حضرت ابو حجیر سے روایت ہے، وہ کہتے ہیں کہ حضرت ضحاک نے ہمیں پختہ عصیر کی نبیذ پلائی تھی۔ [مصنف ابن ابي شيبه/كتاب الأشربة/حدیث: 25619]

حضرت ابن عون سے روایت ہے، وہ کہتے ہیں کہ حضرت محمد سے کچلی ہوئی نیم پختہ کھجوروں کی علیحدہ نبیذ کے بارے میں سوال کیا گیا تو انہوں نے فرمایا: مجھے معلوم نہیں ہے کہ وہ کیا ہے۔ [مصنف ابن ابي شيبه/كتاب الأشربة/حدیث: 25620]

حضرت ابو مصعب مدنی سے روایت ہے، وہ کہتے ہیں کہ میں نے حضرت ابوہریرہ کو یہ کہتے ہوئے سُنا، ہم لوگ نیم پختہ کھجوریں لیتے اور ان کو کچل لیتے پھر ہم اس کو پیتے تھے۔ [مصنف ابن ابي شيبه/كتاب الأشربة/حدیث: 25621]

حضرت عکرمہ سے روایت ہے کہ جناب رسول اللہ صلی اللہ علیہ وآلہ وسلم نے مسجد فضیخ کے پاس فضیخ (کھجور کچل کر بنائی گئی نبیذ) نوش فرمائی تھی۔ [مصنف ابن ابي شيبه/كتاب الأشربة/حدیث: 25622]

حضرت قتادہ، جناب سعید بن مسیب اور جناب حسن کے بارے میں روایت کرتے ہیں کہ انہوں نے فرمایا کہ کھجور کے خوشے کو اس میں موجود تمام کھجوروں سمیت کچل کر نبیذ بنانے میں کچھ حرج نہیں۔ [مصنف ابن ابي شيبه/كتاب الأشربة/حدیث: 25623]

حضرت مسحاج سے روایت ہے، وہ کہتے ہیں کہ میں نے حضرت انس کو کہتے سُنا جبکہ وہ اپنے خادم کو اس بات کا حکم دے رہے تھے کہ وہ پختہ کھجوروں کو نیم پختہ کھجوروں سے کاٹ ڈالے اور پھر ا ن میں سے ہر ایک کی علیحدہ نبیذ بنائے۔ [مصنف ابن ابي شيبه/كتاب الأشربة/حدیث: 25624]

حضرت خالد، جناب عکرمہ کے بارے میں روایت کرتے ہیں کہ وہ فضیخ کو ناپسند کرتے تھے اگرچہ خالص فضیخ ہی ہو۔ [مصنف ابن ابي شيبه/كتاب الأشربة/حدیث: 25625]

حضرت سعید بن مسیب سے روایت ہے، وہ کہتے ہیں کہ تذنوب (دُم پکی ہوئی) کھجور میں کوئی حرج نہیں ہے۔ [مصنف ابن ابي شيبه/كتاب الأشربة/حدیث: 25626]

حضرت نعمان بن منذر، جناب حضرت مکحول کے بارے میں روایت کرتے ہیں کہ وہ ایسی چٹنی کو ناپسند سمجھتے تھے، جس میں شراب ڈالی گئی ہو۔ [مصنف ابن ابي شيبه/كتاب الأشربة/حدیث: 25627]

حضرت مکحول، حضرت ابو الدرداء سے ایسی چٹنی کے بارے میں جس میں شراب ڈالی گئی ہو روایت کرتے ہیں کہ انہوں نے ارشاد فرمایا: اس میں کوئی حرج نہیں ہے، اس کو دھوپ اور نمک نے بےاثر کردیا ہے۔ [مصنف ابن ابي شيبه/كتاب الأشربة/حدیث: 25628]