حضرت عبد اللہ بن عکیم رضی اللہ عنہ فرماتے ہیں کہ ہمارے سامنے رسول اکرم صلی اللہ علیہ وسلم کا مکتوب گرامی پڑھا گیا میں اس وقت نوجوان تھا، اس میں تحریر تھا کہ: مردار کی کھال اور پٹھوں سے نفع مت اٹھاؤ۔ [مصنف ابن ابي شيبه/كتاب التاريخ/حدیث: 36164]

حضرت عون بن ابی جحیفہ رحمہ اللہ اپنے والد سے روایت کرتے ہیں کہ رسول اکرم صلی اللہ علیہ وسلم نے ہمارے پاس زکوٰۃ وصول کرنے والا بھیجا، انہوں نے ہمارے مالد اروں سے صدقہ وصول کر کے ہمارے فقراء میں تقسیم کردیا، میں اس وقت یتیم لڑکا تھا اور میرے پاس مال نہیں تھا، انہوں نے مجھے بھی ایک جوان اونٹنی دی۔ [مصنف ابن ابي شيبه/كتاب التاريخ/حدیث: 36165]

حضرت ابن عباس رضی اللہ عنہما ارشاد فرماتے ہیں کہ آنحضرت صلی اللہ علیہ وسلم پر چالیس سال کی عمر میں وحی نازل ہوئی، آپ صلی اللہ علیہ وسلم تیرہ سال مکہ مکرمہ میں رہے دس سال مدینہ میں رہے، اور تریسٹھ سال کی عمر میں آپ کا وصال ہوا۔ [مصنف ابن ابي شيبه/كتاب التاريخ/حدیث: 36166]

حضرت خالد بن عمیر رحمہ اللہ فرماتے ہیں کہ حضرت عتبہ بن غزوان نے ہمیں خطبہ ارشاد فرمایا اور فرمایا میں نے خود کو رسول اکرم صلی اللہ علیہ وسلم کے ساتھ ساتواں اسلام قبول کرنے والا دیکھا۔ [مصنف ابن ابي شيبه/كتاب التاريخ/حدیث: 36167]

حضرت انس رضی اللہ عنہ بن مالک ارشاد فرماتے ہیں کہ حضور صلی اللہ علیہ وسلم کو چالیس سال کی عمر میں نبوت عطا کی گئی، آپ دس سال مکہ میں رہے، اور دس سال مدینہ میں رہے، اور ساٹھ سال کی عمر میں آپ کا انتقال ہوا۔ [مصنف ابن ابي شيبه/كتاب التاريخ/حدیث: 36168]

حضرت اسماعیل بن ابی خالد رحمہ اللہ فرماتے ہیں کہ میں نے حضرت زر بن حبیش رحمہ اللہ کو دیکھا اس وقت ان کی عمر ایک سو بیس سال تھی، اور ان کے جبڑے بڑھاپے کی وجہ سے ہل رہے تھے، اور میں نے ابو عمرو الشیبانی کو دیکھا اس وقت ان کی عمر ایک سو انیس سال تھی۔ [مصنف ابن ابي شيبه/كتاب التاريخ/حدیث: 36169]

اسماعیل رحمہ اللہ فرماتے ہیں کہ میں نے حضرت زربن حبیش رحمہ اللہ کو مسجد میں دیکھا ان کے جبڑے بڑھاپے کی وجہ سے تھر تھرا رہے تھے، فرمایا کہ میری عمر ایک سو بیس سال ہے۔ [مصنف ابن ابي شيبه/كتاب التاريخ/حدیث: 36170]

حضرت اعمش رحمہ اللہ فرماتے ہیں کہ حضرت شقیق بن سلمہ رحمہ اللہ نے مجھ سے فرمایا اے سلیمان! اگر تو مجھے دیکھ لیتا جنگ بزاخہ کے دن میں حضرت خالد بن ولید سے بھاگنے والوں میں شامل تھا، میں اونٹ سے گرپڑا، قریب تھا کہ میری گردن ٹوٹ جاتی اگر میں مرتا تو میں جہنم میں ہوتا۔ [مصنف ابن ابي شيبه/كتاب التاريخ/حدیث: 36171]

حضرت اعمش رحمہ اللہ فرماتے ہیں کہ حضرت شقیق رحمہ اللہ نے فرمایا اس دن میں گیارہ سال کا تھا۔ [مصنف ابن ابي شيبه/كتاب التاريخ/حدیث: 36172]

حضرت ابوالعالیہ رحمہ اللہ فرماتے ہیں کہ میں نے حضرت عمر رضی اللہ عنہ کو اللھم عافنا واعف عنا فرماتے ہوئے سنا۔ [مصنف ابن ابي شيبه/كتاب التاريخ/حدیث: 36173]