حضرت حسن فرماتے ہیں کہ نبی کریم صلی اللہ علیہ وسلم نے ارشاد فرمایا: تم میں سے کسی کی کمان یا کوڑے کی مقدار جنت میں جگہ دنیا وما فیھا سے بہتر ہے۔ [مصنف ابن ابي شيبه/كتاب الجنة/حدیث: 36728]

حضرت یحییٰ بن ابی کثیر قرآن کریم کی آیت { فِی رَوْضَۃٍ یُحْبَرُونَ } کی تفسیر میں فرماتے ہیں کہ الحبر سے مراد جنت میں سماع ہے گانا سننا ہے۔ [مصنف ابن ابي شيبه/كتاب الجنة/حدیث: 36729]

حضرت حسن فرماتے ہیں کہ نبی کریم صلی اللہ علیہ وسلم نے ارشاد فرمایا: اس ذات کی قسم جس کے قبضہ میں محمد صلی اللہ علیہ وسلم کی جان ہے اگر جنتی عورتوں میں سے کوئی عورت زمین والوں پر جھانک لے تو ساری زمین مشک کی خوشبو سے بھر جائے، جنتی عورت کا نصیف دنیا وما فیھا سے بہتر ہے کیا تمہیں معلوم ہے نصیف سے کیا مراد ہے؟ وہ اوڑھنی ہے۔ [مصنف ابن ابي شيبه/كتاب الجنة/حدیث: 36730]

حضرت ابو سعید رضی اللہ عنہ سے مروی ہے کہ نبی کریم صلی اللہ علیہ وسلم نے ارشاد فرمایا: جنت میں ایک بالشت جگہ دنیا ومافیھا سے بہتر ہے۔ [مصنف ابن ابي شيبه/كتاب الجنة/حدیث: 36731]

حضرت ابن عمر رضی اللہ عنہما سے مروی ہے کہ ایک ادنیٰ جنتی کا رتبہ یہ ہوگا کہ ایک شخص کے ہزار محل ہوں گے اور ہر دو محلوں کے درمیان ایک سال کا فاصلہ ہوگا وہ دیکھے اس کی انتہاء کو جیسے ان کے قریب کو دیکھے گا ہر محل میں حورعین، خوشبو دار پودے اور غلمان ہوں گے جو بھی وہ طلب کریں گے وہ ان کو پیش کردیا جائے گا۔ [مصنف ابن ابي شيبه/كتاب الجنة/حدیث: 36732]

حضرت مغیث سے مروی ہے کہ جنت میں کچھ محل سونے کے، کچھ چاندی کے، کچھ یا قوت کے، کچھ زبر جد کے ہیں، اس کے پہاڑ مشک کے اور مٹی ورس اور زعفران کی ہے۔ [مصنف ابن ابي شيبه/كتاب الجنة/حدیث: 36733]

حضرت انس رضی اللہ عنہ فرماتے ہیں کہ جنتیوں میں ایک کہے گا، ہمیں بازار لے چلو، پھر وہ مشک کے پہاڑوں پر آئیں گے اور وہاں بیٹھ کر باہم گفتگو کریں گے۔ [مصنف ابن ابي شيبه/كتاب الجنة/حدیث: 36734]

ابراہیم تیمی فرماتے ہیں کہ مجھے یہ بات پہنچی ہے کہ ایک جنتی شخص کو سو بندوں کی شہوت عطا کی جائے گی ان کا کھانا اور ان کی ضرورت اور خواہش، جب وہ کھا چکے گا تو وہ کھانا پاکیزہ شراب بن جائے گا جو اس کے بدن سے مشک کے پسینے کی طرح پسینہ بن کر نکلے گا اور اس کی شہوت اور خواہش دوبارہ ازسر نو لوٹ آئے گی۔ [مصنف ابن ابي شيبه/كتاب الجنة/حدیث: 36735]

حضرت عبد اللہ بن عمرو رضی اللہ عنہما سے مروی ہے کہ قیامت کے دن سب کو جمع کیا جائے گا پھر پکارا جائے گا اس امت کے فقراء اور مساکین کہاں ہیں؟ پھر ان کو لایا جائے گا اور ان سے پوچھا جائے گا تمہارے پاس کیا ہے کیا لے کر آئے ہو؟ وہ عرض کریں گے اے ہمارے رب! آپ نے ہمیں مختلف مصیبتوں میں آزمایا ہم ثابت قدم رہے آپ کو معلوم ہے راوی فرماتے ہیں کہ میرا خیال ہے انہوں نے یہ بھی کہا: آپ نے اموال اور بادشاہت کو ہم سے پھیر کر دوسروں کو دیے رکھا ان کو کہا جائے گا تم نے سچ کہا، ان کو تمام لوگوں سے کچھ عرصہ قبل جنت میں داخل کردیا جائے گا اور حساب وکتاب کی شدت مالداروں اور بادشاہوں پر باقی رہے گی، راوی کہتے ہیں کہ میں نے عرض کیا اس دن مومنین کہاں ہوں گے؟ فرمایا ان کیلئے نور کی کرسی رکھی جائے گی، ان پر بادلوں کا سایہ ہوگا، اور وہ دن ان پر دن کی گھڑی سے بھی کم وقت میں گزر جائے گا۔ [مصنف ابن ابي شيبه/كتاب الجنة/حدیث: 36736]

حضرت انس رضی اللہ عنہ سے مروی ہے کہ حضرت عبد اللہ بن سلام رضی اللہ عنہ مدینہ میں نبی کریم صلی اللہ علیہ وسلم کی خدمت میں حاضر ہوئے اور دریافت فرمایا کہ جنتی لوگ پہلی چیز کیا کھائیں گے؟ نبی کریم صلی اللہ علیہ وسلم نے ارشاد فرمایا حضرت جبرائیل علیہ السلام نے مجھے ابھی بتایا ہے کہ جنتی لوگوں کی سب سے پہلے خوراک مچھلی کے جگر کا بڑھا ہوا حصہ ہوگا۔
حضرت محمد بن کعب فرماتے ہیں کہ جنت میں بجلی کی طرح کی ایک چیز دکھائی دیتی ہے، پوچھا جاتا ہے: یہ کیا ہے؟ کہا جاتا ہے: علیین والوں میں سے ایک شخص ہے جو ایک بالاخانے سے دوسرے بالاخانے میں منتقل ہوا ہے۔ [مصنف ابن ابي شيبه/كتاب الجنة/حدیث: 36737]