حضرت عکرمہ فرماتے ہیں کہ حضرت عمار کی مزدلفہ میں زنبیل چوری ہوگئی تو آپ نے اس کے پیچھے ایک بڑا پیالہ رکھ دیا اور قیافہ شناس کو بلایا: پس وہ لوگ کہنے لگے: کہ کوئی حبشی ہے انہوں نے اس کے نشان کا پیچھا کیا: یہاں تک کہ وہ ایک باغ تک پہنچے اور وہ حبشی اسے الٹ پلٹ کر رہا تھا آپ نے اپنی زنبیل لے لی اور اس حبشی کو چھوڑ دیا تو آپ سے اس بارے میں پوچھا گیا تو آپ نے فرمایا: میں نے اس کی پردہ پوشی کی شاید اللہ مجھ پر بھی پردہ پوشی فرما دے۔ [مصنف ابن ابي شيبه/كتاب الحدود/حدیث: 29941]

حضر ت عکرمہ فرماتے ہیں کہ حضرت ابن عباس رضی اللہ عنہما حضرت عمار اور حضرت زبیر نے ایک چور کو پکڑا پھر انہوں نے اس کو جانے دیا۔ میں نے حضرت ابن عباس رضی اللہ عنہما سے کہا: آپ سب نے برا کیا جب آپ نے اس کا راستہ خالی چھوڑا! اس پر آپ نے فرمایا! تیری ماں مرے، اگر اس کی جگہ تو ہوتا تو ضرور خواہش کرتا کہ تیرا راستہ خالی چھوڑ دیا جائے۔ [مصنف ابن ابي شيبه/كتاب الحدود/حدیث: 29942]

حضرت ابن عمر رضی اللہ عنہما فرماتے ہیں کہ رسول اللہ صلی اللہ علیہ وآلہ وسلم نے ایک ڈھال کی وجہ سے ہاتھ کاٹا جس کی قیمت تین درہم تھی۔ [مصنف ابن ابي شيبه/كتاب الحدود/حدیث: 29943]

حضرت عائشہ رضی اللہ عنہا فرماتی ہیں کہ نبی کریم صلی اللہ علیہ وآلہ وسلم نے ارشاد فرمایا: ہاتھ کاٹنا چوتھائی دینار یا اس سے زائد میں ہوگا۔ [مصنف ابن ابي شيبه/كتاب الحدود/حدیث: 29944]

حضرت عبداللہ بن مسعود فرماتے ہیں کہ رسول اللہ صلی اللہ علیہ وآلہ وسلم نے پانچ درہم میں ہاتھ کاٹا۔ [مصنف ابن ابي شيبه/كتاب الحدود/حدیث: 29945]

حضرت سعد فرماتے ہیں کہ نبی کریم صلی اللہ علیہ وآلہ وسلم نے ارشاد فرمایا: ڈھا ل کی قیمت کے برابر کی چوری میں چور کا ہاتھ کاٹا جائے گا۔ [مصنف ابن ابي شيبه/كتاب الحدود/حدیث: 29946]

حضرت جعفر کے والد فرماتے ہیں کہ حضرت علی رضی اللہ عنہ نے لوہے کے ایک خود کی چوری میں چور کا ہاتھ کاٹ دیا جس کی قیمت چوتھائی دینار تھی۔ [مصنف ابن ابي شيبه/كتاب الحدود/حدیث: 29947]

حضرت عبداللہ بن عمرو فرماتے ہیں کہ میں نے نبی کریم صلی اللہ علیہ وآلہ وسلم کو یوں ارشاد فرماتے ہوئے سنا: ہاتھ کاٹنا ڈھال کی قیمت میں ہوگا۔ [مصنف ابن ابي شيبه/كتاب الحدود/حدیث: 29948]

حضرت عمرہ فرماتی ہیں کہ ام المومنین حضرت عائشہ رضی اللہ عنہا صدیقہ نے ارشاد فرمایا: ہاتھ کاٹنا چوتھائی دینار یا اس سے زائد کی قیمت میں ہوگا۔ [مصنف ابن ابي شيبه/كتاب الحدود/حدیث: 29949]

حضرت حمید فرماتے ہیں کہ حضرت انس سے اس بارے میں پوچھا گیا کہ کتنی قیمت کی چوری میں چور کا ہاتھ کاٹا جائے گا؟ آپ نے فرمایا: تحقیق حضرت ابوبکر نے اتنی قیمت میں ہاتھ کاٹا تھا کہ میں پسند نہیں کرتا کہ وہ چیز میرے لیے پانچ درہم یاتین درہم کی بھی ہو۔ [مصنف ابن ابي شيبه/كتاب الحدود/حدیث: 29950]