حضرت عطاء سے روایت ہے، وہ کہتے ہیں کہ جناب رسول اللہ صلی اللہ علیہ وآلہ وسلم کے صحابہ کے پاس جب کھانا لایا جاتا تو وہ اپنے ہاتھوں کو تب تک صاف نہیں کرتے تھے جب تک وہ انگلیاں چاٹ نہیں لیتے تھے۔ [مصنف ابن ابي شيبه/كتاب الأطعمة/حدیث: 26046]

حضرت ابن عیینہ سے روایت ہے۔ کہتے ہیں کہ میں نے حضرت عبید اللہ بن ابی یزید سے کہا: تم حضرت ابن عباس رضی اللہ عنہما کے کھانے میں حاضر ہوتے تھے؟ انہوں نے کہا: ہاں۔ میں نے پوچھا۔ تم نے انہیں کیا عمل کرتے دیکھا؟ حضرت عبید اللہ نے کہا۔ میں نے انہیں اپنی تین انگلیاں چاٹتے ہوئے دیکھا کرتا تھا۔ [مصنف ابن ابي شيبه/كتاب الأطعمة/حدیث: 26047]

حضرت جابر سے روایت ہے کہ جناب نبی کریم صلی اللہ علیہ وآلہ وسلم نے انگلیاں اور پیالہ چاٹنے کا حکم فرمایا: اور ارشاد فرمایا: ”تمہیں یہ بات معلوم نہیں ہے کہ کھانے کے کس حصہ میں برکت ہے۔“ [مصنف ابن ابي شيبه/كتاب الأطعمة/حدیث: 26048]

حضرت جابر سے روایت ہے۔ وہ کہتے ہیں کہ جناب رسول اللہ صلی اللہ علیہ وآلہ وسلم نے فرمایا: ”جب تم میں سے کوئی ایک کھانے سے فارغ ہوجائے تو اسے اپنی انگلیاں چاٹنی چاہیئے۔ کیونکہ وہ نہیں جانتا کہ اس کے کھانے کے کس حصہ میں اس کے لئے برکت ہے۔“ [مصنف ابن ابي شيبه/كتاب الأطعمة/حدیث: 26049]

حضرت مجاہد، حضرت ابن عمر رضی اللہ عنہما کے بارے میں روایت کرتے ہیں کہ جب وہ کھانا کھا چکتے تو اپنی تین انگلیاں چاٹتے تھے۔ اور کہتے تھے کہ جناب رسول اللہ صلی اللہ علیہ وآلہ وسلم نے ارشاد فرمایا ہے۔ ”آدمی کو معلوم نہیں ہے کہ کھانے کے کس حصہ میں برکت ہے۔“ [مصنف ابن ابي شيبه/كتاب الأطعمة/حدیث: 26050]

حضرت جابر سے روایت ہے۔ وہ کہتے ہیں کہ جناب رسول اللہ صلی اللہ علیہ وآلہ وسلم نے ارشاد فرمایا: ”جب تم میں سے کسی کے ہاتھ سے لقمہ گرجائے تو اسے چاہیئے کہ لقمہ پر جو نقصان دہ چیز لگی ہو اس کو صاف کر دے اور لقمہ کو کھالے۔ [مصنف ابن ابي شيبه/كتاب الأطعمة/حدیث: 26051]

حضرت حمید، حضرت انس کے بارے میں روایت کرتے ہیں کہ ان کے ہاتھ سے ایک لقمہ گرگیا تو انہوں نے اس کو تلاش کیا یہاں تک کہ اس کو پالیا پھر فرمایا۔ جناب رسول اللہ صلی اللہ علیہ وآلہ وسلم کا ارشاد ہے: ”جب تم میں سے کسی کا لقمہ گرجائے تو اس کو چاہیے کہ اس پر جو کچھ لگا ہے اس کو دور کر دے پھر اس کو کھالے اور اس کو شیطان کے لئے نہ چھوڑے۔“ [مصنف ابن ابي شيبه/كتاب الأطعمة/حدیث: 26052]

حضرت ابن عباس رضی اللہ عنہما سے روایت ہے، وہ کہتے ہیں کہ جناب رسول اللہ صلی اللہ علیہ وآلہ وسلم نے ارشاد فرمایا: ”جب کھانا رکھا جائے تو تم کھانے کے کناروں سے کھاؤ۔ اور اس کے درمیان کو چھوڑ دو۔ کیونکہ برکت کھانے کے درمیان میں اترتی ہے۔“ [مصنف ابن ابي شيبه/كتاب الأطعمة/حدیث: 26053]

حضرت ابن عباس رضی اللہ عنہما سے روایت ہے۔ وہ کہتے ہیں کہ جب پیالہ (برتن) رکھا جائے تو تم اس کے کناروں سے کھاؤ۔ اور اس کے درمیان کو چھوڑ دو اس لئے کہ پیالہ کے درمیان میں برکت ہے۔ [مصنف ابن ابي شيبه/كتاب الأطعمة/حدیث: 26054]

حضرت سعید بن حویرث سے روایت ہے کہ میں نے ابن عباس رضی اللہ عنہما کو کہتے سُنا کہ ہم جناب نبی کریم صلی اللہ علیہ وآلہ وسلم کے ہاں حاضر تھے کہ آپ صلی اللہ علیہ وآلہ وسلم قضاء حاجت سے واپس تشریف لائے اور آپ صلی اللہ علیہ وآلہ وسلم کے پاس کھانا لایا گیا، تو آپ صلی اللہ علیہ وآلہ وسلم سے کہا گیا۔ آپ نے وضو کیوں نہیں کیا؟ آپ صلی اللہ علیہ وآلہ وسلم نے فرمایا: ”میں نے نماز تو نہیں پڑھنی کہ میں وضو کروں۔“ [مصنف ابن ابي شيبه/كتاب الأطعمة/حدیث: 26055]