حضرت ابوہریرہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: اگر دین ثریا ستارے پر بھی معلق ہوتا تو اہل فارس کے کچھ لوگ ضرور وہاں سے اس کو حاصل کرتے۔ [مصنف ابن ابي شيبه/كتاب الفضائل/حدیث: 34697]

حضرت قیس رحمہ اللہ فرماتے ہیں کہ حضرت عمر رضی اللہ عنہ نے بدر میں شریک عربی اور اس کے غلام کے لیے پانچ پانچ ہزار کا حصہ مقرر فرمایا اور فرمایا: میں ضرور بالضرور ان کو ان کے سوا پر فضیلت دوں گا۔ [مصنف ابن ابي شيبه/كتاب الفضائل/حدیث: 34698]

حضرت ابو الکنود رحمہ اللہ فرماتے ہیں کہ حضرت خباب بن الارت رضی اللہ عنہ نے اس آیت کے شان نزول کے بارے میں فرمایا: آیت { وَلاَ تَطْرُدِ الَّذِینَ یَدْعُونَ رَبَّہُمْ بِالْغَدَاۃِ وَالْعَشِیِّ یُرِیدُونَ وَجْہَہُ } کہ اقرع بن حابس تمیمی اور عیینہ بن حصن فزاری آئے اور ان لوگوں نے نبی کریم صلی اللہ علیہ وآلہ وسلم کو حضرت بلال رضی اللہ عنہ، حضرت عمار رضی اللہ عنہ، حضرت صہیب رضی اللہ عنہ اور حضرت خباب بن الأرت رضی اللہ عنہ جو مسلمانوں میں سب سے کمزور لوگ تھے ان کے پاس بیٹھا ہوا پایا۔ ان لوگوں نے ہمیں حقیر نظروں سے دیکھا۔ پھر یہ لوگ نبی کریم صلی اللہ علیہ وآلہ وسلم کے پاس آئے اور آپ صلی اللہ علیہ وسلم کو خلوت میں لے گئے اور کہنے لگے: کہ ہم یہ بات پسند کرتے ہیں کہ آپ صلی اللہ علیہ وسلم ہمارے لیے ایک الگ مجلس مقرر کریں تاکہ اہل عرب اس وجہ سے ہماری فضیلت کو جان لیں۔ بیشک اہل عرب کے وفود آپ صلی اللہ علیہ وسلم کے پاس آتے ہیں اور ہم شرم کھاتے ہیں کہ وہ ہمیں ان غلاموں کے ساتھ بیٹھا ہوا دیکھیں۔ لہٰذا جب ہم آپ صلی اللہ علیہ وسلم کے پاس آیا کریں تو آپ صلی اللہ علیہ وسلم ان لوگوں کو ہمارے پاس سے اٹھا دیا کریں، اور جب ہم فارغ ہوجائیں تو پھر اگر آپ صلی اللہ علیہ وسلم چاہیں تو ان کے ساتھ بیٹھ جایا کریں۔ آپ صلی اللہ علیہ وسلم نے فرمایا: جی ہاں! ٹھیک ہے یہ لوگ کہنے لگے۔ آپ صلی اللہ علیہ وسلم ہمیں ایک تحریر لکھ دیں۔ آپ صلی اللہ علیہ وسلم نے دستہ منگوایا تاکہ یہ بات لکھ دی جائے۔ اور حضرت علی رضی اللہ عنہ کو بلایا تاکہ وہ یہ لکھیں۔ جب آپ صلی اللہ علیہ وسلم نے یہ لکھنے کا ارادہ کیا تو ہم لوگ ایک کونے میں بیٹھے ہوئے تھے کہ حضرت جبرائیل علیہ السلام یہ آیات لے کر نازل ہوئے: { وَلاَ تَطْرُدِ الَّذِینَ یَدْعُونَ رَبَّہُمْ بِالْغَدَاۃِ وَالْعَشِیِّ یُرِیدُونَ وَجْہَہُ } سے لے کر { فَتَطْرُدَہُمْ فَتَکُونَ مِنَ الظَّالِمِینَ } تک۔ [مصنف ابن ابي شيبه/كتاب الفضائل/حدیث: 34699]

