حضر ت خالد بن ابی عثمان سے روایت ہے۔ وہ کہتے ہیں کہ میں نے حضرت سعید بن جبیر کو سفید داڑھی والا دیکھا اور میں نے حضرت طاؤس کو سفید داڑھی والا دیکھا۔ [مصنف ابن ابي شيبه/كتاب اللباس/حدیث: 26690]

حضرت حریز، حضرت عبد اللہ بن بسرکے بارے میں روایت کرتے ہیں۔ کہتے ہیں کہ ہم آپ کے پاس حاضر ہوئے۔ جبکہ ہم بچے تھے۔ ہمیں معلوم نہیں تھا کہ ہم ان سے کس چیز کا سوال کریں۔ چناچہ میں نے آپ سے کہا۔ یا ہم میں سے کسی نے آپ سے کہا۔ جناب نبی کریم صلی اللہ علیہ وآلہ وسلم نوجوان تھے یا بوڑھے؟ انہوں نے جواب دیا۔ آپ صلی اللہ علیہ وآلہ وسلم کے نچلے ہونٹ اور ٹھوڑی کے درمیان کے بالوں میں چند بال سفید تھے۔ [مصنف ابن ابي شيبه/كتاب اللباس/حدیث: 26691]

حضرت ابو جحیفہ سے روایت ہے۔ وہ کہتے ہیں کہ میں نے جناب نبی کریم صلی اللہ علیہ وآلہ وسلم کی اس جگہ … یعنی نچلے ہونٹ اور ٹھوڑی کے درمیان …میں کچھ سفیدی دیکھی۔ [مصنف ابن ابي شيبه/كتاب اللباس/حدیث: 26692]

حضرت سدی سے روایت ہے۔ وہ کہتے ہیں کہ میں نے حضرت حسین بن علی رضی اللہ عنہ کو دیکھا اور ان کی زلفیں ان کے عمامہ سے باہر آرہی تھیں۔ [مصنف ابن ابي شيبه/كتاب اللباس/حدیث: 26693]

حضرت مجاہد سے روایت ہے۔ وہ کہتے ہیں کہ حضرت ام ہانی فرماتی ہیں۔ جناب نبی کریم صلی اللہ علیہ وآلہ وسلم مکہ میں اس حالت میں داخل ہوئے کہ آپ صلی اللہ علیہ وآلہ وسلم کی چار مینڈھیاں تھیں۔ [مصنف ابن ابي شيبه/كتاب اللباس/حدیث: 26694]

حضرت ہشام سے روایت ہے۔ وہ کہتے ہیں کہ میں نے حضرت ابن عمر رضی اللہ عنہما اور حضرت جابر کو دیکھا اور ان میں سے ہر ایک کی زلفیں تھیں۔ [مصنف ابن ابي شيبه/كتاب اللباس/حدیث: 26695]

حضرت ہبیرہ سے روایت ہے۔ وہ کہتے ہیں کہ حضرت عبد اللہ کے بال تھے اور وہ ان کو اپنے کانوں پر رکھتے تھے۔ [مصنف ابن ابي شيبه/كتاب اللباس/حدیث: 26696]

حضرت افلح بیان کرتے ہیں۔ کہتے ہیں کہ میں نے حضرت قاسم کی زلفیں دیکھیں ہیں۔ [مصنف ابن ابي شيبه/كتاب اللباس/حدیث: 26697]

حضرت عطاء سے روایت ہے۔ وہ کہتے ہیں کہ حضرت عبید بن عمیر کی دو چوٹیاں تھیں۔ [مصنف ابن ابي شيبه/كتاب اللباس/حدیث: 26698]

حضرت یحییٰ بن عبد اللہ سے روایت ہے۔ وہ کہتے ہیں کہ جناب نبی کریم صلی اللہ علیہ وآلہ وسلم نے حضرت ابو قتادہ سے مزاح کیا۔ فرمایا: ”میں ضرور بالضرور تمہاری زلفیں کاٹ دوں گا۔“ حضرت ابو قتادہ نے فرمایا: آپ کے لئے ان کی جگہ ایک قید ی ہے۔ پھر اس کے بعد آپ صلی اللہ علیہ وآلہ وسلم نے ان سے فرمایا: ”ان کا خیال کرو۔“ چناچہ حضرت ابو قتادہ اس کے بعد زلفوں کے لیے خاص خوشبو بنایا کرتے تھے۔ [مصنف ابن ابي شيبه/كتاب اللباس/حدیث: 26699]