حضرت ابن عباس رضی اللہ عنہما فرماتے ہیں کہ رسول اللہ صلی اللہ علیہ وسلم نے ارشاد فرمایا: جب لوگ اختلاف کرنے لگیں گے تو حق قبیلہ مضر میں ہوگا۔ [مصنف ابن ابي شيبه/كتاب الفضائل/حدیث: 34667]

حضرت سفیان رحمہ اللہ فرماتے ہیں کہ حضرت عمر رضی اللہ عنہ نے ارشاد فرمایا: قبیلہ قیس عرب کے جنگجو ہیں۔ [مصنف ابن ابي شيبه/كتاب الفضائل/حدیث: 34668]

حضرت ابو جحیفہ رضی اللہ عنہ فرماتے ہیں کہ ہم رسول اللہ صلی اللہ علیہ وسلم کی خدمت میں ابطح مقام پر حاضر ہوئے اس حال میں کہ آپ صلی اللہ علیہ وسلم اپنے سرخ خیمہ میں تھے۔ آپ صلی اللہ علیہ وسلم نے پوچھا: تم کون لوگ ہو؟ ہم نے عرض کیا: قبیلہ بنو عامر کے لوگ ہیں۔ آپ صلی اللہ علیہ وسلم نے فرمایا: خوش آمدید۔ تم لوگ مجھ میں سے ہو۔ [مصنف ابن ابي شيبه/كتاب الفضائل/حدیث: 34669]

حضرت نزال رحمہ اللہ فرماتے ہیں کہ رسول اللہ صلی اللہ علیہ وسلم نے ارشاد فرمایا: یقینا ہم لوگ اور تم لوگ زمانہ جاہلیت میں بنو عبد مناف کہلاتے تھے۔ پس آج کے دن ہم بھی بنو عبد اللہ ہیں اور تم بھی بنو عبد اللہ ہو۔ [مصنف ابن ابي شيبه/كتاب الفضائل/حدیث: 34670]

حضرت قتادہ رحمہ اللہ فرماتے ہیں کہ رسول اللہ صلی اللہ علیہ وسلم نے ارشاد فرمایا: اے اللہ! تو میری کفایت فرما: عامر بن طفیل سے اور تو ہدایت عطا فرما قبیلہ بنو عامر بن صعصعہ کو۔ [مصنف ابن ابي شيبه/كتاب الفضائل/حدیث: 34671]

حضرت خشرم جعفری رحمہ اللہ فرماتے ہیں کہ حضرت ملاعب الاسنہ عامر بن مالک رحمہ اللہ نے نبی کریم صلی اللہ علیہ وآلہ وسلم کی طرف ایک قاصد دوا اور اس بیماری سے شفاء مانگنے کے لیے بھیجا جو ان کو لاحق ہوئی تھی۔ تو نبی کریم صلی اللہ علیہ وآلہ وسلم نے ان کی طرف شہد یا شہد کا مشکیزہ بھیج دیا۔ [مصنف ابن ابي شيبه/كتاب الفضائل/حدیث: 34672]

حضرت سعید بن جبیر رحمہ اللہ فرماتے ہیں کہ حضر ت خالد بن سنان العبسی کی بیٹی رسول اللہ صلی اللہ علیہ وسلم کی خدمت میں آئی تو رسول اللہ صلی اللہ علیہ وسلم نے اس کو فرمایا: خوش آمدید میرے بھائی کی بیٹی کو خوش آمدید، نبی کی بیٹی کو جس کو اس کی قوم نے ضائع کردیا تھا۔ [مصنف ابن ابي شيبه/كتاب الفضائل/حدیث: 34673]

حضرت ابو اسحاق رحمہ اللہ فرماتے ہیں کہ نبی کریم صلی اللہ علیہ وآلہ وسلم نے فرمایا: اے بنو عبس والو! تمہاری نشانی کیا ہے؟ انہوں نے عرض کیا: حرام۔ آپ صلی اللہ علیہ وسلم نے فرمایا: بلکہ تمہاری نشانی تو ”حلال“ ہے۔ [مصنف ابن ابي شيبه/كتاب الفضائل/حدیث: 34674]

حضرت مسعود بن حراش رحمہ اللہ جو حضرت ربعی بن حِراش رحمہ اللہ کے بھائی ہیں فرماتے ہیں کہ حضرت عمر بن خطا ب رضی اللہ عنہ نے قبیلہ بنو عبس والوں سے پوچھا: تم لوگ جنگوں میں کون سا گھوڑا زیادہ صابر پاتے ہو؟ انہوں نے عرض کیا: سیاہ و سرخ رنگ کے گھوڑے کو۔ [مصنف ابن ابي شيبه/كتاب الفضائل/حدیث: 34675]

حضرت ابو الزبیر رحمہ اللہ فرماتے ہیں کہ جب رسول اللہ صلی اللہ علیہ وسلم نے طائف والوں کا محاصرہ کیا تو آپ صلی اللہ علیہ وسلم کے صحابہ رضی اللہ عنہ م آپ صلی اللہ علیہ وسلم کی خدمت میں آئے اور کہنے لگے: اے اللہ کے رسول صلی اللہ علیہ وسلم ! ثقیف کے تیروں نے ہمیں جلادیا۔ پس آپ صلی اللہ علیہ وسلم اللہ سے ان کے خلاف بد دعا کریں۔ اس پر آپ صلی اللہ علیہ وسلم نے دعا فرمائی۔ اے اللہ! قبیلہ ثقیف کو ہدایت عطا فرما۔ [مصنف ابن ابي شيبه/كتاب الفضائل/حدیث: 34676]