حضرت ابن بریدہ فرماتے ہیں کہ حضرت عمر نے ارشاد فرمایا: آدمی نے فارسی نہیں سیکھی مگر یہ کہ وہ دھوکہ باز ہوگیا اور کوئی دھوکہ باز نہیں ہوتا مگر یہ کہ اس کی مروت میں کمی آجاتی ہے۔ [مصنف ابن ابي شيبه/ كتاب الأدب/حدیث: 27964]

حضرت ثور فرماتے ہیں کہ حضرت عطاء نے ارشاد فرمایا: کہ تم لوگ عجمیوں کی زبان مت سیکھو اور ان کی عبادت گاہوں میں داخل مت ہو، اس لیے کہ ان پر اللہ کی ناراضگی اترتی ہے۔ [مصنف ابن ابي شيبه/ كتاب الأدب/حدیث: 27965]

حضرت داؤد بن ابی ھند فرماتے ہیں کہ حضرت محمد بن سعد بن ابو وقاص نے چند لوگوں کو فارسی زبان میں بات کرتے ہوئے سنا تو ارشاد فرمایا: کہ دین حنیف کے بعد یہ مجوسیت کیسی؟ [مصنف ابن ابي شيبه/ كتاب الأدب/حدیث: 27966]

حضرت ابو خلدہ فرماتے ہیں کہ حضرت ابو العالیہ نے مجھ سے فارسی میں بات کی۔ [مصنف ابن ابي شيبه/ كتاب الأدب/حدیث: 27967]

حضرت نھاس بن قھم فرماتے ہیں کہ مکہ مکرمہ کے کسی شیخ نے بیان کیا کہ حضرت ابوہریرہ نے اس دروازے سے اس بازار پر جھانکا اور فرمایا: اے بنو فروخ! سحت وداست۔ [مصنف ابن ابي شيبه/ كتاب الأدب/حدیث: 27968]

حضرت ابوہریرہ فرماتے ہیں کہ نبی کریم صلی اللہ علیہ وآلہ وسلم کے پاس صدقہ کی کھجوریں لائی گئیں تو حضرت حسن بن علی رضی اللہ عنہ نے ایک کھجور لے لی اور منہ میں چبانے لگے۔ اس پر نبی کریم صلی اللہ علیہ وآلہ وسلم نے ان سے فرمایا: کخ کخ۔ نکالو نکالو۔ ہمارے لیے صدقہ حلال نہیں ہے۔ [مصنف ابن ابي شيبه/ كتاب الأدب/حدیث: 27969]

حضر ت منذرثوری فرماتے ہیں کہ کسی آدمی نے حضرت ابن حنفیہ سے پنیر کے بارے میں پوچھا؟ آپ نے فرمایا: اے باندی یہ درہم لے جاؤ اور اس کا پنیر خرید لاؤ، پس وہ اس درہم کا پنیر خرید کرلے آئی۔ [مصنف ابن ابي شيبه/ كتاب الأدب/حدیث: 27970]

حضرت برد فرماتے ہیں کہ حضرت زہری سے پوچھا گیا: کہ آدمی بچہ پیدا ہونے سے پہلے کنت اختیار کرسکتا ہے؟ آپ نے فرمایا: کہ رسول اللہ صلی اللہ علیہ وآلہ وسلم کے بعض صحابہ اولاد ہونے سے پہلے ہی اپنی کنیت اختیار کرلیتے تھے۔ [مصنف ابن ابي شيبه/ كتاب الأدب/حدیث: 27971]

حضرت ابراہیم فرماتے ہیں کہ حضرت علقمہ نے ارشاد فرمایا: کہ حضرت عبد اللہ بن مسعود رضی اللہ عنہ نے میری کنیت ابو شبل رکھی، حالانکہ حضرت علقمہ کی کوئی اولاد نہیں تھی۔ [مصنف ابن ابي شيبه/ كتاب الأدب/حدیث: 27972]

حضرت ابو عوانہ فرماتے ہیں کہ حضرت ھلال بن ابی حمید نے ارشاد فرمایا: کہ حضرت عروہ نے میرے ہاں بچہ پیدا ہونے سے پہلے ہی میری کنیت رکھ دی۔ [مصنف ابن ابي شيبه/ كتاب الأدب/حدیث: 27973]