حضرت حبہ رحمہ اللہ فرماتے ہیں کہ ایک آدمی حضرت علی رضی اللہ عنہ بن ابی طالب کی خدمت میں آیا اور عرض کیا: بیشک میں نے ایک اونٹ خریدا ہے اور میں نے سامان سفر تیار کرلیا ہے اور میرا بیت المقدس جانے کا ارادہ ہے۔ اس پر آپ رضی اللہ عنہ نے فرمایا: اپنے اونٹ کو بیچ دو اور اس مسجد میں نماز پڑھا کرو۔ امام ابوبکر رحمہ اللہ فرماتے ہیں: یعنی کوفہ کی مسجد میں۔ اس لیے کہ مسجد حرام کے بعد کوئی بھی مسجد مجھے اس سے زیادہ محبوب نہیں ہے۔ اس کی اصل بنیاد میں سے پانچ سو ذراع کم کردیے گئے ہیں۔ [مصنف ابن ابي شيبه/كتاب الفضائل/حدیث: 34700]

حضرت اسود رحمہ اللہ فرماتے ہیں کہ حضرت کعب رحمہ اللہ مجھے بیت المقدس میں ملے اور پوچھا: تم کہاں سے آئے ہو؟ میں نے کہا: کوفہ کی جامع مسجد سے۔ آپ رحمہ اللہ نے فرمایا: میں وہاں سے آیا ہوتا جہاں سے تم آئے ہو، تو یہ مجھے اس بات سے زیادہ پسندیدہ ہوتا کہ میں دو ہزار دینار صدقہ کروں اور ان میں سے ہر ایک دینار کو ہر مسکین کے ہاتھ میں دوں۔ پھر قسم اٹھا کر ارشاد فرمایا: بیشک وہ مسجد زمین کے بالکل درمیان میں ہے جیسا کہ تھال کا پیندا ہوتا ہے۔ [مصنف ابن ابي شيبه/كتاب الفضائل/حدیث: 34701]

حضرت ابوہریرہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: جو شخص میری اس مسجد میں آیا …امام ابوبکر رحمہ اللہ فرماتے ہیں یعنی مدینہ منورہ کی مسجد میں … اور وہ نہیں آیا مگر کوئی خیر کی بات سکھانے کے لیے یا سیکھنے کے لیے۔ تو وہ شخص اللہ کے راستہ میں جہاد کرنے والے کے درجہ میں ہے۔ اور جو شخص اس کے علاوہ کسی اور مقصد کے لیے آیا تو وہ ا س شخص کے درجہ میں ہوگا جو کسی دوسرے کا سامان دیکھتا ہے۔ [مصنف ابن ابي شيبه/كتاب الفضائل/حدیث: 34702]

حضرت میمونہ رضی اللہ عنہا ام المؤمنین فرماتی ہیں کہ میں نے رسول اللہ صلی اللہ علیہ وسلم کو یہ ارشاد فرماتے ہوئے سنا: میری اس مسجد میں یعنی مسجد نبوی صلی اللہ علیہ وسلم میں ایک نماز کا پڑھنا اس کے علاوہ کسی اور مسجد میں ہزار نمازوں سے افضل ہے۔ سوائے مکہ کی مسجد کے۔ [مصنف ابن ابي شيبه/كتاب الفضائل/حدیث: 34703]

امام ابوبکر رحمہ اللہ فرماتے ہیں: کہ اہل مصر کے راوی اس حدیث کی سند میں ابن عباس رضی اللہ عنہما کا ذکر نہیں کرتے۔ [مصنف ابن ابي شيبه/كتاب الفضائل/حدیث: 34704]

حضرت اُبیّ بن کعب رضی اللہ عنہ فرماتے ہیں کہ نبی کریم صلی اللہ علیہ وآلہ وسلم نے ارشاد فرمایا: وہ مسجد جس کی بنیاد تقوے پر رکھی گئی ہے وہ میری مسجد ہے۔ [مصنف ابن ابي شيبه/كتاب الفضائل/حدیث: 34705]

حضرت اسید بن ظہیر انصاری رضی اللہ عنہ جو نبی کریم صلی اللہ علیہ وآلہ وسلم کے اصحاب میں سے ہیں فرماتے ہیں کہ نبی کریم صلی اللہ علیہ وآلہ وسلم نے ارشاد فرمایا: مسجد قباء میں نماز پڑھنا عمرہ کے ثواب کے برابر ہے۔ [مصنف ابن ابي شيبه/كتاب الفضائل/حدیث: 34706]