حضرت عائشہ رضی اللہ عنہا فرماتی ہیں کہ میں نے نبی کریم صلی اللہ علیہ وآلہ وسلم کی خدمت میں عرض کیا کہ اے اللہ کے رسول (صلی اللہ علیہ وآلہ وسلم)! میرے سوا آپ صلی اللہ علیہ وآلہ وسلم نے اپنی تمام بیبیوں کی کنیت رکھی ہوئی ہے۔ آپ صلی اللہ علیہ وآلہ وسلم نے فرمایا: تم ام عبد اللہ ہو۔ [مصنف ابن ابي شيبه/ كتاب الأدب/حدیث: 27974]

حضرت حمزہ بن صھیب فرماتے ہیں کہ حضرت عمر نے حضرت صھیب سے فرمایا: کہ تم نے اپنی کنیت ابو یحییٰ کیوں رکھی ہے، حالانکہ تمہارا تو کوئی لڑکا نہیں ہے؟ آپ نے جواب دیا: کہ رسول اللہ صلی اللہ علیہ وآلہ وسلم نے میری کنیت ابو یحییٰ رکھی تھی۔ [مصنف ابن ابي شيبه/ كتاب الأدب/حدیث: 27975]

حضرت انس رضی اللہ عنہ فرماتے ہیں کہ نبی کریم صلی اللہ علیہ وآلہ وسلم ہمارے پاس تشریف لاتے تھے اور میرے چھوٹے بھائی سے فرماتے تھے کہ اے ابو عمیر چڑیا کا کیا ہوا۔ [مصنف ابن ابي شيبه/ كتاب الأدب/حدیث: 27976]

حضرت جابر فرماتے ہیں کہ حضرت عامر نے ارشاد فرمایا: کہ آدمی کا بچہ پیدا ہونے سے قبل ہی کنیت اختیار کرلینا اس میں کوئی حرج نہیں۔ [مصنف ابن ابي شيبه/ كتاب الأدب/حدیث: 27977]

حضرت ابن عمر رضی اللہ عنہما یا حضرت جابر ان دونوں حضرات میں سے کوئی ایک فرماتے ہیں کہ رسول اللہ صلی اللہ علیہ وآلہ وسلم کے کلام میں ٹھہراؤ یا آہستگی ہوتی تھی۔ [مصنف ابن ابي شيبه/ كتاب الأدب/حدیث: 27978]

حضرت عطیہ فرماتے ہیں کہ حضرت ابن عمر رضی اللہ عنہما نے ارشاد فرمایا: زیادہ فصیح کلام شیطان کے منہ کے جھاگ کی طرح ہے۔ [مصنف ابن ابي شيبه/ كتاب الأدب/حدیث: 27979]

حضرت عائشہ رضی اللہ عنہا فرماتی ہیں کہ رسول اللہ صلی اللہ علیہ وآلہ وسلم کا کلام ایسا واضح ہوتا تھا ہر سننے والا اس کو سمجھ جاتا تھا۔ [مصنف ابن ابي شيبه/ كتاب الأدب/حدیث: 27980]

حضرت عبد اللہ بن عمرو رضی اللہ عنہ سے روایت ہے (حضرت نافع فرماتے ہیں کہ میرا خیال ہے انہوں نے اسے مرفوعاً بیان کیا) کہ اللہ رب العزت آدمیوں میں سے اس آدمی سے دشمنی رکھتے ہیں جو زبان ہلا ہلا کر فصیح کلام کرتا ہے گائیوں کے زبان سے چارہ ہلانے کی طرح۔ [مصنف ابن ابي شيبه/ كتاب الأدب/حدیث: 27981]

حضرت عبد الملک بن عمیر فرماتے ہیں کہ ایک آدمی نے کھڑے ہو کر نبی کریم صلی اللہ علیہ وآلہ وسلم کے سامنے کلام کیا یہاں تک کہ اس نے اپنے منہ سے جھاگ نکالا، اس پر نبی کریم صلی اللہ علیہ وآلہ وسلم نے ارشاد فرمایا: تم سیکھو اور منہ پھاڑ کر کلام کرنے سے بچو، اس لیے کہ منہ پھاڑ کر کلام کرنا شیطان کے منہ سے نکلنے والے جھاگ کی طرح ہے۔ [مصنف ابن ابي شيبه/ كتاب الأدب/حدیث: 27982]

حضرت ابو جعفر نے مصیبت میں مبتلا شخص کو اعوذ باللہ سنانا مکروہ قرار دیا ہے۔ [مصنف ابن ابي شيبه/ كتاب الأدب/حدیث: 27983]