یونس حسن رحمہ اللہ سے روایت کرتے ہیں ان سے ایسے آدمی کے بارے میں پوچھا گیا جس نے ورثاء کی رضا مندی سے ایک تہائی مال سے زیادہ کی وصیت کی اور جب وہ مرگیا تو ورثاء نے ایک تہائی سے زیادہ نکالنے سے انکار کردیا، آپ نے فرمایا یہ وصیت ان پر نافذ ہے۔ [مصنف ابن ابي شيبه/كتاب الوصايا/حدیث: 32758]

ابن جریج فرماتے ہیں کہ عطاء فرمایا کرتے تھے کہ یہ وصیت نافذ ہے، ورثاء نے اس کی اجازت دے دی ہے۔ [مصنف ابن ابي شيبه/كتاب الوصايا/حدیث: 32759]

شعبہ حماد سے روایت کرتے ہیں کہ انہوں نے اس شخص کے بارے میں جو ایک تہائی سے زیادہ کی وصیت کرے، ورثاء اس کی اجازت دے دیں اور پھر بعد میں رجوع کرلیں فرمایا: ان کو اس طرح رجوع کرنے کا اختیار نہیں ہے۔ [مصنف ابن ابي شيبه/كتاب الوصايا/حدیث: 32760]

اور حکم فرماتے ہیں کہ اگر چاہیں تو وہ اس سے رجوع کرسکتے ہیں۔ [مصنف ابن ابي شيبه/كتاب الوصايا/حدیث: 32761]

حضرت حکم فرماتے ہیں کہ جب کوئی آدمی ایک تہائی سے زیادہ مال کی وصیت کرے اور اپنی زندگی میں اپنے بیٹے سے اس کی جازت لے اور بیٹا اس کو اجازت دے دے، تب بھی اس آدمی کے مرنے کے بعد اس کے بیٹے کو اختیار ہوگا، چاہے تو اس وصیت کو نافذ کر دے اور چاہے تو ردّ کر دے۔ [مصنف ابن ابي شيبه/كتاب الوصايا/حدیث: 32762]

قاسم بن عبد الرحمن فرماتے ہیں کہ ایک آدمی نے اپنے مرض وفات میں اپنے ورثاء سے اس بات کی اجازت مانگی کہ ایک تہائی سے زائد مال کی وصیت کرے، انہوں نے اس کی اجازت دے دی، لیکن جب وہ آدمی مرا تو وہ انکاری ہوگئے، حضرت ابن مسعود رضی اللہ عنہ سے اس بارے میں سوال کیا گیا تو آپ نے فرمایا انہیں اس بات کا اختیار ہے اور ان کو اس کے خلاف پر مجبور کرنا جائز نہیں۔ [مصنف ابن ابي شيبه/كتاب الوصايا/حدیث: 32763]

وکیع، سفیان سے، وہ منصور سے، وہ ابراہیم سے، وہ داود بن ابی ہند سے اور وہ عامر سے روایت کرتے ہیں۔ [مصنف ابن ابي شيبه/كتاب الوصايا/حدیث: 32764]

خالد ابن سیرین سے روایت کرتے ہیں کہ حضرت شریح نے فرمایا: جب کوئی آدمی اپنے مرض میں کسی غیر وارث یا وارث کے لیے ایک تہائی سے زائد مال کی وصیت کرے اور ورثاء بھی اس کی اجازت دیدیں، پھر وہ آدمی مرجائے تو ان کو رجوع کا حق حاصل ہے۔ [مصنف ابن ابي شيبه/كتاب الوصايا/حدیث: 32765]

عبد الرحمن حضرت عبد اللہ سے روایت کرتے ہیں کہ انہوں نے اس آدمی کے بارے میں جو ایک تہائی سے زائد مال کی وصیت کرے اور وارث بھی اس کو نافذ کرنے کی اجازت دے دے لیکن اس کے مرنے کے بعد اس کو نافذ نہ کرے فرمایا: اس پر جبر کرنا جائز نہیں۔ [مصنف ابن ابي شيبه/كتاب الوصايا/حدیث: 32766]

یونس حضرت حسن سے روایت کرتے ہیں فرمایا کہ جب کوئی شخص ایک وصیت کرے اور اس کے بعد کوئی دوسری وصیت کر دے تو دوسری وصیت پر عمل کیا جائے گا۔ [مصنف ابن ابي شيبه/كتاب الوصايا/حدیث: 32767]