حضرت عبدالرحمن بن ابی لیلیٰ سے روایت ہے وہ کہتے ہیں کہ روح ایک فرشتے کے ہاتھ میں ہے جس کو لے کر وہ چلتا ہے۔ پھر جب وہ قبر میں داخل ہوتا ہے تو اس کو اس میں ڈال دیتا ہے۔ [مصنف ابن ابي شيبه/كتاب الزهد/حدیث: 37684]

حضرت اعمش سے روایت ہے وہ کہتے ہیں کہ حضرت عبدالرحمن بن ابی لیلیٰ نماز پڑھا کرتے تھے۔ پھر جب کوئی شخص ملاقات کے لیے آتا تو اپنے بستر پر آتے اور اس پر تکیہ لگاتے۔ [مصنف ابن ابي شيبه/كتاب الزهد/حدیث: 37685]

حضرت عبدالرحمن بن ابی لیلیٰ قرآن مجید کی آیت { لاَ یَرْہَقُ وُجُوہَہُمْ قَتَرٌ وَلاَ ذِلَّۃٌ} کی تفسیر میں فرماتے ہیں کہ ان کی یہ حالت اپنے ربّ کی طرف دیکھنے کے بعد ہوگی۔ [مصنف ابن ابي شيبه/كتاب الزهد/حدیث: 37686]

حضرت عبدالرحمن بن ابی لیلیٰ سے روایت ہے وہ کہتے ہیں کہ مشرکین کہیں گے ”ہائے ہماری ہلاکت! ہمیں کس نے ہماری قبروں سے اٹھا دیا۔“ فرمایا: اور مومن کہیں گے: ”یہ وہ ہے جس کا رحمن نے وعدہ کیا تھا اور جس کے بارے میں رسولوں نے سچ کہا تھا۔“ [مصنف ابن ابي شيبه/كتاب الزهد/حدیث: 37687]

حضرت ابوسلمہ سے روایت ہے کہ جناب نبی کریم صلی اللہ علیہ وآلہ وسلم کے صحابہ کنجوسی کرنے والے اور عبادت میں مردوں جیسی کمزوری کا اظہار کرنے والے نہ تھے۔ وہ اپنی مجالس میں شعر پڑھتے تھے اور زمانہ جاہلیت کی باتیں یاد کرتے تھے۔ لیکن جب ان کے دین کے کسی معاملہ میں ان میں سے کسی پر ارادہ کیا جاتا تو اس کی آنکھوں کے پپوٹے یوں گھومتے گویا کہ وہ مجنون ہے۔ [مصنف ابن ابي شيبه/كتاب الزهد/حدیث: 37688]

حضرت ابوسلمہ بیان کرتے ہیں کہ روز قیامت سے پہلے والی رات تین راتوں کے بقدر ہوگی۔ چناچہ خوفِ خدا رکھنے والے لوگ اٹھیں گے اور نماز پڑھیں گے یہاں تک کہ جب وہ اپنی نماز سے فارغ ہوجائیں گے واپس جا کر سوجائیں گے۔ یہاں تک کہ ان کے پہلو تھک جائیں گے۔ پھر وہ اٹھ کر نماز پڑھیں گے یہاں تک کہ جب وہ اپنی نماز سے فارغ ہوں گے تو وہ سورج کو اس کے طلوع ہونے کی جگہ سے انتظار کرنے لگیں گے۔ لیکن پھر ناگہاں سورج، مغرب سے نکلے گا۔ [مصنف ابن ابي شيبه/كتاب الزهد/حدیث: 37689]

حضرت عون بن عبد اللہ سے روایت ہے وہ کہتے ہیں کہ کمال تقویٰ میں سے یہ ہے کہ تم تقویٰ کی جو بات جانتے ہو اس کے ساتھ اس کا علم بھی تلاش کرو جو تم نہیں جانتے اور جان لو کہ تمہارے علم کا نقص اس میں زیادتی کی تلاش کو ترک کرنا ہے۔ اور آدمی کو اپنے علم میں زیادتی کی تلاش ترک کرنے پر صرف یہ بات آمادہ کرتی ہے کہ وہ اپنے علم سے کم نفع اٹھاتا ہے۔ [مصنف ابن ابي شيبه/كتاب الزهد/حدیث: 37690]

حضرت عون سے روایت ہے وہ کہتے ہیں کہ تیرے تکبر کے لیے یہی بات کافی ہے کہ تو اپنی فضیلت کی وجہ سے غیر پر پکڑکرے۔ [مصنف ابن ابي شيبه/كتاب الزهد/حدیث: 37691]

حضرت عون سے روایت ہے وہ کہتے ہیں کہ غافلین میں ذاکر ایسے ہے جیسے بھاگنے والوں میں لڑنے والا۔ اور ذاکرین میں غافل ایسا ہے جیسے لڑنے والوں میں بھاگنے والا۔ [مصنف ابن ابي شيبه/كتاب الزهد/حدیث: 37692]

حضرت عون سے روایت ہے وہ کہتے ہیں کہ اللہ تعالیٰ نے گناہ سے قبل ہی معافی کا بتادیا: ”اللہ نے آپ کو معاف کردیا آپ نے انہیں اجازت کیوں دی۔“ [مصنف ابن ابي شيبه/كتاب الزهد/حدیث: 37693]