حضرت ابن سیرین رحمہ اللہ فرماتے ہیں کہ حضرت ابو موسیٰ رضی اللہ عنہ نے حضرت عمر رضی اللہ عنہ سے خط لکھ کر دریافت کیا ان اٹھارہ تجفاف (گھوڑوں کی زرہوں) کے بارے میں جو ان کو ملی تھیں۔ تو حضرت عمر رضی اللہ عنہ نے ان کو جواب میں لکھا: کہ ان زرہوں کو عرب کے سب سے بہادر قبیلہ والوں کے دے دو۔ راوی فرماتے ہیں: کہ آپ رضی اللہ عنہ نے یہ زرہیں بنو ریاح جو بنو تمیم کی ایک شاخ ہے ان کو مرحمت فرما دیں۔ [مصنف ابن ابي شيبه/كتاب الفضائل/حدیث: 34687]

حضرت اسماعیل رحمہ اللہ فرماتے ہیں کہ حضرت شعبی رحمہ اللہ نے ارشاد فرمایا: غزوۂ حدیبیہ والے دن سب سے پہلے بیعت کرنے والے شخص حضرت ابو سنان اسدی رضی اللہ عنہ تھے۔ [مصنف ابن ابي شيبه/كتاب الفضائل/حدیث: 34688]

حضرت ابو وائل رحمہ اللہ فرماتے ہیں کہ قبیلہ بنو اسد کا وفد رسول اللہ صلی اللہ علیہ وسلم کی خدمت میں آیا تو آپ صلی اللہ علیہ وسلم نے ان سے پوچھا: تم کون لوگ ہو؟ انہوں نے عرض کیا: ہمارا تعلق قبیلہ بنو زِنَیَۃ سے ہے۔ اس پر آپ صلی اللہ علیہ وسلم نے فرمایا: تم تو بنو رشدہ ہو۔ (زنیہ سے زنا کی طرف ذہن منتقل ہونے کی وجہ سے بنو رشدہ لقب عطا فرمایا)۔ [مصنف ابن ابي شيبه/كتاب الفضائل/حدیث: 34689]

حضرت ولید رحمہ اللہ فرماتے ہیں کہ حضرت سماک بن حرب رحمہ اللہ نے ارشاد فرمایا: میں نے بنی اسد کے دو ہزار آدمیوں کو پایا جو قادسیہ کی جنگ میں دو ہزار میں شریک ہوئے تھے اور ان کے جھنڈے سماک صاحب مسجد کے ہاتھ میں تھے۔ [مصنف ابن ابي شيبه/كتاب الفضائل/حدیث: 34690]

حضرت عکرمہ رحمہ اللہ فرماتے ہیں کہ حضرت علی رضی اللہ عنہ اپنی تلوار لائے اور حضرت فاطمہ رضی اللہ عنہا سے فرمایا: اس تعریف شدہ کو پکڑو۔ اس پر نبی کریم صلی اللہ علیہ وآلہ وسلم نے فرمایا: اگر آج کے دن تم نے شاندار قتال کیا ہے تو تحقیق شاندار لڑائی سھل بن حنیف، عاصم بن ثابت، حارث بن الصمہ اور ابو دجانہ رضی اللہ عنہ م نے بھی لڑی۔ [مصنف ابن ابي شيبه/كتاب الفضائل/حدیث: 34691]

اور نبی کریم صلی اللہ علیہ وآلہ وسلم نے ارشاد فرمایا: کون شخص اس تلوار کو اس کے حق کے ساتھ پکڑے گا؟ حضرت ابو دجانہ رضی اللہ عنہ نے عرض کیا: میں پکڑوں گا۔ اور تلوار پکڑی پھر اس کے ساتھ لڑے یہاں تک کہ تلوار کو واپس لائے اس حال میں کہ وہ ٹیڑھی ہوچکی تھی۔ اور عرض کیا: اے اللہ کے رسول صلی اللہ علیہ وسلم ! کیا میں نے اس کا حق ادا کردیا؟ آپ صلی اللہ علیہ وسلم نے فرمایا: ہاں! [مصنف ابن ابي شيبه/كتاب الفضائل/حدیث: 34692]

حضرت قیس رحمہ اللہ فرماتے ہیں کہ رسول اللہ صلی اللہ علیہ وسلم نے حضرت بلال رضی اللہ عنہ سے ارشاد فرمایا: تم نے بجلیوں کے قافلے کا کیا کیا؟ تم قسریوں سے پہلے احمسیوں سے شروع کرو۔ [مصنف ابن ابي شيبه/كتاب الفضائل/حدیث: 34693]

حضرت مخارق رحمہ اللہ فرماتے ہیں کہ حضرت طارق رحمہ اللہ نے ارشاد فرمایا: کہ قسر کے وفد نبی کریم صلی اللہ علیہ وآلہ وسلم کی خدمت میں آئے۔ [مصنف ابن ابي شيبه/كتاب الفضائل/حدیث: 34694]

حضرت جابر رحمہ اللہ فرماتے ہیں کہ حضرت عامر رحمہ اللہ نے ارشاد فرمایا: غزوہ بدر میں چھ عجمیوں نے بھی شرکت کی۔ ان میں سے حضرت بلال رضی اللہ عنہ اور حضرت تمیم بھی تھے۔ [مصنف ابن ابي شيبه/كتاب الفضائل/حدیث: 34695]

حضرت ابو نجیح رحمہ اللہ فرماتے ہیں کہ حضرت قیس بن سعد رحمہ اللہ سے مروی ہے آپ رحمہ اللہ نے ارشاد فرمایا: اگر دین ثریا ستارے پر بھی معلق ہوتا تو اہل فارس میں سے کچھ لوگ ضرور وہاں سے ا س کو حاصل کرتے۔ [مصنف ابن ابي شيبه/كتاب الفضائل/حدیث: 34696]