حضرت یحییٰ بن ابی کثیر فرماتے ہیں کہ حضرت سلیمان بن یسار نے فرمایا: غلام آزاد عورت کو اور باندی آزاد مرد کو محصن بنا دیں گے۔ [مصنف ابن ابي شيبه/كتاب الحدود/حدیث: 30660]

حضرت قتادہ فرماتے ہیں کہ حضرت سعید بن مسیب نے ارشاد فرمایا: غلام آزاد عورت کو اور باندی آزاد مرد کو محصن بنادیں گے۔ آپ نے فرمایا: آزاد اب سے سنگسار کیا جائے گا۔ [مصنف ابن ابي شيبه/كتاب الحدود/حدیث: 30661]

حضرت لیث فرماتے ہیں کہ حضرت مجاھد نے فرمایا میں مدینہ آیا اس حال میں کہ سب فقہاء نے اتفاق کرلیا تھا ایک غلام پر جو کسی آزاد عورت سے محصن ہوا تھا کہ اسے سنگسار کردیا جائے سوائے حضرت عکرمہ کے کہ انہوں نے فرمایا: اس پر آدھی سزا جاری ہوگی۔ [مصنف ابن ابي شيبه/كتاب الحدود/حدیث: 30662]

حضرت ابو معشر فرماتے ہیں کہ حضرت ابراہیم سے اس غلام کے بارے میں کہ آزاد عورت اس کے ماتحت ہو یا وہ آزاد شخص جس کے ماتحت باندی ہو ان میں سے کسی نے زنا کرلیا ہو ان کے بارے میں مروی ہے آپ نے فرمایا: ان میں سے کسی پر سنگسار کی سزا جاری نہیں ہوگی یہاں تک کہ وہ دونوں آزاد مسلمان ہوں۔ [مصنف ابن ابي شيبه/كتاب الحدود/حدیث: 30663]

حضرت لیث فرماتے ہیں کہ حضرت مجاھد نے ارشاد فرمایا: باندی کے شادی شدہ ہونے کا مطلب یہ ہے کہ وہ آزاد سے نکاح کرلے اور غلام کے شادی شدہ ہونے کا مطلب یہ ہے کہ وہ آزاد عورت سے نکاح کرلے۔ [مصنف ابن ابي شيبه/كتاب الحدود/حدیث: 30664]

حضرت مغیرہ فرماتے ہیں کہ حضرت ابراہیم اور حضرت شعبی سے اس آزاد شخص کے بارے میں مروی ہے جو یہودی عورت اور عیسائی عورت سے شدی کرتا ہے پھر بدکاری کرلیتا ہے ان دونوں حضرات نے فرمایا: اسے کوڑے مارے جائیں گے اور سنگسار نہیں کیا جائے گا۔ [مصنف ابن ابي شيبه/كتاب الحدود/حدیث: 30665]

حضرت ابن طاؤس فرماتے ہیں کہ ان کے والد حضرت طاؤس رائے رکھتے تھے کہ آزاد آدمی کو آزاد مسلمان عورت کے علاوہ کوئی عورت محصن نہیں بنا سکتی۔ [مصنف ابن ابي شيبه/كتاب الحدود/حدیث: 30666]

حضرت علی بن ابی طلحہ رحمہ اللہ فرماتے ہیں کہ حضرت کعب نے کسی یہودی یا عیسائی عورت سے شادی کرنے کا ارادہ کیا تو آپ نے اس بارے میں نبی کریم صلی اللہ علیہ وآلہ وسلم سے پوچھا؟ آپ صلی اللہ علیہ وآلہ وسلم نے انہیں اس سے منع فرما دیا: اور فرمایا: بیشک وہ تجھے محصن نہیں بنا سکتی۔ [مصنف ابن ابي شيبه/كتاب الحدود/حدیث: 30667]

حضرت نافع فرماتے ہیں کہ حضرت ابن عمر رضی اللہ عنہما مشرکہ عورت کو محصنہ نہیں سمجھتے تھے۔ [مصنف ابن ابي شيبه/كتاب الحدود/حدیث: 30668]

حضرت نافع فرماتے ہیں کہ حضرت ابن عمر رضی اللہ عنہما نے ارشاد فرمایا: جس نے اللہ کے ساتھ شریک ٹھہرایا تو وہ محصن نہیں۔ [مصنف ابن ابي شيبه/كتاب الحدود/حدیث: 30669]