حضرت جابر سے روایت ہے وہ کہتے ہیں کہ جناب رسول اللہ صلی اللہ علیہ وآلہ وسلم نے ارشاد فرمایا: ”ایک آدمی کا کھانا، دو آدمیوں کو کفایت کرجاتا ہے اور دو آدمیوں کا کھانا، چار کو کفایت کرجاتا ہے۔“ [مصنف ابن ابي شيبه/كتاب الأطعمة/حدیث: 26146]

حضرت اسماعیل بن ابی خالد، اپنے والد سے روایت کرتے ہیں کہ وہ کہتے ہیں کہ میں ایک آدمی کی خدمت میں حاضر ہوا اور وہ آدمی کھجور کھاتا تھا اور دودھ کا گھونٹ بھرتا تھا۔ اس نے کہا، آؤ بسم اللہ کرو کیونکہ جناب رسول اللہ صلی اللہ علیہ وآلہ وسلم ان دونوں کو پاکیزہ کہا کرتے تھے۔ [مصنف ابن ابي شيبه/كتاب الأطعمة/حدیث: 26147]

حضرت عطاء بن سائب، اپنے والد سے روایت کرتے ہیں وہ کہتے ہیں کہ میں ایک سرد دن میں حضرت علی رضی اللہ عنہ کی خدمت میں حاضر ہوا۔ ان کے ہاتھ میں کوئی مشروب تھا۔ انہوں نے وہ مجھے دے دیا اور فرمایا: پیو! میں نے پوچھا یہ کیا ہے؟ انہوں نے فرمایا: ایک تہائی شہد ہے، ایک تہائی گھی ہے اور ایک تہائی دودھ ہے۔ میں نے عرض کیا میرا دل اس کو نہیں چاہتا۔ انہوں نے فرمایا تم اس کو اگر پی لو گے تو آج پورا دن گرم اور شکم سیر رہو گے۔ [مصنف ابن ابي شيبه/كتاب الأطعمة/حدیث: 26148]

حضرت علاء بن مسیب سے روایت ہے وہ کہتے ہیں کہ میں نے ابراہیم اور حضرت خیثمہ کو شہد کے ساتھ دنبے کی چکتی کھاتے دیکھا۔ [مصنف ابن ابي شيبه/كتاب الأطعمة/حدیث: 26149]

حضرت عبد اللہ بن جعفر سے روایت ہے وہ کہتے ہیں کہ میں نے جناب رسول اللہ صلی اللہ علیہ وآلہ وسلم کو ککڑی کے ساتھ کھجور کھاتے دیکھا۔ [مصنف ابن ابي شيبه/كتاب الأطعمة/حدیث: 26150]

حضرت ہشام، اپنے والد سے روایت کرتے ہیں کہ جناب رسول اللہ صلی اللہ علیہ وآلہ وسلم، کھجور کے ساتھ تربوز کھایا کرتے تھے۔ [مصنف ابن ابي شيبه/كتاب الأطعمة/حدیث: 26151]

حضرت ابو خلدہ سے روایت ہے وہ کہتے ہیں کہ ہم حضرت ابن سیرین کی خدمت میں حاضر ہوئے تو انہوں نے فرمایا: مجھے نہیں معلوم کہ میں تمہیں کیا کھلاؤں گا تم میں سے ہر ایک آدمی کے گھر میں وہ چیز موجود ہے، پھر انہوں نے ہمارے لئے شہد کا چھتا نکالا اور ہمںْ کھلانے لگے۔ [مصنف ابن ابي شيبه/كتاب الأطعمة/حدیث: 26152]

حضرت مجاہد سے روایت ہے وہ کہتے ہیں کہ بندر ”بہیمۃ الانعام“ (چوپائے جانور) میں سے نہیں ہے۔ [مصنف ابن ابي شيبه/كتاب الأطعمة/حدیث: 26153]

حضرت لیث، حضرت مجاہد کے بارے میں روایت کرتے ہیں کہ وہ سیہہ کو ناپسند کرتے تھے۔ [مصنف ابن ابي شيبه/كتاب الأطعمة/حدیث: 26154]

حضرت ابن طاؤس، اپنے والد کے بارے میں روایت کرتے ہیں کہ وہ وبر (خرگوش سے ملتا جلتا ایک چھوٹا جانور) کو کھانے میں کوئی حرج نہیں دیکھتے تھے۔ [مصنف ابن ابي شيبه/كتاب الأطعمة/حدیث: 26155]