حضرت ابو بصرہ الغفاری فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: بیشک ہم کل یہود کے پاس جائیں گے تو تم لوگ ان سے سلام میں پہل مت کرنا، پس اگر وہ تمہیں سلام کریں تو یوں جواب دینا۔ وعلیکم۔ [مصنف ابن ابي شيبه/ كتاب الأدب/حدیث: 27424]

حضرت عکرمہ فرماتے ہیں کہ حضرت ابن عباس رضی اللہ عنہما نے ارشاد فرمایا: اللہ کی مخلوق میں سے جو کوئی بھی تم کو سلام کرے تو تم اس کو سلام کا جواب دو اگرچہ وہ یہودی ہو یا نصرانی ہو یا مجوسی ہو۔ [مصنف ابن ابي شيبه/ كتاب الأدب/حدیث: 27425]

حضرت معن فرماتے ہیں کہ حضرت ابراہیم نے ارشاد فرمایا: جب اہل کتاب میں سے کوئی آدمی تمہیں سلام کرے تو تم اس کو یوں جواب دو۔ وعلیک۔ [مصنف ابن ابي شيبه/ كتاب الأدب/حدیث: 27426]

حضرت جابر فرماتے ہیں کہ حضرت عامر نے ارشاد فرمایا: جب کوئی یہودی یا نصرانی تمہیں سلام کرے تو تم یوں جواب دو۔ وعلیکم۔ [مصنف ابن ابي شيبه/ كتاب الأدب/حدیث: 27427]

حضرت سلمہ بن وھرام فرماتے ہیں کہ حضرت طاؤس کو جب کوئی یہودی اور عیسائی سلام کرتا تو آپ یوں جواب دیتے، علاک السلام (ترجمہ:) تجھ پر سلام بلند ہو۔ [مصنف ابن ابي شيبه/ كتاب الأدب/حدیث: 27428]

حضرت عاصم اور حضرت حماد دونوں حضرات بالترتیب فرماتے ہیں کہ حضرت ابن سیرین اور حضرت ابراہیم ان دونوں حضرات نے ارشاد فرمایا: جب تو یوں کہے حیَّاک اللہ۔ اللہ تجھے زندہ رکھے۔ تو تم اس کے ساتھ سلام بھی کرو۔ [مصنف ابن ابي شيبه/ كتاب الأدب/حدیث: 27429]

اسی طرح کی بات حضرت ابو معشر کے واسطے سے ابراہیم سے بھی منقول ہے۔ [مصنف ابن ابي شيبه/ كتاب الأدب/حدیث: 27430]

اور حضرت حماد ابراہیم سے نقل کرتے ہیں، ان دونوں حضرات (ابن سیرین اور ابراہیم) نے فرمایا: جب تم یوں کہو، حَیَّاک اللہ۔ اللہ تجھے زندہ رکھے۔ تو یوں کہو: بِالسَّلاَمِ۔ [مصنف ابن ابي شيبه/ كتاب الأدب/حدیث: 27431]

حضرت عبد المجید فرماتے ہیں کہ حسن بصری یوں کہنے کو مکروہ سمجھتے تھے: حَیَّاک اللَّہُ۔ مگر یہ کہ وہ سلام بھی کہے۔ [مصنف ابن ابي شيبه/ كتاب الأدب/حدیث: 27432]

حضرت محمد بن سوقہ فرماتے ہیں حضرت میمون بن مہران ہمارے پاس تشریف لائے تو ایک آدمی نے ان سے یوں کہا: حَیَّاک اللَّہُ۔ اللہ آپ کو زندہ رکھے۔ آپ نے فرمایا: ایسے مت کہو۔ یہ تو نوجوانوں کا سلام ہے۔ لیکن یوں کہو۔ حَیَّاکُمَ اللَّہُ بِالسَّلاَمِ۔ [مصنف ابن ابي شيبه/ كتاب الأدب/حدیث: 27433]