حضرت حمید فرماتے ہیں کہ حضرت عمر بن عبدالعزیز نے ماں شریک بھائیوں کے بارے میں لکھ دیا تھا کہ وہ دیت کے وارث بنیں گے۔ [مصنف ابن ابي شيبه/كتاب الديات/حدیث: 29371]

حضرت ابن جریج فرماتے ہیں کہ میں نے حضرت عطاء سے پوچھا: کیا ماں شریک بھائی وارث بنے گا؟ یعنی دیت کا؟ آپ نے فرمایا: جی ہاں۔ [مصنف ابن ابي شيبه/كتاب الديات/حدیث: 29372]

حضرت اعمش فرماتے ہیں کہ میں نے حضرت ابراہیم سے دریافت کیا کہ کیا ماں شریک بھائی دیت کا وارث بنے گا؟ آپ نے فرمایا: جی ہاں۔ [مصنف ابن ابي شيبه/كتاب الديات/حدیث: 29373]

حضرت عاصم احول فرماتے ہیں کہ میں نے حضرت حسن بصری سے اس بارے میں دریافت کیا؟ آپ نے فرمایا: ان کے لیے کتاب اللہ فیصلہ ہے۔ [مصنف ابن ابي شيبه/كتاب الديات/حدیث: 29374]

حضرت عمرو بن دینار فرماتے ہیں کہ حضرت محمد بن علی رحمہ اللہ نے ارشاد فرمایا: جس شخص نے ماں شریک بھائی کو دیت کا وارث نہیں بنایا تحقیق اس نے ظلم کیا۔ [مصنف ابن ابي شيبه/كتاب الديات/حدیث: 29375]

حضرت اعمش فرماتے ہیں کہ حضرت زید بن وھب نے ارشاد فرمایا: ایک آدمی نے اپنی بیوی کے ساتھ کسی مرد کو دیکھا تو اس نے اپنی بیوی کو قتل کردیا۔ اس آدمی کو حضرت عمر کے سامنے پیش کیا گیا تو اس عورت کے ایک بھائی نے دیت میں سے اپنا حصہ اس شخص کو ھبہ کرد یا تو حضرت عمر نے باقی سب کو دیت لینے کا حکم دیا۔ [مصنف ابن ابي شيبه/كتاب الديات/حدیث: 29376]

حضرت ابو معشر فرماتے ہیں کہ ابراہیم نے ارشاد فرمایا: ایک آدمی نے کسی شخص کو عمداً قتل کردیا تو مقتول کے بعض سرپرستوں نے قاتل کو معاف کردیا پھر یہ معاملہ حضرت عمر کے سامنے پیش کیا گیا آپ نے حضرت عبداللہ بن مسعود سے کہا، آپ اس بارے میں کچھ فرمائیے حضرت عبداللہ نے فرمایا: اے امیر المومنین! ویسے آپ کچھ کہنے کے زیادہ حقدار ہیں پھر حضرت عبداللہ نے فرمایا: جب بعض سرپرستوں نے قاتل کو معاف کردیا تو قصاص نہیں ہوگا اور قاتل کے ذمہ سے معاف کرنے والوں کا حصہ ختم کردیا جائے گا۔ اور ان لوگوں کو بقایا دیت ملے گی اور اس پر حضرت عمر نے فرمایا: یہ درست رائے ہے: اور تم نے میرے دل میں موجود بات کی موافقت کی۔ [مصنف ابن ابي شيبه/كتاب الديات/حدیث: 29377]

حضرت عیسیٰ فرماتے ہیں کہ امام شعبی نے ارشاد فرمایا: جب بعض ورثہ نے معاف کردیا تو اس معافی کی اتباع کی جائے گی۔ [مصنف ابن ابي شيبه/كتاب الديات/حدیث: 29378]

حضرت قتادہ فرماتے ہیں کہ حضرت عمر بن عبدالعزیز نے ارشاد فرمایا: جس شخص نے معاف کردیا تو اسے کچھ حصہ نہیں ملے گا۔ [مصنف ابن ابي شيبه/كتاب الديات/حدیث: 29379]

حضرت ابن طاؤس فرماتے ہیں کہ ان کے والد حضرت طاؤس نے ارشاد فرمایا: جب بعض سرپرستوں نے خون معاف کردیا تو دیت لازم ہوگی۔ [مصنف ابن ابي شيبه/كتاب الديات/حدیث: 29380]