سیدنا جابر رضی اللہ عنہ بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی: ”جو شخص اللہ تعالیٰ پر اور آخرت کے دن پر ایمان رکھتا ہو، اس پر جمعہ کے دن نماز جمعہ ادا کرنا لازم ہے، البتہ بیمار شخص، مسافر شخص، عورت، (نابالغ) بچے اور غلام کا حکم مختلف ہے (ان پر جمعہ فرض نہیں)، تو جو شخص کسی دلچسپی کی چیز یا تجارت کی وجہ سے اس سے بے نیازی اختیار کرے (یعنی اسے ادا نہ کرے)، تو اللہ تعالیٰ اس شخص سے بے نیازی اختیار کرے گا، اور اللہ تعالیٰ بے نیاز ہے اور لائق حمد ہے۔“ [سنن الدارقطني/ كتاب الجمعة/حدیث: 1576]

طارق بن شہاب، نبی کریم صلی اللہ علیہ وسلم کا یہ فرمان نقل کرتے ہیں: ”سب لوگوں پر جمعہ پڑھنا واجب ہے، صرف چار پر نہیں ہے: غلام شخص، (نابالغ) بچہ، بیمار اور عورت۔“ [سنن الدارقطني/ كتاب الجمعة/حدیث: 1577]

سیدنا ابوہریرہ رضی اللہ عنہ بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی: ”(ہم دنیا میں) بعد میں آنے والے ہیں اور قیامت کے دن آگے ہونے والے ہوں گے، اس کی وجہ یہ ہے: ان لوگوں کو ہم سے پہلے کتاب دی گئی اور ہم کو ان کے بعد کتاب دی گئی، تو یہ وہ دن ہے، جسے اللہ تعالیٰ نے ان لوگوں پر لازم کیا تھا اور پھر اللہ تعالیٰ نے اس کے بارے میں ہماری رہنمائی کی، تو اس بارے میں لوگ ہمارے پیروکار ہیں، یہودیوں کا دن کل (ہفتے کا دن ہے) اور عیسائیوں کا دن کے بعد والا (اتوار کا دن) ہے۔“ [سنن الدارقطني/ كتاب الجمعة/حدیث: 1578]

عطاء بن ابی رباح، سیدنا جابر بن عبداللہ رضی اللہ عنہ کا یہ فرمان نقل کرتے ہیں: ”یہ طریقہ چلا آرہا ہے، جب تین لوگ موجود ہوں، تو ان میں سے ایک امام ہو گا اور جہاں چالیس لوگ یا اس سے زیادہ وہ لوگ ہوں، تو وہاں جمعہ کی نماز بھی ہو گی، عید الضحیٰ کی نماز بھی ہو گی اور عید الفطر کی نماز بھی ہو گی، اس کی وجہ یہ ہے: یہ لوگ ایک جماعت شمار ہوتے ہیں۔“ [سنن الدارقطني/ كتاب الجمعة/حدیث: 1579]

سیدنا ابوامامہ رضی اللہ عنہ بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی: ”(جس بستی میں) پچاس افراد ہوں، ان پر جمعہ لازم ہو گا، اس سے کم پر واجب نہیں ہو گا۔“ اس روایت کا راوی جعفر بن زبیر متروک ہے۔ [سنن الدارقطني/ كتاب الجمعة/حدیث: 1580]

سیدنا ابوامامہ رضی اللہ عنہ بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی: ”پچاس افراد پر جمعہ پڑھنا لازم ہے۔“ [سنن الدارقطني/ كتاب الجمعة/حدیث: 1581]

سیدنا عبداللہ بن عمر رضی اللہ عنہما، نبی کریم صلی اللہ علیہ وسلم کا یہ فرمان نقل کرتے ہیں: ”مسافر شخص پر جمعہ پڑھنا لازم نہیں ہے۔“ [سنن الدارقطني/ كتاب الجمعة/حدیث: 1582]

