امام شعبی فرماتے ہیں کہ حضرت ابو بردہ نے ایک ذمی کی طر ف خط لکھا اور اس کو سلام کہا، ان سے اس بارے میں پوچھا گیا: کہ آپ نے اسے سلام کیوں کیا؟ آپ نے فرمایا: بیشک اس نے سلام میں ابتداء کی تھی۔ [مصنف ابن ابي شيبه/ كتاب الأدب/حدیث: 27414]

حضرت عطیہ جو حضرت عبد اللہ بن مطرف بن الشخیر کے کاتب ہیں فرماتے ہیں کہ میں نے حضرت عبد اللہ بن مطرف بن الشخیر کو یوں ارشاد فرماتے ہوئے سنا: نہیں ہے زمین پر کوئی شخص جو سلام میں پہل کرے مگر یہ قیامت کے دن تک اس شخص کے لیے صدقہ بن جائے گا۔ [مصنف ابن ابي شيبه/ كتاب الأدب/حدیث: 27415]

حضرت زید بن وھب فرماتے ہیں کہ حضرت عبد اللہ بن مسعود رضی اللہ عنہ نے ارشاد فرمایا: جو شخص کسی قوم پر گزرا اور اس نے ان کو سلام کیا پھر ان لوگوں نے اس کو سلام کا جواب دیا تو اس شخص کو ان لوگوں پر ایک درجہ فضیلت حاصل ہوگی اس لیے کہ اس نے ان کو سلام یا د دلایا ہے۔ [مصنف ابن ابي شيبه/ كتاب الأدب/حدیث: 27416]

حضرت ابو عاصم فرماتے ہیں کہ حضرت عبد اللہ بن مسعود رضی اللہ عنہ نے ارشاد فرمایا: سلام میں پہل کرنے والا اپنے ساتھی سے اجر میں بڑھا ہوا ہوتا ہے۔ [مصنف ابن ابي شيبه/ كتاب الأدب/حدیث: 27417]

امام شعبی فرماتے ہیں کہ حضرت شریح نے ارشاد فرمایا: کبھی بھی دو آدمی آپس میں ملاقات نہیں کرتے مگر ان دونوں میں اللہ کے قریب وہ شخص ہوگا جو سلام میں پہل کرے۔ [مصنف ابن ابي شيبه/ كتاب الأدب/حدیث: 27418]

حضرت عائشہ رضی اللہ عنہا فرماتی ہیں کہ رسول اللہ صلی اللہ علیہ وآلہ وسلم کے پاس یہود کے کچھ لوگ آئے اور انہوں نے یوں کہا: السام علیک۔ تم پر موت طاری ہو۔ اے ابو القاسم! آپ صلی اللہ علیہ وآلہ وسلم نے فرمایا: تم لوگوں پر بھی ہو۔ [مصنف ابن ابي شيبه/ كتاب الأدب/حدیث: 27419]

حضرت انس رضی اللہ عنہ فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: جب اہل کتاب میں سے تمہیں کوئی سلام کرے تو تم یوں جواب دو۔ وعلیکم۔ [مصنف ابن ابي شيبه/ كتاب الأدب/حدیث: 27420]

حضرت ابو عبد الرحمن الجھنی فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: بیشک کل میں یہود کے پاس جاؤں گا، تو تم لوگ سلام میں پہل مت کرنا اور جب وہ تمہیں سلام کریں تو تم یوں کہنا۔ وعلیکم۔ [مصنف ابن ابي شيبه/ كتاب الأدب/حدیث: 27421]

حضرت ابن عمر رضی اللہ عنہما فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: بیشک یہودی جب بھی تم سے ملیں اور السام علیکم کہیں تو تم یوں جواب دو۔ وعلیکم۔ [مصنف ابن ابي شيبه/ كتاب الأدب/حدیث: 27422]

حضرت حمید بن زادویہ فرماتے ہیں کہ حضرت انس نے ارشاد فرمایا: ہمیں منع کیا گیا یا ہمیں حکم دیا گیا کہ ہم اہل کتاب کو سلام کا جواب دینے میں علیکم پر کچھ بھی اضافہ نہ کریں۔ [مصنف ابن ابي شيبه/ كتاب الأدب/حدیث: 27423]