حضرت طاؤس رحمہ اللہ فرماتے ہیں کہ رسول اللہ صلی اللہ علیہ وسلم نے ارشاد فرمایا: تحقیق میں نے ارادہ کیا تھا کہ میں کسی سے ہدیہ قبول نہیں کروں گا سوائے قریشی سے یا انصاری سے یا ثقفی سے۔ [مصنف ابن ابي شيبه/كتاب الفضائل/حدیث: 34677]

حضرت ابوہریرہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: تحقیق میں نے ارادہ کیا تھا کہ میں کسی سے بھی ہدیہ قبول نہیں کروں گا مگر قریشی سے یا انصاری سے یا ثقفی سے یا دوسی سے۔ [مصنف ابن ابي شيبه/كتاب الفضائل/حدیث: 34678]

حضرت ابن عباس رضی اللہ عنہما فرماتے ہیں کہ قبیلہ عبد القیس کا وفد رسول اللہ صلی اللہ علیہ وسلم کے پا س آیا۔ تو رسول اللہ صلی اللہ علیہ وسلم نے پوچھا: کون سا وفد ہے؟ یا یوں کہا: کون لوگ ہیں؟ ان لوگوں نے عرض کیا: قبیلہ ربیعہ کے لوگ ہیں۔ آپ صلی اللہ علیہ وسلم نے فرمایا: وفد کو یا یوں فرمایا: لوگوں کو خوش آمدید جو نہ دنیا میں رسوا ہوں نہ آخرت میں شرمندہ۔ [مصنف ابن ابي شيبه/كتاب الفضائل/حدیث: 34679]

حضرت عباد العصری رحمہ اللہ فرماتے ہیں کہ حضرت عمر بن خطاب رضی اللہ عنہ عرفات کے میدان میں ایک جگہ ٹھہرے اور پوچھا: یہ کن لوگوں کے خیمے ہیں؟ لوگوں نے کہا: قبیلہ عبد القیس کے۔ تو آپ رضی اللہ عنہ نے ان کے لیئے دعا فرمائی اور ان کے لیے استغفار کیا۔ [مصنف ابن ابي شيبه/كتاب الفضائل/حدیث: 34680]

حضرت عبد الرحمن بن ابی بکرہ رحمہ اللہ فرماتے ہیں کہ حضرت اشج بنو عصر فرماتے ہیں کہ رسول اللہ صلی اللہ علیہ وسلم نے مجھ سے ارشاد فرمایا: یقینا تم میں دو خصلتیں ایسی ہیں کہ اللہ ان کو پسند کرتے ہیں۔ میں نے پوچھا: وہ دونوں کون سی ہیں؟ آپ صلی اللہ علیہ وسلم نے فرمایا: بردباری اور حیائ۔ میں نے پوچھا: یہ مجھ میں پرانی ہیں یا جدید؟ آپ صلی اللہ علیہ وسلم نے فرمایا: نہیں بلکہ پرانی ہیں۔ میں نے کہا: اللہ کا شکر ہے جس نے میری جبلت میں دو خصلتیں پیدا کیں جن کو وہ پسند کرتا ہے۔ [مصنف ابن ابي شيبه/كتاب الفضائل/حدیث: 34681]

حضرت عمران بن حصین رضی اللہ عنہ فرماتے ہیں کہ قبیلہ بنو تمیم والے نبی کریم صلی اللہ علیہ وآلہ وسلم کی خدمت میں آئے۔ آپ صلی اللہ علیہ وسلم نے فرمایا: اے بنو تمیم! خوشی مناؤ۔ تو ان لوگوں نے کہا: اے اللہ کے رسول صلی اللہ علیہ وسلم ! آپ نے ہمیں خوشخبری سنائی۔ پس آپ صلی اللہ علیہ وسلم ہمیں کچھ عطا کریں۔ [مصنف ابن ابي شيبه/كتاب الفضائل/حدیث: 34682]

حضرت ابن فاتک رحمہ اللہ فرماتے ہیں کہ حضرت کعب رحمہ اللہ نے مجھ سے ارشاد فرمایا: بیشک عرب کے قبیلوں میں سے دجال پر سب سے زیادہ سخت تمہاری قوم ہوگی یعنی قبیلہ بنو تمیم۔ [مصنف ابن ابي شيبه/كتاب الفضائل/حدیث: 34683]

حضرت فضیل بن عمرو رحمہ اللہ فرماتے ہیں کہ لوگوں نے حضرت حذیفہ رضی اللہ عنہ کے پاس قبیلہ بنو تمیم کا ذکر فرمایا: تو آپ رضی اللہ عنہ نے فرمایا: بیشک بنو تمیم والے لوگوں میں سب سے زیادہ سخت ہوں گے دجال کے مقابلہ میں۔ [مصنف ابن ابي شيبه/كتاب الفضائل/حدیث: 34684]

حضرت ثور رحمہ اللہ ایک آدمی سے نقل فرماتے ہیں کہ انصار کے ایک شخص نے کسی عورت کو نکاح کا پیغام بھیجا۔ اس پر رسول اللہ صلی اللہ علیہ وسلم نے اسے فرمایا: تیرا کیا نقصان ہے جب وہ عورت دیندار اور خوبصورت ہو کہ وہ حاجب بن زرارہ تمیمی کے خاندان میں سے نہ ہو۔ [مصنف ابن ابي شيبه/كتاب الفضائل/حدیث: 34685]

حضرت ابو العالیہ رحمہ اللہ فرماتے ہیں کہ ہر پانچ میں سے ایک آدمی نے نبی کریم صلی اللہ علیہ وآلہ وسلم کے سامنے قرآن مجید کی قرائت کی۔ پس ان لوگوں نے زبان میں اختلاف کیا پھر بھی نبی کریم صلی اللہ علیہ وآلہ وسلم ان سب کی قرائت سے راضی ہوئے اور قبیلہ بنو تمیم لوگوں میں سے زیادہ عربی زبان میں فصیح تھے۔ [مصنف ابن ابي شيبه/كتاب الفضائل/حدیث: 34686]