حضرت اعمش رحمہ اللہ سے مروی ہے کہ ابراہیم نے حجاج کے زمانے میں رے میں جہاد کیا۔ [مصنف ابن ابي شيبه/كتاب السير/حدیث: 35611]

حضرت ابو جمرہ رحمہ اللہ فرماتے ہیں کہ میں نے حضرت ابن عباس رضی اللہ عنہما سے دریافت کیا ان امراء کے ساتھ مل کر لڑنا کیسا ہے جنہوں نے دین میں نئے کام ایجاد کیے اور ظلم کیا؟ فرمایا آپ اپنے آخرت کے حصہ (ثواب) کیلئے لڑو، وہ اپنے دنیا کے حصہ کیلئے لڑتے ہیں۔ [مصنف ابن ابي شيبه/كتاب السير/حدیث: 35612]

سلیمان الیشکری رحمہ اللہ فرماتے ہیں کہ میں نے حضرت جابر رضی اللہ عنہ سے دریافت کیا کہ کیا میں حاکم کے ساتھ مل کر گمراہ لوگوں سے جہاد کروں؟ حضرت جابر رضی اللہ عنہ نے فرمایا: جہاد کرو، کیونکہ تجھ پر صرف وہی ذمہ داری ہے جو تجھ پر ڈالی گئی ہے اور ان پر وہی ہے جو ان پر ڈالی گئی ہے۔ [مصنف ابن ابي شيبه/كتاب السير/حدیث: 35613]

حضرت حسن رحمہ اللہ اور ابن سیرین رحمہ اللہ سے دریافت کیا گیا کہ ظالم حکمرانوں کے ساتھ مل کر لڑنا کیسا ہے؟ آپ دونوں نے فرمایا: آپ کیلئے اس جہاد کا اجر اور شرف ہے اور ان پر ان کا گناہ ہے۔ [مصنف ابن ابي شيبه/كتاب السير/حدیث: 35614]

حضرت محمد بن عبدالرحمن بن یزید النخعی رحمہ اللہ فرماتے ہیں کہ میں نے اپنے والد سے عرض کیا کہ اے ابا! حجاج کے دور امارت میں آپ جہاد میں شریک ہوئے تھے؟ انہوں نے فرمایا اے بیٹے! میں نے تو ان لوگوں کو بھی پایا ہے جو حجاج کے معاملہ میں تم سے زیادہ سخت تھے، لیکن انہوں نے پھر بھی جہاد کو نہ چھوڑا۔ اور اگر لوگوں کی بھی وہی رائے بن جاتی جو آپ کی رائے ہے تو پھر خراج نہ ادا کیا جاتا۔ [مصنف ابن ابي شيبه/كتاب السير/حدیث: 35615]

حضرت ابراہیم رحمہ اللہ سے ذکر کیا گیا کہ کچھ لوگ یوں کہتے ہیں کہ جہاد نہیں ہے حضرت ابراہیم نے فرمایا یہ چیز شیطان ان کے پاس لے کر آیا ہے۔ [مصنف ابن ابي شيبه/كتاب السير/حدیث: 35616]

حضرت مجاہد فرماتے ہیں کہ میں نے حضرت ابن عمر رضی اللہ عنہما سے دریافت کیا کہ ظالم و جابر حکمرانوں کے ساتھ مل کر جہاد کرنا کیسا ہے جبکہ انہوں نے دین میں نئے کام ایجاد کیے ہیں؟ آپ نے فرمایا: جہاد کرو۔ [مصنف ابن ابي شيبه/كتاب السير/حدیث: 35617]

حضرت لیث فرماتے ہیں کہ حضرت مجاہد رحمہ اللہ نے بنو مروان کے ساتھ مل کر جہاد کیا اور حضرت عطاء نے اس میں کوئی حرج نہ سمجھا۔ [مصنف ابن ابي شيبه/كتاب السير/حدیث: 35618]

حضرت ابراہیم فرماتے ہیں کہ حجاج کے دور میں لوگ جب جہاد کیلئے نکلے تو حضرت عبدالرحمن بن یزید بھی اس میں نکلے۔ [مصنف ابن ابي شيبه/كتاب السير/حدیث: 35619]

حضرت طاؤس رحمہ اللہ ظالم و جابر حکمرانوں کے ساتھ مل کر جہاد کرنے کو ناپسند کرتے تھے۔ [مصنف ابن ابي شيبه/كتاب السير/حدیث: 35620]