سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم جب رکوع سے سر اٹھا لیتے تھے تو یہ پڑھتے تھے: «اللَّهُمَّ رَبَّنَا لَكَ الْحَمْدُ مِلْءَ السَّمَاوَاتِ وَمِلْءَ الْأَرْضِ وَمِلْءَ مَا شِئْتَ مِنْ شَيْءٍ بَعْدُ، أَهْلَ الثَّنَاءِ وَالْمَجْدِ، لَا مَانِعَ لِمَا أَعْطَيْتَ، وَلَا مُعْطِيَ لِمَا مَنَعْتَ، وَلَا يَنْفَعُ ذَا الْجَدِّ مِنْكَ الْجَدُّ» ”اے اللہ! اے ہمارے پروردگار! حمد تیرے لیے مخصوص ہے، جو آسمانوں جتنی بھری ہوئی ہو اور زمین جتنی بھری ہوئی ہو اور اس کے بعد جو چیز تو چاہے اتنی بھری ہوئی ہو، تو تعریف اور بزرگی کا اہل ہے، جس کو تو عطا کر دے اسے کوئی روکنے والا نہیں ہے اور جسے تو نہ دے اسے کوئی کچھ دینے والا نہیں ہے اور تیری مرضی کے مقابلے میں کسی بھی صاحبِ حیثیت شخص کی حیثیت فائدہ نہیں دیتی ہے۔“ [صحیح ابن حبان/كتاب الصلاة/حدیث: 1906]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جب امام «سَمِعَ اللّٰهُ لِمَنْ حَمِدَهٗ» کہے، تو تم لوگ یہ کہو ”اے اللہ! اے ہمارے پروردگار! حمد تیرے ہی لیے مخصوص ہے۔“ کیونکہ جس شخص کا یہ کہنا فرشتوں کے کہنے کے ہمراہ ہو، اس شخص کے گزشتہ گناہوں کی مغفرت ہو جاتی ہے۔“ [صحیح ابن حبان/كتاب الصلاة/حدیث: 1907]

سیدنا انس رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جب امام «سَمِعَ اللّٰهُ لِمَنْ حَمِدَهٗ» پڑھے تو تم لوگ یہ کہو: ”اے اللہ! ہمارے پروردگار! حمد تیرے ہی لیے مخصوص ہے۔“” [صحیح ابن حبان/كتاب الصلاة/حدیث: 1908]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جب امام «سَمِعَ اللّٰهُ لِمَنْ حَمِدَهُ» ”اللہ نے اس کی بات سن لی جس نے اس کی تعریف کی“ پڑھے تو تم «رَبَّنَا لَكَ الْحَمْدُ» ”اے ہمارے رب! تیرے ہی لیے تمام تعریفیں ہیں“ پڑھو۔“ [صحیح ابن حبان/كتاب الصلاة/حدیث: 1909]

سیدنا رفاعہ بن رافع زرقی رضی اللہ عنہ بیان کرتے ہیں: ایک دن ہم نبی اکرم صلی اللہ علیہ وسلم کے پیچھے نماز ادا کر رہے تھے جب آپ صلی اللہ علیہ وسلم نے رکوع سے سر اٹھایا، تو آپ صلی اللہ علیہ وسلم نے «سَمِعَ اللَّهُ لِمَنْ حَمِدَهُ» فرمایا، آپ کے پیچھے ایک شخص نے یہ کلمات پڑھے: «رَبَّنَا وَلَكَ الْحَمْدُ حَمْدًا كَثِيرًا طَيِّبًا مُبَارَكًا فِيهِ» ”اے ہمارے پروردگار! حمد تیرے ہی لئے مخصوص ہے۔ ایسی حمد جو زیادہ ہو پاکیزہ ہو اس میں برکت موجود ہو۔“ جب نبی اکرم صلی اللہ علیہ وسلم نے نماز مکمل کی تو آپ صلی اللہ علیہ وسلم نے دریافت فرمایا: ”ابھی کلام کرنے والا شخص کون تھا؟“ ایک صاحب نے عرض کی: یا رسول اللہ صلی اللہ علیہ وسلم میں تھا، نبی اکرم صلی اللہ علیہ وسلم نے ارشاد فرمایا: ”میں نے تیس سے زیادہ فرشتوں کو دیکھا، وہ ان کلمات کی طرف لپکے، ان میں سے کون پہلے ان کلمات کو نوٹ کرتا ہے۔“ [صحیح ابن حبان/كتاب الصلاة/حدیث: 1910]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جب امام «سَمِعَ اللّٰهُ لِمَنْ حَمِدَهُ» ”اللہ نے اس کی سن لی جس نے اس کی تعریف کی“ کہے، تو تم لوگ «اللّٰهُمَّ رَبَّنَا وَلَكَ الْحَمْدُ» ”اے اللہ! اے ہمارے رب! تیرے ہی لیے تمام تعریف ہے“ پڑھو، جس شخص کا یہ پڑھنا فرشتوں کے کہنے کے ہمراہ ہو گا، اس شخص کے گزشتہ گناہوں کی مغفرت ہو جائے گی۔“ [صحیح ابن حبان/كتاب الصلاة/حدیث: 1911]

سیدنا وائل بن حجر رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کو دیکھا، جب آپ سجدے میں گئے تو آپ نے اپنے دونوں گھٹنے دونوں ہاتھوں سے پہلے زمین پر رکھے اور جب آپ اٹھے تو آپ نے دونوں گھٹنوں سے پہلے دونوں ہاتھ اٹھائے۔ [صحیح ابن حبان/كتاب الصلاة/حدیث: 1912]

ابوصالح بیان کرتے ہیں: میں نبی اکرم صلی اللہ علیہ وسلم کی زوجہ محترمہ سیدہ ام سلمہ رضی اللہ عنہا کے پاس موجود تھا، ان کے رشتے داروں میں سے ایک نوجوان ان کے پاس آیا جس کے بڑے بڑے بال تھے، وہ کھڑا ہو کر نماز ادا کرنے لگا، جب وہ سجدے میں جانے لگا تو اس نے پہلے پھونک ماری، تو سیدہ ام سلمہ رضی اللہ عنہا نے فرمایا: تم ایسا نہ کرو کیونکہ نبی اکرم صلی اللہ علیہ وسلم نے ہمارے ایک سیاہ فام لڑکے کو یہ فرمایا تھا: «تَرِّبْ وَجْهَكَ يَا رَبَاحُ» ”اے رباح! (سجدے کے دوران) تم اپنے چہرے کو خاک آلود کرو۔“ [صحیح ابن حبان/كتاب الصلاة/حدیث: 1913]

سیدنا عبداللہ بن عمر رضی اللہ عنہما روایت کرتے ہیں: نبی اکرم صلی اللہ علیہ وسلم نے ارشاد فرمایا ہے: ”جب تم نماز ادا کر رہے ہو تو اپنے بازوؤں کو یوں نہ بچھاؤ جس طرح درندے بچھاتے ہیں، تم اپنی ہتھیلیوں پر ٹیک لگاؤ اور اپنے بازوؤں کو اپنے پہلو سے دور رکھو، جب تم ایسا کرو گے تو تمہارا ہر عضو سجدہ کرے گا۔“ [صحیح ابن حبان/كتاب الصلاة/حدیث: 1914]

سیدنا براء رضی اللہ عنہ بیان کرتے ہیں: نبی اکرم صلی اللہ علیہ وسلم اپنی دونوں ہتھیلیوں پر سجدہ کیا کرتے تھے۔ [صحیح ابن حبان/كتاب الصلاة/حدیث: 1915]