حضرت حسن سے آپ کا ارشاد منقول ہے کہ آپ صلی اللہ علیہ وآلہ وسلم نے فرمایا کہ کوڑے اور چھڑی کی وجہ سے مرنے والا شخص قتل شبہ عمد میں داخل ہے۔ [مصنف ابن ابي شيبه/كتاب الديات/حدیث: 28481]

حضرت شعبی، حکم اور حماد نے فرمایا کہ جو شخص پتھر، کوڑے یا چھڑی کے ذریعہ تکلیف دیا گیا پھر وہ مرگیا تو یہ قتل شبہ عمد ہے اور اس میں دیت مغلظہ ہے۔ [مصنف ابن ابي شيبه/كتاب الديات/حدیث: 28482]

حضرت ابراہیم کا ارشاد ہے کہ لوہے کہ علاوہ کسی بھی چیز سے مارنے کا قصد کیا جائے تو یہ شبہ عمد ہے، اور شبہ عمد صرف نفس (یعنی جان) میں ہی ہوتا ہے۔ مادون النفس میں شبہ عمد نہیں ہوتا۔ [مصنف ابن ابي شيبه/كتاب الديات/حدیث: 28483]

حضرت ابراہیم سے مروی ہے کہ بغیر اسلحہ کے جو قتل ہو وہ شبہ عمد میں داخل ہے، اور اس میں دیت رشتہ داروں پر لازم ہوتی ہے۔ [مصنف ابن ابي شيبه/كتاب الديات/حدیث: 28484]

حضرت زہری نے فرمایا ہے کہ قتل شبہ عمد یہ ہے کہ ایک آدمی دوسرے کو اپنے درمیان ہونے والی کسی دشمنی میں مارے لیکن اس کے قتل کا ارادہ نہ رکھتا ہو، پھر وہ آدمی اسی ضرب کی وجہ سے بیمار ہوجائے اور مرجائے۔ [مصنف ابن ابي شيبه/كتاب الديات/حدیث: 28485]

حضرت نعمان بشیر کا ارشاد ہے کہ رسول اللہ صلی اللہ علیہ وآلہ وسلم نے فرمایا کہ تلوار کے علاوہ باقی تمام چیزیں خطا ہں ر اور ہر خطا پر تاوان ہے۔ [مصنف ابن ابي شيبه/كتاب الديات/حدیث: 28486]

حضرت ابراہیم نے فرمایا کہ ”خطا“ یہ ہے کہ تو کسی ایک چیز کو مارنے کا ارادہ رکھتا ہو اور (غلطی سے) کسی دوسری چیز کو مارڈالے۔ [مصنف ابن ابي شيبه/كتاب الديات/حدیث: 28487]

حضرت ابراہیم کا ارشاد ہے کہ ”خطا“ یہ ہے کہ تو کسی انسان کو مار ڈالے حالانکہ تیرا اس کو مارنے کا ارادہ نہ ہو، پس یہ تاوان رشتہ داروں پر ہوگا۔ [مصنف ابن ابي شيبه/كتاب الديات/حدیث: 28488]

حضرت ابو حمزہ اسدی کا ارشاد ہے کہ میں شریح کے پاس حاضر ہوا انہوں نے ایسے سر کے زخم کے بارے میں کہ جس میں ہڈی ظاہر ہو، پانچ سو درہم کا فیصلہ کیا۔ [مصنف ابن ابي شيبه/كتاب الديات/حدیث: 28489]

حضرت حکیم بن الدیلم کا ارشاد ہے کہ میں شریح کے پاس سر اور چہرہ کے ایسے زخم کے بارے میں کہ جس میں ہڈی نظر آرہی ہو مقدمہ لے کر آیا تو انہوں نے اس میں پانچ جوان اونٹوں کا فیصلہ کیا۔ [مصنف ابن ابي شيبه/كتاب الديات/حدیث: 28490]