سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم نے پردہ ہٹایا تو لوگ سیدنا ابوبکر رضی اللہ عنہ کے پیچھے صفیں بنائے ہوئے تھے، نبی اکرم صلی اللہ علیہ وسلم نے فرمایا: ”اے لوگو! نبوت کے مبشرات میں سے اب صرف سچے خواب باقی رہ گئے ہیں، جنہیں کوئی مسلمان دیکھتا ہے یا جو اسے دکھائے جاتے ہیں۔“ پھر آپ صلی اللہ علیہ وسلم نے ارشاد فرمایا: ”خبردار! مجھے اس بات سے منع کیا گیا ہے کہ میں رکوع یا سجدے کے دوران تلاوت کروں۔ جہاں تک رکوع کا تعلق ہے، تو تم اس میں پروردگار کی عظمت کا اعتراف کرو اور جہاں تک سجدے کا تعلق ہے، تو تم اس میں اہتمام کے ساتھ دعا مانگو کیونکہ وہ اس لائق ہو گی کہ اسے تمہارے لیے مستجاب کیا جائے۔“ [صحیح ابن حبان/كتاب الصلاة/حدیث: 1896]

سیدنا حذیفہ رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کی اقتدا میں نماز ادا کی، جب آپ رکوع میں گئے، تو آپ نے ” «سُبْحَانَ رَبِّيَ الْعَظِيمِ» “ پڑھنا شروع کیا، پھر جب آپ سجدے میں گئے تو آپ نے ” «سُبْحَانَ رَبِّيَ الْأَعْلَىٰ» “ پڑھا۔ [صحیح ابن حبان/كتاب الصلاة/حدیث: 1897]

سیدنا عقبہ بن عامر رضی اللہ عنہ بیان کرتے ہیں: جب یہ آیت ﴿فَسَبِّحْ بِاسْمِ رَبِّكَ الْعَظِيمِ﴾ [سورة الواقعة: 74] ”تم اپنے عظیم پروردگار کے اسم کی تسبیح بیان کرو“ نازل ہوئی تو نبی اکرم صلی اللہ علیہ وسلم نے ارشاد فرمایا: ”تم اسے اپنے رکوع میں شامل کر لو۔“ جب یہ آیت ﴿سَبِّحِ اسْمَ رَبِّكَ الْأَعْلَى﴾ [سورة الأعلى: 1] ”تم اپنے اعلیٰ پروردگار کے اسم کی تسبیح بیان کرو“ نازل ہوئی تو نبی اکرم صلی اللہ علیہ وسلم نے ارشاد فرمایا: ”تم لوگ اسے اپنے سجود میں شامل کر لو۔“ (امام ابن حبان رحمہ اللہ فرماتے ہیں:) موسیٰ بن ایوب نامی راوی کے چچا کا نام ایاس بن عامر ہے اور یہ مصر سے تعلق رکھنے والے ”ثقہ“ راوی ہیں۔ [صحیح ابن حبان/كتاب الصلاة/حدیث: 1898]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم رکوع اور سجدوں میں یہ پڑھا کرتے تھے: «سُبُّوحٌ قُدُّوسٌ رَبُّ الْمَلَائِكَةِ وَالرُّوحِ» ”ہر طرح کے عیب سے پاک ہے وہ مقدس ہے، جو فرشتوں اور روح الامین کا پروردگار ہے۔“ [صحیح ابن حبان/كتاب الصلاة/حدیث: 1899]

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم نے پردہ ہٹایا، لوگ سیدنا ابوبکر رضی اللہ عنہ کے پیچھے صفیں بنائے ہوئے تھے۔ نبی اکرم صلی اللہ علیہ وسلم نے ارشاد فرمایا: ”اے لوگو! نبوت کے مبشرات میں سے صرف سچے خواب باقی رہ گئے ہیں، جنہیں کوئی مسلمان دیکھتا ہے یا جو اسے دکھائے جاتے ہیں۔“ پھر آپ صلی اللہ علیہ وسلم نے ارشاد فرمایا: ”خبردار! مجھے رکوع یا سجدے کی حالت میں تلاوت کرنے سے منع کیا گیا ہے؛ جہاں تک رکوع کا تعلق ہے، تو تم اس میں پروردگار کی عظمت کا اعتراف کرو اور جہاں تک سجدے کا تعلق ہے، تو تم اس میں اہتمام کے ساتھ دعا مانگو، وہ اس لائق ہو گی، اسے تمہارے لیے مستجاب کیا جائے۔“ [صحیح ابن حبان/كتاب الصلاة/حدیث: 1900]

سیدنا علی بن ابو طالب رضی اللہ عنہ بیان کرتے ہیں کہ نبی اکرم صلی اللہ علیہ وسلم جب رکوع میں جاتے تھے، تو یہ پڑھتے تھے: «اللَّهُمَّ لَكَ رَكَعْتُ، وَبِكَ آمَنْتُ، وَلَكَ أَسْلَمْتُ، أَنْتَ رَبِّي، خَشَعَ لَكَ سَمْعِي، وَبَصَرِي، وَمُخِّي، وَعَظْمِي، وَعَصَبِي، وَمَا اسْتَقَلَّتْ بِهِ قَدَمِي لِلَّهِ رَبِّ الْعَالَمِينَ» ”اے اللہ! تیرے لیے میں نے رکوع کیا، تجھ پر ہی میں ایمان لایا، تیرے لیے میں نے اسلام قبول کیا، تو میرا پروردگار ہے۔ میری سماعت، میری بصارت، میرا گودا، میری ہڈیاں، میرے پٹھے اور میرے دونوں پاؤں پر جو چیز قائم ہے (یعنی میرا پورا وجود) اللہ کے حضور جھکا ہوا ہے، جو تمام جہانوں کا پروردگار ہے۔“ [صحیح ابن حبان/كتاب الصلاة/حدیث: 1901]

