ابو موسیٰ اور مغیرہ بن شعبہ فرمایا کرتے تھے کہ دیت مغلظہ میں تیس چوتھے سال والی، اور تیس پانچویں سال میں چلنے والی اور چالیس ایسی اونٹنیاں جو چھٹے سال سے نویں سال کے درمیان ہوں اور تمام کی تمام حاملہ ہوں دی جائیں گی۔ [مصنف ابن ابي شيبه/كتاب الديات/حدیث: 28471]

حضرت زید بن ثابت فرماتے ہیں کہ قتل شبہ عمد میں تیس چوتھے سال والی، اور تیس پانچویں سال میں چلنے والی، اور چالیس ایسی اونٹنیاں جو چھٹے سال سے نویں سال کے درمیان ہوں اور ان میں سے ہر ایک حاملہ ہو، دی جائیں گی۔ [مصنف ابن ابي شيبه/كتاب الديات/حدیث: 28472]

اور علی رضی اللہ عنہ فرمایا کرتے تھے کہ شبہ عمد میں تینتیس چوتھے سال والی اور تینتیس پانچویں سال والی اور چونتیس ایسی اونٹنیاں جو چھٹے سال سے نویں سال کے درمیان ہوں اور ہر ایک ان میں سے حاملہ ہو، دی جائیں گی۔ [مصنف ابن ابي شيبه/كتاب الديات/حدیث: 28473]

حضرت عامر، حسن، ابن سیرین اور عمرو بن دینار نے فرمایا کہ قتل شبہ عمد میں قاتل اور اس کے رشتہ داروں پر اونٹوں کی عمروں کے صورت میں دیت کو سخت کیا جائے گا۔ [مصنف ابن ابي شيبه/كتاب الديات/حدیث: 28474]

حضرت علی رضی اللہ عنہ نے فرمایا کہ لکڑی کے ساتھ مارنا یا کسی بڑے پتھر کو پھینکنا یہ قتل شبہ عمد ہے اور اس کی دیت تین حصوں میں ہوگی، ایک تہائی چوتھے سال میں چلنے والی اونٹنیاں، اور ایک تہائی پانچویں سال میں چلنے والی، اور ایک تہائی ایسی اونٹنیاں جو چھٹے سال سے نویں سال کے درمیان ہوں اور سب کی سب حاملہ ہوں۔ [مصنف ابن ابي شيبه/كتاب الديات/حدیث: 28475]

حضرت عطاء نے فرمایا ہے کہ قتل شبہ عمد میں دیت مغلظہ ہوگی اور اس کی وجہ سے قصاص نہیں لیاجائے گا۔ [مصنف ابن ابي شيبه/كتاب الديات/حدیث: 28476]

حضرت ابن جریج نے فرمایا ہے کہ عطاء سے دریافت کیا کہ دیت کا مغلظہ کیا ہے؟ تو انہوں نے جواب دیا کہ چالیس حاملہ اور تیس چوتھے سال میں چلنے والی اونٹنیاں اور تیس پانچویں سال میں چلنے والی۔ [مصنف ابن ابي شيبه/كتاب الديات/حدیث: 28477]

حسن سے مروی ہے کہ دیت مغلظہ میں چالیس ایسی اونٹنیاں جو چھٹے سال سے نویں سال کے درمیان ہوں اور تمام حاملہ ہوں دی جائیں گی اور تیس چوتھے سال والی، اور تیس دوسرے سال والی دی جائیں گی۔ [مصنف ابن ابي شيبه/كتاب الديات/حدیث: 28478]

حضرت عطاء نے فرمایا ہے کہ قتل شبہ عمد میں تغلیظ (یعنی سختی) صرف اونٹوں کی عمروں کی صورت میں ہوگی۔ [مصنف ابن ابي شيبه/كتاب الديات/حدیث: 28479]

حضرت علی رضی اللہ عنہ کا ارشاد ہے کہ قتل شبہ عمد بڑے پتھر اور چھڑی کے ذریعہ قتل کرنا ہے۔ [مصنف ابن ابي شيبه/كتاب الديات/حدیث: 28480]