حضرت زید بن وھب فرماتے ہیں کہ حضرت عبد اللہ بن مسعود رضی اللہ عنہ نے ارشاد فرمایا: یقینا سلام اللہ کے ناموں میں سے ایک نام ہے تو اس کو پھیلاؤ۔ [مصنف ابن ابي شيبه/ كتاب الأدب/حدیث: 27404]

حضرت مجاہد فرماتے ہیں کہ حضرت ابن عمر رضی اللہ عنہما نے ارشاد فرمایا: میں اس بازار کی طرف جاتا تھا حالانکہ میری کوئی ضرورت نہیں ہوئی تھی، مگر صرف اس وجہ سے کہ میں سلام کروں اور مجھے سلام کا جواب دیا جائے۔ [مصنف ابن ابي شيبه/ كتاب الأدب/حدیث: 27405]

حضرت ابو عثمان فرماتے ہیں کہ حضرت ابوہریرہ نے ارشاد فرمایا: بیشک لوگوں میں بخیل ترین وہ شخص ہے جو سلام کرنے میں بخل کرے۔ [مصنف ابن ابي شيبه/ كتاب الأدب/حدیث: 27406]

حضرت کریب فرماتے ہیں کہ حضرت ابن عباس رضی اللہ عنہما نے اہل کتاب میں سے ایک آدمی کو خط لکھا: تو اس میں اس کو سلام لکھا: السلام علیک۔ [مصنف ابن ابي شيبه/ كتاب الأدب/حدیث: 27407]

حضرت منصور فرماتے ہیں کہ ابراہیم نے ارشاد فرمایا: جب تم میں سے کوئی کسی یہودی اور نصرانی کو کسی ضرورت کے بارے میں خط لکھے تو اس کو چاہیے کہ یہ سلام میں پہل کرے۔ [مصنف ابن ابي شيبه/ كتاب الأدب/حدیث: 27408]

اور حضرت مجاہد نے فرمایا: یوں سلام لکھو: السَّلاَمُ عَلَی مَنِ اتَّبَعَ الْہُدَی۔ [مصنف ابن ابي شيبه/ كتاب الأدب/حدیث: 27409]

حضرت عون بن عبد اللہ فرماتے ہیں کہ حضرت محمد بن کعب نے حضرت عمر بن عبد العزیز سے ذمیوں کو سلام کرنے میں پہل کرنے کے بارے میں پوچھا؟ آپ نے فرمایا: ان کو سلام کا جواب دیا جائے گا اور تم ان پر سلام میں پہل نہ کرو۔ میں نے پوچھا: آپ خود کیا کہتے ہیں؟ آپ نے فرمایا: اس میں کوئی حرج نہیں کہ تم بھی ان پر سلام میں پہل کرو۔ میں نے پوچھا: کیوں؟ آپ نے فرمایا: اللہ رب العزت کے اس قول کی وجہ سے۔ ترجمہ: تم ان سے درگزر کرو اور یوں کہو: سلام، پس عنقریب وہ جان لیں گے۔ [مصنف ابن ابي شيبه/ كتاب الأدب/حدیث: 27410]

حضرت محمد بن زیاد الالھانی اور حضرت شرحبیل بن مسلم یہ دونوں حضرات فرماتے ہیں کہ حضرت ابو امامہ کسی مسلمان، یہودی اور نصرانی کے پاس سے نہیں گزرتے تھے مگر یہ کہ آپ سلام میں پہل کرتے تھے۔ [مصنف ابن ابي شيبه/ كتاب الأدب/حدیث: 27411]

حضرت ابن عجلان فرماتے ہیں کہ حضرت عبد اللہ بن مسعود رضی اللہ عنہ، حضرت ابو الدرداء اور حضرت فضالہ بن عبید یہ سب حضرات مشرکین سے سلام کرنے میں پہل کرتے تھے۔ [مصنف ابن ابي شيبه/ كتاب الأدب/حدیث: 27412]

حضرت ابو عیسیٰ فرماتے ہیں کہ حضرت عبد اللہ بن مسعود رضی اللہ عنہ نے ارشاد فرمایا: یقینا عاجزی کی بنیاد کی یہ بات ہے کہ جب تم کسی سے ملو تو سلام میں ابتداء کرو۔ [مصنف ابن ابي شيبه/ كتاب الأدب/حدیث: 27413]