کرنے سے اجتناب کرو، کیونکہ یہ دھوکہ ہے اور دھوکہ کسی مسلمان کے لئے درست نہیں۔ [مصنف ابن ابي شيبه/كتاب البيوع والأقضية/حدیث: 22080]

حضرت قیس بن ابی حازم فرماتے ہیں کہ کہا جاتا تھا کہ جانوروں کے تھنوں کو بھر کر انہیں فروخت کرنا دھوکا ہے۔ [مصنف ابن ابي شيبه/كتاب البيوع والأقضية/حدیث: 22081]

حضرت ابن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا کہ شہر کے باہر سے آنے والے تجارتی قافلے کو شہر کے باہر جا کر نہ ملو اور جانوروں کے تھنوں کو دودھ سے بھر کر فروخت نہ کرو۔ [مصنف ابن ابي شيبه/كتاب البيوع والأقضية/حدیث: 22082]

حضرت ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا کہ جب تم اونٹنی یا بکری کو بیچو تو اس کے تھنوں میں دودھ روک کر مت بیچو۔ [مصنف ابن ابي شيبه/كتاب البيوع والأقضية/حدیث: 22083]

حضرت عبد اللہ رضی اللہ عنہ سے روایت ہے کہ صاد ق ومصدوق رسول اللہ صلی اللہ علیہ وسلم نے ارشاد فرمایا کہ جانوروں کے تھنوں میں دودھ روک کرا سے فروخت کرنا دھوکا ہے اور دھوکہ دینا مسلمان کے لئے حلال نہیں۔ [مصنف ابن ابي شيبه/كتاب البيوع والأقضية/حدیث: 22084]

حضرت ابن عباس رضی اللہ عنہما فرماتے ہیں کہ بچے کے لئے خریدو فروخت کرنا اور غلام کو آزاد کرنا درست نہیں۔ [مصنف ابن ابي شيبه/كتاب البيوع والأقضية/حدیث: 22085]