حضرت ابن عمر رضی اللہ عنہما سے روایت ہے، وہ کہتے ہیں کہ جناب رسول اللہ صلی اللہ علیہ وآلہ وسلم نے (دو کھجوروں کے) ملانے سے منع کیا ہے مگر یہ کہ تم اپنے ساتھیوں سے اجازت لے لو۔ [مصنف ابن ابي شيبه/كتاب الأطعمة/حدیث: 26086]

حضرت موسیٰ بن دہقان سے روایت ہے۔ وہ کہتے ہیں کہ میں نے حضرت سالم بن عبد اللہ کو ہتھیلیوں میں کھجوریں بھر کر کھاتے دیکھا ہے۔ [مصنف ابن ابي شيبه/كتاب الأطعمة/حدیث: 26087]

حضرت ابو جحیش، حضرت ابوہریرہ کے بارے میں روایت کرتے ہیں کہ انہوں نے اپنے ساتھیوں کے ساتھ کھجوریں کھائیں تو فرمایا: میں ملا رہا ہوں، تم بھی ملا کر کھاؤ۔ [مصنف ابن ابي شيبه/كتاب الأطعمة/حدیث: 26088]

حضرت حبیبہ بنت عباد، اپنی والدہ سے روایت کرتی ہیں۔ کہتی ہیں کہ میں نے حضرت عائشہ رضی اللہ عنہا سے دو کھجوروں کے ملانے کے بارے میں سوال کیا؟ تو انہوں نے جواب دیا۔ اگر یہ کام حلال ہو تب بھی یہ کمینگی ہے۔ [مصنف ابن ابي شيبه/كتاب الأطعمة/حدیث: 26089]

حضرت عائشہ رضی اللہ عنہا سے روایت ہے۔ وہ کہتی ہیں کہ مجھے جناب نبی کریم صلی اللہ علیہ وآلہ وسلم نے فرمایا: ’ ’ اے عائشہ رضی اللہ عنہا! وہ گھر والے بھوکے ہوتے ہیں جن کے گھر میں کھجور نہ ہو۔“ [مصنف ابن ابي شيبه/كتاب الأطعمة/حدیث: 26090]

ابراہیم سے روایت ہے کہ پہلے لوگ اس بات کو محبوب رکھتے تھے کہ ان کے گھروں سے کھجور ختم نہ ہو۔ [مصنف ابن ابي شيبه/كتاب الأطعمة/حدیث: 26091]

ابراہیم کہتے ہیں: میں اس کی تفسیر بیان کرتا ہوں۔ جب ان لوگوں کے ہاں کوئی داخل ہوتا اور وہ اس کی عزت و اکرام کرنا چاہتے تو اس کو روک لیتے اور جو کچھ قریب موجود ہوتا وہ اس کو پیش کرتے۔ پس اگر وہ اس میں سے کھا لیتا تو اس کا اکرام کرتے اور اگر وہ نہ کھاتا تو یہی ان کی طرف سے کفایت کر جاتا۔ [مصنف ابن ابي شيبه/كتاب الأطعمة/حدیث: 26092]

ابراہیم کہتے ہیں: ایک دوسری صورت یہ تھی کہ کوئی سائل آتا اور گھر والوں کے پاس روٹی نہ ہوتی اور ان کے دل اس بات پر آمادہ نہ ہوتے کہ اس سائل کو آٹے اور گندم میں سے لپ بھر کر دیں تو وہ اس کو ایک، دو کھجوریں وغیرہ دے دیتے۔ پس یہ گھر والوں کی طرف سے کفایت کر جاتی اور سائل کا کام بھی چل جاتا۔ [مصنف ابن ابي شيبه/كتاب الأطعمة/حدیث: 26093]

حضرت انس سے روایت ہے۔ وہ کہتے ہیں کہ میں نے جناب نبی کریم صلی اللہ علیہ وآلہ وسلم کو اس حالت میں کھجوریں کھاتے دیکھا ہے کہ آپ صلی اللہ علیہ وآلہ وسلم نے اپنی پنڈلی اور ران کو ملا کر کھڑا کیا ہوا تھا اور کو لہوں پر بیٹھے ہوئے تھے۔ [مصنف ابن ابي شيبه/كتاب الأطعمة/حدیث: 26094]

حضرت انس بن مالک رضی اللہ عنہ سے روایت ہے، وہ کہتے ہیں کہ جناب رسول اللہ صلی اللہ علیہ وآلہ وسلم نے ارشاد فرمایا: ”یقینا اللہ تعالیٰ بندے سے راضی ہوتے ہیں اس بات پر کہ وہ کوئی لقمہ کھائے تو اس پر اللہ کی تعریف کرے یا پانی کا گھونٹ پیئے تو اس پر اللہ تعالیٰ کی تعریف کرے۔ [مصنف ابن ابي شيبه/كتاب الأطعمة/حدیث: 26095]