سیدنا جابر بن عبداللہ رضی اللہ عنہما بیان کرتے ہیں: ایک مرتبہ نبی کریم صلی اللہ علیہ وسلم جمعہ کے دن ہمیں خطبہ دے رہے تھے۔ اسی دوران ایک قافلہ آیا، جو اناج لے کر آیا تھا اور وہ قافلہ کھلے میدان میں ٹھہر گیا۔ لوگ اس کی طرف متوجہ ہو گئے اور اس کی طرف چلے گئے اور نبی کریم صلی اللہ علیہ وسلم کو چھوڑ گئے۔ نبی کریم صلی اللہ علیہ وسلم کے ساتھ صرف چالیس افراد رہ گئے، جن میں میں بھی شامل تھا۔ تو اللہ تعالیٰ نے نبی کریم صلی اللہ علیہ وسلم پر یہ آیت نازل کی: ”اور جب انہوں نے تجارت اور دلچسپی کی چیز کو دیکھا، تو اس کی طرف چلے گئے اور تمہیں قیام کی حالت میں چھوڑ گئے۔“ صرف علی بن عامر رحمہ اللہ نامی راوی نے اس روایت میں چالیس افراد کی موجودگی کا تذکرہ کیا ہے، جبکہ دیگر راویوں نے یہ بات ذکر کی ہے کہ نبی کریم صلی اللہ علیہ وسلم کے ساتھ صرف بارہ افراد رہ گئے تھے۔ [سنن الدارقطني/ كتاب الجمعة/حدیث: 1583]

سیدنا جابر رضی اللہ عنہ بیان کرتے ہیں: نبی کریم صلی اللہ علیہ وسلم جمعہ کے دن کھڑے ہو کر خطبہ دے رہے تھے، اس دوران قافلہ آیا (اس کے بعد راوی نے پوری حدیث نقل کی ہے، جس کے بعد یہ الفاظ ہیں:) سیدنا جابر رضی اللہ عنہ نے فرمایا: ”نبی کریم صلی اللہ علیہ وسلم کے ساتھ صرف بارہ افراد باقی رہ گئے، جن میں سیدنا ابوبکر اور سیدنا عمر رضی اللہ عنہما بھی شامل تھے۔“ [سنن الدارقطني/ كتاب الجمعة/حدیث: 1584]

محمد بن ابوامامہ اپنے والد کے حوالے سے سیدنا عبدالرحمن بن کعب رضی اللہ عنہ کا یہ بیان نقل کرتے ہیں: میں اپنے والد کو ساتھ لے کر جایا کرتا تھا، جب ان کی بینائی رخصت ہو گئی تھی، ایک مرتبہ میں انہیں لے کر جمعہ کی نماز ادا کرنے کے لیے گیا، تو انہوں نے اذان کی آواز سننے کے بعد سیدنا ابوامامہ رضی اللہ عنہ کے لیے دعائے رحمت کی اور دعائے مغفرت کی اور پھر کچھ دیر اسی حالت میں رہے، وہ جب بھی جمعہ کی اذان سنا کرتے تھے، وہ ایسا ہی کیا کرتے تھے، میں نے ان سے دریافت کیا: ”اے ابا جان! آپ جب بھی جمعہ کی اذان سنتے ہیں، تو سیدنا ابوامامہ رضی اللہ عنہ کے لیے دعائے استغفار کرتے ہیں، اس کی وجہ کیا ہے؟“ تو انہوں نے جواب دیا: ”اے میرے بیٹے! وہ (سیدنا ابوامامہ رضی اللہ عنہ) پہلے فرد ہیں، جنہوں نے مدینہ میں بنو بیاضہ کے پتھریلے میدان کی پست زمین میں جمعہ کا آغاز کیا تھا، اس جگہ کا نام ’نقیع الخضمات‘ ہے،“ راوی بیان کرتے ہیں: میں نے دریافت کیا کہ اس وقت آپ لوگوں کی تعداد کتنی تھی؟ تو انہوں نے جواب دیا: ”چالیس افراد تھے۔“ [سنن الدارقطني/ كتاب الجمعة/حدیث: 1585]