حضرت شہر بن حوشب فرماتے ہیں کہ حضرت کعب نے فرمایا: اہل قرآن اور بادشاہت والے قتال کریں گے۔ پس بادشاہت والے قرآن کے کان کے سوراخ کو روند ڈالیں گے۔ پس بڑی مشکل سے، بڑی ہی مشکل سے تم ان سے چھٹکارا پا سکو گے۔ [مصنف ابن ابي شيبه/كتاب فضائل القرآن/حدیث: 32303]

حضرت عبد الرحمن بن عبد اللہ بن مسعود رحمہ اللہ فرماتے ہیں کہ ایک آدمی حضرت ابن مسعود کی خدمت میں حاضر ہو کر کہنے لگا: اے ابو عبد الرحمن! آپ مجھے ایسے کلمات سکھا دیجیے جو جامع بھی ہوں اور نافع بھی۔ آپ نے فرمایا: تم اللہ کی عبادت کرو اور اس کے ساتھ کسی کو شریک مت ٹھہراؤ۔ اور جہاں قرآن ہٹے تم بھی اس کے ساتھ ہٹ جاؤ۔ [مصنف ابن ابي شيبه/كتاب فضائل القرآن/حدیث: 32304]

حضرت عامر بن مطر فرماتے ہیں کہ میں حضرت حذیفہ رضی اللہ عنہ کے ساتھ تھا تو آپ نے فرمایا: اے عامر بن مطر تیرا کیا حال ہوگا جب لوگ ایک راستہ بنالیں گے اور قرآن کا راستہ الگ ہوگا؟ تو ان دونوں میں سے کس کے ساتھ ہوگا؟ پس میں نے کہا: قرآن کے ساتھ ہی میں زندہ رہوں گا اور یا اس کے ساتھ ہی مروں گا۔ آپ نے فرمایا: تب تو بہت اچھا ہوگا۔ [مصنف ابن ابي شيبه/كتاب فضائل القرآن/حدیث: 32305]

حضرت معن فرماتے ہیں کہ ایک آدمی حضرت ابن مسعود رضی اللہ عنہ کی خدمت میں حاضر ہو کر کہنے لگا: مجھے ایسے کلمات سکھا دیجئے جو جامع بھی ہوں اور نافع بھی۔ آپ نے فرمایا: تم اللہ کی عبادت کرو اور اس کے ساتھ کسی چیز کو شریک مت ٹھہراؤ اور جہاں قرآن ہٹے تم بھی اس کے ساتھ ہٹ جاؤ۔ [مصنف ابن ابي شيبه/كتاب فضائل القرآن/حدیث: 32306]

حضرت منصور فرماتے ہیں کہ حضرت ابراہیم نے ارشاد فرمایا: حضرت عبد اللہ بن مسعود رضی اللہ عنہ کے اصحاب میں سے یہ لوگ تھے جو فتویٰ دیتے تھے اور قرآن پڑھاتے تھے، حضرت علقمہ، اسود، عبیدہ، مسروق، عمرو بن شرحبیل اور حارث بن قیس۔ [مصنف ابن ابي شيبه/كتاب فضائل القرآن/حدیث: 32307]

حضرت مسلم فرماتے ہیں کہ حضرت مسروق نے ارشاد فرمایا: حضرت عبد اللہ بن مسعود رضی اللہ عنہ ہمیں مجلس میں قرآن پڑھاتے تھے پھر اس کے بعد بیٹھ جاتے اور لوگوں سے حدیث بیان کرتے۔ [مصنف ابن ابي شيبه/كتاب فضائل القرآن/حدیث: 32308]

حضرت عبد الرحمن بن حمید فرماتے ہیں کہ میں نے حضرت ابو اسحاق کو یوں فرماتے ہوئے سنا ہے کہ حضرت ابو عبد الرحمن نے مسجد میں چالیس سال قرآن پڑھایا۔ [مصنف ابن ابي شيبه/كتاب فضائل القرآن/حدیث: 32309]

حضرت عبد اللہ بن مسعود رضی اللہ عنہ فرماتے ہیں کہ رسول اللہ صلی اللہ علیہ وآلہ وسلم نے مجھ سے ارشاد فرمایا: مجھے قرآن سناؤ۔ میں نے عرض کیاً! میں آپ کو سناؤں، حالانکہ قرآن تو آپ ہی پر نازل ہوا ہے؟ آپ صلی اللہ علیہ وآلہ وسلم نے فرمایا: بلاشبہ میں چاہتا ہوں کہ میں اپنے علاوہ کسی اور سے قرآن سنوں۔ عبد اللہ فرماتے ہیں! پس میں نے حضور صلی اللہ علیہ وآلہ وسلم کے سامنے سورة نساء کی تلاوت فرمائی۔ یہاں تک کہ میں اس آیت پر پہنچا۔ (پھر کیا کیفیت ہوگی (ان لوگوں کی) جب لائیں گے ہم ہر امت میں سے ایک گواہ اور لائیں گے تمہیں (اے محمد (صلی اللہ علیہ وآلہ وسلم)!) ان پر بطور گواہ) میں نے اپنا سر اٹھایا یا ایک آدمی نے میرے پہلو کو ٹٹولا تو میں نے اپنا سر اٹھایا پس میں نے دیکھا آپ صلی اللہ علیہ وآلہ وسلم کی دونوں آنکھوں سے آنسو بہہ رہے تھے۔ [مصنف ابن ابي شيبه/كتاب فضائل القرآن/حدیث: 32310]

حضرت عبد اللہ سے نبی صلی اللہ علیہ وآلہ وسلم کی حدیث اس سند سے بھی مروی ہے۔ [مصنف ابن ابي شيبه/كتاب فضائل القرآن/حدیث: 32311]

حضرت عبد اللہ بن مسعود رضی اللہ عنہ فرماتے ہیں نبی صلی اللہ علیہ وآلہ وسلم نے مجھ سے کہا: پڑھو، پس میں نے سورة النساء شروع کردی یہاں تک کہ میں پہنچا اللہ کے اس قول تک (پھر کیا کیفیت ہوگی (ان لوگوں کی) جب لائیں گے ہم ہر امت میں سے ایک گواہ اور لائیں گے تمہیں (اے محمد (صلی اللہ علیہ وآلہ وسلم)!) ان پر بطور گواہ)۔ آپ فرماتے ہیں! پس نبی صلی اللہ علیہ وآلہ وسلم کی دونوں آنکھوں سے آنسو بہہ رہے تھے۔ آپ صلی اللہ علیہ وآلہ وسلم نے فرمایا: کافی ہے تمہیں۔ [مصنف ابن ابي شيبه/كتاب فضائل القرآن/حدیث: 32312]