ثابت بنانی بیان کرتے ہیں کہ میں نے سیدنا انس بن مالک رضی اللہ عنہ کو سنا، انہوں نے ہمارے سامنے نبی اکرم صلی اللہ علیہ وسلم کی نماز کی کیفیت بیان کرتے ہوئے فرمایا کہ جب نبی اکرم صلی اللہ علیہ وسلم نماز ادا کر رہے ہوتے تھے، تو آپ صلی اللہ علیہ وسلم جب رکوع سے سر اٹھاتے تھے، تو آپ صلی اللہ علیہ وسلم کے قیام کی طوالت کی وجہ سے ہم یہ سوچتے تھے کہ شاید آپ صلی اللہ علیہ وسلم (سجدے میں جانا) بھول گئے ہیں۔ [صحیح ابن حبان/كتاب الصلاة/حدیث: 1902]

سیدنا علی بن ابوطالب رضی اللہ عنہ بیان کرتے ہیں کہ نبی اکرم صلی اللہ علیہ وسلم جب رکوع میں جاتے تھے، تو یہ پڑھتے تھے: «اللَّهُمَّ لَكَ رَكَعْتُ، وَبِكَ آمَنْتُ، وَلَكَ أَسْلَمْتُ، خَشَعَ لَكَ سَمْعِي، وَبَصَرِي، وَمُخِّي، وَعَظْمِي، وَعَصَبِي» ”اے اللہ! میں نے تیرے لیے رکوع کیا، میں تجھ پر ایمان لایا، میں نے تیرے لیے اسلام قبول کیا، میری سماعت، میری بصارت، میرا گودا، میری ہڈیاں اور میرے پٹھے تیری بارگاہ میں جھکے ہوئے ہیں۔“ جب آپ صلی اللہ علیہ وسلم رکوع سے سر اٹھاتے تھے، تو یہ پڑھتے تھے: «سَمِعَ اللَّهُ لِمَنْ حَمِدَهُ» ”اللہ تعالیٰ نے اس شخص کی بات کو سن لیا جس نے اس کی حمد بیان کی ہے“ «رَبَّنَا لَكَ الْحَمْدُ مِلْءَ السَّمَاوَاتِ، وَمِلْءَ الْأَرْضِ، وَمِلْءَ مَا بَيْنَهُمَا، وَمِلْءَ مَا شِئْتَ مِنْ شَيْءٍ بَعْدُ» ”اے ہمارے پروردگار! ہر طرح کی حمد تیرے لیے مخصوص ہے، جو آسمانوں اور زمین جتنی بھری ہوئی ہو اور ان دونوں کے درمیان جو جگہ ہے اتنی بھری ہوئی ہو، اس کے بعد جس چیز کو تو چاہے اتنی بھری ہوئی ہو۔“ [صحیح ابن حبان/كتاب الصلاة/حدیث: 1903]

سیدنا علی بن ابی طالب رضی اللہ عنہ بیان کرتے ہیں کہ نبی اکرم صلی اللہ علیہ وسلم نماز کے دوران جب رکوع سے سر اٹھاتے تھے، تو آپ یہ پڑھتے تھے: «اللَّهُمَّ رَبَّنَا لَكَ الْحَمْدُ مِلْءَ السَّمَاوَاتِ وَمِلْءَ الْأَرْضِ وَمِلْءَ مَا شِئْتَ مِنْ شَيْءٍ بَعْدُ» ”اے اللہ! اے ہمارے پروردگار! حمد تیرے لیے مخصوص ہے جو آسمانوں جتنی بھری ہوئی ہو، زمین جتنی بھری ہوئی ہو اور اس کے بعد جو چیز تو چاہے اتنی بھری ہوئی ہو۔“ [صحیح ابن حبان/كتاب الصلاة/حدیث: 1904]

سیدنا ابوسعید خدری رضی اللہ عنہ بیان کرتے ہیں کہ نبی اکرم صلی اللہ علیہ وسلم جب «سَمِعَ اللّٰهُ لِمَنْ حَمِدَهُ» پڑھ لیتے تھے، پھر آپ یہ پڑھتے تھے: ”اے ہمارے پروردگار! حمد تیرے لیے مخصوص ہے، جو آسمانوں جتنی بھری ہوئی ہو، زمین جتنی بھری ہوئی ہو اور اس کے بعد جو چیز تو چاہے اتنی بھری ہوئی ہو، تو تعریف اور بزرگی کا اہل ہے، وہ چیز سب سے زیادہ حق ہے جو ایک بندے نے کہی ہے، ویسے ہم سب تیرے بندے ہیں (اس بندے نے یہ کہا ہے:) جسے تو عطا کر دے اسے کوئی روکنے والا نہیں ہے اور جسے تو نہ دے اسے کوئی دینے والا نہیں ہے اور تیری مرضی کے مقابلے میں کسی بھی صاحب حیثیت شخص کی حیثیت فائدہ نہیں دیتی۔“ [صحیح ابن حبان/كتاب الصلاة/حدیث: 1905]