حضرت اشعث فرماتے ہیں کہ امام زہری نے ارشاد فرمایا: معاف کرنے والا خون کا زیادہ حقدار ہے۔ [مصنف ابن ابي شيبه/كتاب الديات/حدیث: 29381]

حضرت ابن عباس رضی اللہ عنہما فرماتے ہیں کہ رسول اللہ صلی اللہ علیہ وآلہ وسلم نے انصار اور مہاجرین کے درمیان ایک دستاویز لکھی: وہ اپنی دیت ادا کریں گے اور اپنے قیدیوں کو چھڑائیں گے نیکی اور مسلمانوں کے درمیان اصلاح و درستگی کی نیت سے۔ [مصنف ابن ابي شيبه/كتاب الديات/حدیث: 29382]

حضرت شعبی فرماتے ہیں کہ رسو ل اللہ (صلی اللہ علیہ وآلہ وسلم) نے قریش کی دیت قریش پر اور انصار کی دیت انصار پر ڈالی۔ [مصنف ابن ابي شيبه/كتاب الديات/حدیث: 29383]

حضرت ابراہیم سے مروی ہے کہ رسو ل اللہ (صلی اللہ علیہ وآلہ وسلم) نے دیت کی ادائیگی عصبی رشتہ داروں پر مقرر فرمائی۔ [مصنف ابن ابي شيبه/كتاب الديات/حدیث: 29384]

حضرت ابراہیم فرماتے ہیں کہ حضرت علی رضی اللہ عنہ اور حضرت زبیر حضرت صفیہ کے آزاد کردہ غلاموں کی ولاء کا معاملہ لے کر حضرت عمر کی خدمت میں حاضر ہوئے تو حضرت عمر نے وراثت کا فیصلہ حضرت زبیر کے حق میں کیا اور دیت حضرت علی رضی اللہ عنہ پر لازم کی۔ [مصنف ابن ابي شيبه/كتاب الديات/حدیث: 29385]

حضرت عبدالعزیز بن عمر فرماتے ہیں کہ حضرت عمربن عبدالعزیز نے مجھے ایک ایسے آدمی کے بارے میں خط لکھا کہ جس کے آقاؤں نے یوں کہا تھا کہ ہم اس کی طرف سے دیت ادا نہیں کریں گے پس آپ نے قاضی کو خط لکھا کہ وہ ان لوگوں پر دیت لازم کرے اس لیے کہ مجھے یقین ہے کہ وہ اس کی وراثت لینے والے ہیں۔ [مصنف ابن ابي شيبه/كتاب الديات/حدیث: 29386]

حضرت جعفر بن برقان فرماتے ہیں کہ حضرت عمر بن عبدالعزیز نے خط لکھا: اگر اس نے اپنے موالی کے سوا کوئی قرابت و رشتہ داری نہ چھوڑی ہو تو وہ ہی لوگوں میں اس کی وراثت کے زیادہ حقدار ہیں لہذا ان ہی پر اس کی دیت کا بوجھ ڈالو جیسا کہ وہ اس کے وارث بنتے ہیں۔ [مصنف ابن ابي شيبه/كتاب الديات/حدیث: 29387]

حضرت مغیرہ فرماتے ہیں کہ حضرت ابراہیم نے ارشاد فرمایا: وراثت رشتہ داروں کے لیے ہوگی اور جنایت کے ضمان آزاد کرنے والے پر لازم ہوں گے۔ [مصنف ابن ابي شيبه/كتاب الديات/حدیث: 29388]

حضرت مغیرہ فرماتے ہیں کہ ابراہیم نے ایسے شخص کے بارے میں کہ جس کو کچھ لوگوں نے اور اس کے باپ کو دوسرے لوگوں نے آزاد کیا۔ آپ نے یوں فرمایا: وہ دونوں رشتہ داری کی وجہ سے ایک دوسرے کے وارث بنیں گے اور ان کی جنایت کا ضمان ان کے آقاؤں کے خاندان پر لازم ہوگا۔ [مصنف ابن ابي شيبه/كتاب الديات/حدیث: 29389]

حضرت مغیرہ فرماتے ہیں کہ حضرت حماد نے ارشاد فرمایا: آزاد کردہ غلام کی جنایت کا ضمان اس کے آقا کے خاندان پر لازم ہوگا۔ [مصنف ابن ابي شيبه/كتاب الديات/حدیث: 29390]