حضرت ابن ابی نجیح فرماتے ہیں کہ حضرت مجاہد سے اللہ تعالیٰ کے قول { وَلاَ تَأْخُذْکُمْ بِہِمَا رَأْفَۃٌ فِی دِینِ اللہِ } کے بارے میں مروی ہے کہ ان دونوں حضرات نے فرمایا: اس سے مراد قتل نہیں ہے بلکہ حد قائم کرنا مراد ہے۔ [مصنف ابن ابي شيبه/كتاب الحدود/حدیث: 30650]

حضرت حجاج فرماتے ہیں کہ حضرت عطاء نے ارشاد فرمایا: حد قائم کرنے میں ہے بہر حال کوڑے مارنے میں سختی مراد نہیں ہے۔ [مصنف ابن ابي شيبه/كتاب الحدود/حدیث: 30651]

حضرت ابن ابی نجیح فرماتے ہیں کہ حضرت مجاہد سے اللہ رب العزت کے قول { وَلاَ تَأْخُذْکُمْ بِہِمَا رَأْفَۃٌ فِی دِینِ اللہِ } کے بارے میں مروی ہے کہ آپ نے فرمایا: سزا قائم کرنے کے بارے میں ہے کہ سزا قائم کردی جائے اسے ختم نہ کیا جائے۔ [مصنف ابن ابي شيبه/كتاب الحدود/حدیث: 30652]

حضرت یحییٰ بن ابی کثیر فرماتے ہیں کہ حضرت عکرمہ اور حضرت سلیمان بن یسار سے ایک آدمی کے بارے میں مروی ہے جس نے باندی سے شادی کی اور اس نے اس سے قبل کسی آزاد سے شادی نہیں کی تھی پھر اس نے بدکاری کرلی۔ حضرت سلیمان بن یسار نے فرمایا: اسے سنگسار کردیا جائے اور حضرت عکرمہ نے فرمایا: اسے کوڑے مارے جائیں گے۔ [مصنف ابن ابي شيبه/كتاب الحدود/حدیث: 30653]

اور حضرت عکرمہ نے فرمایا: اسے کوڑے مارے جائیں گے۔ [مصنف ابن ابي شيبه/كتاب الحدود/حدیث: 30654]

حضرت عبدالملک فرماتے ہیں کہ حضرت عطاء سے ایک آدمی کے متعلق سوال کیا گیا جس نے زنا کیا درآنحالیکہ اس کی بہت سی باندیاں تھیں؟ آپ نے فرمایا: اسے کوڑے مارے جائیں گے اور سنگسار نہیں کیا جائے گا۔ [مصنف ابن ابي شيبه/كتاب الحدود/حدیث: 30655]

حضرت حکم اور حضرت حماد فرماتے ہیں کہ حضرت ابراہیم نے ارشاد فرمایا: آزاد شخص یہودی عورت سے محصن نہیں بنتا نہ ہی عیسائی عوت سے اور نہ ہی باندی سے۔ [مصنف ابن ابي شيبه/كتاب الحدود/حدیث: 30656]

حضرت عبید اللہ بن عبداللہ بن عتبہ یا حضرت عبداللہ بن عتبہ سے مروان نے اس آزاد آدمی کے متعلق سوال کیا جس کے ماتحت باندی ہو اور وہ زنا کرے؟ آپ نے فرمایا: اسے سنگسار کردیا جائے گا۔ مروان نے پوچھا: آپ نے کس سے یہ حکم لیا ہے؟ آپ نے فرمایا: ہم نے رسول اللہ صلی اللہ علیہ وآلہ وسلم کے صحابہ کو یوں کہتے ہوئے پایا تھا۔ [مصنف ابن ابي شيبه/كتاب الحدود/حدیث: 30657]

حضرت یونس فرماتے ہیں کہ حضرت حسن بصری فرمایا کرتے تھے کہ باندی آزاد مرد کو محصن نہیں بنا سکتی اور غلام آزاد عورت کو محصن نہیں بنا سکتا۔ [مصنف ابن ابي شيبه/كتاب الحدود/حدیث: 30658]

حضرت قتادہ اور حسن بصری فرمایا کرتے تھے اس آزاد عورت کے بارے میں جو غلام کے ماتحت ہونے کے باوجود زنا کرلے تو سنت یہ ہے کہ اس کو سنگسار کیا جائے گا اور اس آزاد شخص کے بارے میں جس کے ماتحت باندی ہو اس کو سنگسار نہیں کیا جائے گا۔ [مصنف ابن ابي شيبه/كتاب الحدود/حدیث: 30659]