حضرت انس رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”میں اور قیامت اس طرح متصل بھیجے گئے ہیں،“ شعبہ نے (اسے) نقل کرتے ہوئے اپنی دونوں انگلیوں، شہادت کی اور درمیانی (انگلی) کو ملایا۔ [صحيح مسلم/كتاب الفتن وأشراط الساعة/حدیث: 7405]

امام صاحب رحمہ اللہ دو اور اساتذہ کی سندوں سے، ابو تیاح رحمہ اللہ سے یہ حدیث بیان کرتے ہیں۔ [صحيح مسلم/كتاب الفتن وأشراط الساعة/حدیث: 7406]

یہی روایت امام صاحب ایک اور استاد سے، حمزہ ضبی اور ابو تیاح سے بیان کرتے ہیں۔ [صحيح مسلم/كتاب الفتن وأشراط الساعة/حدیث: 7407]

حضرت انس رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”میں اور قیامت ان دو انگلیوں کی طرح متصل بھیجے گئے ہیں“ اور آپ صلی اللہ علیہ وسلم نے شہادت کی انگلی کو درمیان والی انگلی سے ملایا۔ [صحيح مسلم/كتاب الفتن وأشراط الساعة/حدیث: 7408]

حضرت عائشہ رضی اللہ عنہا بیان کرتی ہیں کہ بدو جب رسول اللہ صلی اللہ علیہ وسلم کے پاس آتے تو آپ سے قیامت کے بارے میں پوچھتے کہ قیامت کب ہوگی؟ تو آپ ان میں سے سب سے نوخیز (عمر) انسان کو دیکھ کر فرماتے: ”اگر یہ زندہ رہا تو اس کو بوڑھا ہونے سے پہلے تمہاری قیامت یعنی موت واقع ہو جائے گی۔“ [صحيح مسلم/كتاب الفتن وأشراط الساعة/حدیث: 7409]

حضرت انس رضی اللہ عنہ سے روایت ہے کہ ایک آدمی نے رسول اللہ صلی اللہ علیہ وسلم سے پوچھا: قیامت کب قائم ہوگی؟ آپ صلی اللہ علیہ وسلم کے پاس محمد نامی ایک انصاری لڑکا تھا، چنانچہ رسول اللہ صلی اللہ علیہ وسلم نے فرمایا: ”اگر یہ نوعمر زندہ رہا، تو ممکن ہے، یا بوڑھا نہ ہو سکے، حتیٰ کہ (اس نسل کی) قیامت قائم ہو جائے۔“ [صحيح مسلم/كتاب الفتن وأشراط الساعة/حدیث: 7410]

حضرت انس بن مالک رضی اللہ عنہ سے روایت ہے کہ ایک شخص نے نبی کریم صلی اللہ علیہ وسلم سے سوال کیا: قیامت کب قائم ہو گی؟ رسول اللہ صلی اللہ علیہ وسلم تھوڑی دیر خاموش رہے، پھر آپ صلی اللہ علیہ وسلم نے اپنے سامنے بیٹھے ازد شنوءہ کے ایک لڑکے کی طرف نظر کی، پھر فرمایا: ”اگر یہ لڑکا لمبی عمر پا گیا تو اسے بڑھاپا نہیں آیا ہو گا کہ (تمہاری) قیامت قائم ہو جائے گی۔“ (معبد نے) کہا: حضرت انس رضی اللہ عنہ نے کہا: وہ لڑکا اس دن میرا ہم عمر (17 سال کا) تھا۔ [صحيح مسلم/كتاب الفتن وأشراط الساعة/حدیث: 7411]

حضرت انس رضی اللہ عنہ بیان کرتے ہیں کہ حضرت مغیرہ بن شعبہ رضی اللہ عنہ کا ایک غلام جو میرا ہم عمر تھا، گزرا، تو نبی اکرم صلی اللہ علیہ وسلم نے فرمایا: ”اگر اس کی موت مؤخر ہوئی، تو اسے بڑھاپا نہیں پا سکے گا، حتیٰ کہ قیامت قائم ہو جائے گی۔“ [صحيح مسلم/كتاب الفتن وأشراط الساعة/حدیث: 7412]

حضرت ابوہریرہ رضی اللہ عنہ نبی اکرم صلی اللہ علیہ وسلم سے بیان کرتے ہیں، آپ صلی اللہ علیہ وسلم نے فرمایا: ”قیامت آئے گی تو ایک آدمی اونٹنی کا دودھ نکال رہا ہوگا وہ برتن اس کے منہ تک نہ پہنچا ہوگا کہ قیامت قائم ہوجائے گی اور دو آدمی کپڑے کا سودا کررہے ہوں گے انھوں نے خریدوفروخت(مکمل) نہیں کی ہوگی کہ قیامت قائم ہوجائے گی، ایک شخص اپنے حوض میں لپائی کررہا ہوگا وہ باہر نہیں نکل پایا ہوگا کہ قیامت قائم ہوجائے گی۔“ [صحيح مسلم/كتاب الفتن وأشراط الساعة/حدیث: 7413]

حضرت ابوہریرہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”دو بار صور پھونکنے کے درمیان چالیس کا وقفہ ہو گا۔“ انہوں نے (لوگوں نے) کہا: اے ابوہریرہ! کیا چالیس دن؟ انہوں نے کہا: میں نے (تعین سے) انکار کیا ہے۔ لوگوں نے کہا: کیا چالیس مہینے؟ انہوں نے کہا: میں نے (تعین سے) انکار کیا ہے۔ لوگوں نے کہا: کیا چالیس سال؟ انہوں نے کہا: میں نے (تعین سے) انکار کیا ہے۔ (آپ صلی اللہ علیہ وسلم نے فرمایا:) ”پھر اللہ تعالیٰ آسمان سے پانی نازل فرمائے گا تو لوگ اسی طرح اگیں گے جس طرح سبزہ اگتا ہے۔“ انہوں نے (حضرت ابوہریرہ رضی اللہ عنہ نے) کہا کہ (نبی صلی اللہ علیہ وسلم نے فرمایا:) ”اور انسان کا کوئی حصہ نہیں مگر وہ بوحضرت ہو جائے گا، سوائے ایک ہڈی کے، وہ دمچی کی ہڈی کا آخری حصہ ہے، قیامت کے دن اسی سے خلقت کی ترکیب مکمل ہو گی۔“ [صحيح مسلم/كتاب الفتن وأشراط الساعة/حدیث: 7414]