حضرت ابو رجاء فرماتے ہیں کہ میں نے حسن بصری رحمہ اللہ سے پوچھا: آپ کا مدینہ سے آخری تعلق کب رہا؟ انہوں نے فرمایا: جنگ صفین کے بعد سے میرا رابطہ مدینہ سے ٹوٹ گیا۔ راوی کہتے ہیں میں نے پوچھا: آپ بالغ کب ہوئے؟ آپ رحمہ اللہ نے فرمایا جنگ صفین سے ایک سال بعد۔ [مصنف ابن ابي شيبه/كتاب التاريخ/حدیث: 36194]

حضرت ابن عباس رضی اللہ عنہما سے مروی ہے کہ نبی کریم صلی اللہ علیہ وسلم نے ارشاد فرمایا: حضرت آدم کی عمر ایک ہزار سال تھی، حضرت داؤد علیہ السلام کی عمر ساٹھ سال تھی، حضرت آدم نے فرمایا اے اللہ میری عمر میں سے چالیس سال داؤد کو عطا کر دے، حضرت آدم علیہ السلام کی عمر مکمل ایک ہزار سال کردی گئی اور حضرت داؤد علیہ السلام کی عمر سو سال مکمل کردی گئی۔ [مصنف ابن ابي شيبه/كتاب التاريخ/حدیث: 36195]

حضرت ابن عباس رضی اللہ عنہما فرماتے ہیں کہ حضرت نوح علیہ السلام چالیس سال کی عمر میں مبعوث ہوئے، اور نو سو پچاس سال اپنی قوم کو دعوت دی، اور طوفان کے بعد ساٹھ سال زندہ رہے یہاں تک کہ لوگ بہت زیادہ ہوگئے اور پھیل گئے پورے عالم میں۔ [مصنف ابن ابي شيبه/كتاب التاريخ/حدیث: 36196]

حضرت ابوہریرۃ رضی اللہ عنہارشاد فرماتے ہیں کہ حضرت ابراہیم علیہ السلام کے ختنے قدوم میں ایک سو بیس سال کی عمر میں ہوئے اور اس کے بعد اسی برس زندہ ہے۔ [مصنف ابن ابي شيبه/كتاب التاريخ/حدیث: 36197]

حسن فرماتے ہیں کہ حضرت یوسف علیہ السلام کو سترہ سال کی عمر میں کنویں میں پھینکا گیا، حضرت یوسف غلامی، بادشاہت اور جیل میں اسی برس رہے پھر ان کے بچھڑے ہوئے گھر والوں کو ان کے لیے جمع کردیا گیا، اس کے بعد تیئس سال زندہ رہے۔ [مصنف ابن ابي شيبه/كتاب التاريخ/حدیث: 36198]

حضرت عباس رضی اللہ عنہ سے دریافت کیا گیا کہ آپ صلی اللہ علیہ وسلم بڑے تھے یا آپ رضی اللہ عنہ؟ حضرت عباس رضی اللہ عنہ نے فرمایا وہ مجھ سے بڑے تھے لیکن میں ان سے پہلے پیدا ہوا تھا۔ [مصنف ابن ابي شيبه/كتاب التاريخ/حدیث: 36199]

حضرت ابو وائل رحمہ اللہ سے دریافت کیا گیا کہ آپ بڑے ہیں یا ربیع بن خثیم؟ تو فرمایا میں ان سے عمر میں بڑا ہوں اور وہ مجھ سے عقل میں بڑے ہیں۔ [مصنف ابن ابي شيبه/كتاب التاريخ/حدیث: 36200]

حضرت سعید بن المسیب رحمہ اللہ فرماتے ہیں کہ حضرت ابوبکر رضی اللہ عنہ نے اپنی خلافت کو رسول اکرم صلی اللہ علیہ وسلم کی عمر مبارک پر مکمل کیا اور تریسٹھ برس کی عمر میں انتقال ہوا۔ [مصنف ابن ابي شيبه/كتاب التاريخ/حدیث: 36201]

حضرت عمرو رحمہ اللہ فرماتے ہیں کہ میں نے حضرت ابو عبیدہ رحمہ اللہ سے دریافت کیا کہ آپ کو حضرت عبد اللہ سے سنی ہوئی کوئی بات یاد ہے؟ فرمایا کچھ نہیں یاد۔ [مصنف ابن ابي شيبه/كتاب التاريخ/حدیث: 36202]

حضرت حسن رحمہ اللہ فرماتے ہیں کہ میں نے حضرت عثمان رضی اللہ عنہ کو دیکھا ان پر جگ سے پانی ڈالا جا رہا تھا۔ [مصنف ابن ابي شيبه/كتاب التاريخ/حدیث: 36203]