حضرت ہشام، اپنے والد سے روایت کرتے ہیں کہ حضرت عمر بن خطاب، بیت الخلاء سے نکلے اور ان کے پاس کھانا لایا گیا تو لوگوں نے کہا: ہم وضو کے لئے پانی منگواتے ہیں۔ حضرت عمر نے فرمایا: میں صرف اپنے دائیں ہاتھ سے کھاتا ہوں اور اپنے بائیں ہاتھ سے استنجا کرتا ہوں۔ چناچہ آپ نے کھانا کھایا درآنحالیکہ آپ نے پانی کو مس بھی نہیں کیا۔ [مصنف ابن ابي شيبه/كتاب الأطعمة/حدیث: 26056]

حضرت سالم بن ابی الجعد روایت کرتے ہیں کہ حضرت ابن مسعود نے ایک آدمی کو اپنے پاس کھانے کے لئے بلایا تو اس نے کہا۔ میں نے تو پیشاب کیا ہے۔ آپ نے فرمایا۔ تم نے اپنے ہاتھ میں توپیشاب نہیں کیا۔ [مصنف ابن ابي شيبه/كتاب الأطعمة/حدیث: 26057]

حضرت سالم بن ابی الجعد، اپنے والد سے روایت کرتے ہیں کہ حضرت عبد اللہ نے ایک شخص کو اپنے کھانے کی طرف بلایا تو اس نے جواب دیا۔ میں پیشاب کر کے آیا ہوں۔ آپ نے فرمایا: تیرا پیشاب تیرے ہاتھ میں تو نہیں ہے۔ [مصنف ابن ابي شيبه/كتاب الأطعمة/حدیث: 26058]

حضرت زہری کے بھتیجے، حضرت محمد بن عبد اللہ کہتے ہیں کہ میری ہمشیرہ نے مجھے بتایا کہ اس نے حضرت زہری کو پانچ انگلیوں سے کھاتے دیکھا۔ تو انہوں نے زہری سے اس کے بارے میں سوال کیا؟ حضرت زہری نے فرمایا: جناب نبی کریم صلی اللہ علیہ وآلہ وسلم بھی پانچ انگلیوں سے کھاتے تھے۔ [مصنف ابن ابي شيبه/كتاب الأطعمة/حدیث: 26059]

حضرت خالد بن ابی بکر سے روایت ہے، وہ کہتے ہیں کہ میں نے حضرت قاسم اور حضرت سالم کو تین انگلیوں سے کھاتے دیکھا ہے۔ [مصنف ابن ابي شيبه/كتاب الأطعمة/حدیث: 26060]

حضرت کعب سے روایت ہے کہ جناب رسول اللہ صلی اللہ علیہ وآلہ وسلم تین انگلیوں سے کھایا کرتے تھے اور ان کو چاٹ بھی لیتے تھے۔ [مصنف ابن ابي شيبه/كتاب الأطعمة/حدیث: 26061]

حضرت مصعب بن سعد، اپنے والد کے بارے میں روایت کرتے ہیں کہ ان کے سینہ میں جب شکایت ہوتی تو ان کے لئے تھوم کا سوپ تیار کرلیا جاتا تھا وہ اس کو تھوڑا تھوڑا پیتے تھے۔ [مصنف ابن ابي شيبه/كتاب الأطعمة/حدیث: 26062]

حضرت نافع سے روایت ہے کہ حضرت ابن عمر رضی اللہ عنہما کے سینہ میں جب شکایت ہوتی تو ان کے لئے تھوم کا سوپ بنایا جاتا تھا جس کو وہ آہستہ آہستہ پیتے تھے۔ [مصنف ابن ابي شيبه/كتاب الأطعمة/حدیث: 26063]

حضرت نعیم بن سلامہ سے روایت ہے، وہ کہتے ہیں کہ میں حضرت عمر بن عبد العزیز کے ہاں گیا تو میں نے ان کو نمک اور زیتون کے تیل کے ساتھ ملا ہوا اُبلا ہوا تھوم کھاتے پایا۔ [مصنف ابن ابي شيبه/كتاب الأطعمة/حدیث: 26064]

حضرت عمران بن حدیر سے روایت ہے، وہ کہتے ہیں کہ حضرت عکرمہ سے اس کے بارے میں سوال ہوا؟ تو انہوں نے فرمایا: ہم اس کو ہفتہ، دو ہفتہ کھاتے ہیں۔ لیکن (پھر) ہم مدینہ سے باہر نکل جاتے ہیں۔ [مصنف ابن ابي شيبه/كتاب الأطعمة/حدیث: 26065]